作者：丁汀
沪语改写、讲述：朱枫
文字、语音审核：丁迪蒙
编辑：王乙其
我个大名叫“幺咖”，搿是屋里向三个人经过一个夜里热烈讨论再定下来个。尽管我勿晓得具体是啥意思，但拨叫了两年多，老里八早就熟悉了大家搿能叫我，而且反应还邪气快。
我大概率是只呒没拨完全驯化个博美犬，闪闪发光个两只小眼睛是我个标配，面孔黑黜黜个，褐黄色个一身卷毛本来还蛮好看，勿晓得哪能，一年前头开始局部脱毛，黑皮露出来了。我自家看勿到，但总归觉着痒兮兮个，熬勿牢要用嘴巴去啃后背个黑皮，但是，我头颈短呀，哪能够得着后屁股个地方呢，常庄弄得勒原地打转，我勒难过、大家还开心个笑伊讲……真是个！
姆妈带我去仔好几家医院了，年轻医生讲像煞是“黑皮症”，配仔药膏转来搨。姆妈最辛苦了，每日天要搨好几趟，刚刚搨上去蛮止痒个，过脱一歇，我还是屏勿牢要用嘴巴去啃，啃得毛也钻到鼻头里了，一刺激末，我就拼命打喷嚏，流鼻涕，伊拉还当是我脱毛受冷得重伤风，又是吃药、着小花衣保暖，一阵个手忙脚乱，但还是喷嚏打得浑身发抖。直到一礼拜之后，打喷嚏辰光从鼻头洞里喷了一撮毛出来，所谓个“重伤风”总算好了……唉，语言勿通真个挖塞！
姆妈呒没办法，只好帮我戴头套了，辰光一长我变得戆嗒嗒了。原来粘人发嗲个本事难发挥了，本来好到处疯到处白相，现在搿个机会也呒没了，只好每日天呆笃笃个睏勒狗床浪“躺平”。不过，胃口倒没啥受影响，鸡脯肉照吃，牛奶照吃。
阿伯对我身浪向药膏香精个味道邪气敏感，常庄听到伊勒哇啦哇啦，声音瞎大。我暗暗叫好笑，阿伯个鼻头哪能搭我差大勿多呢？其实，我老早就反感搿浓浓个化学味了，只不过头套戴勒海，又拗勿过姆妈，伊总归欢喜搭我作主，因为吃勿消呛鼻头个药味道，我发疯一样咬过伊几趟，手节头也出血了，少勿脱吃鞭子。但是我再凶也没用，最后还得了只“小狼狗变种”个坏名气。阿伯几次来吓我，讲要拿我送脱。不过，伊也就讲讲，我现在还是邪气适意个躺勒软冬冬个床浪向么。
总算，姆妈调了种味道轻仔交关、勿再呛鼻头个药膏来搭我医治“黑皮症”，但是前辈留拨我个基因细胞反复作怪，后背仍旧痒得要命，难过啊，我快要得忧郁症了，原来活泼好动个天性，现在一日到夜闷闷不乐。只有到了夜里，买我转来个阿姐回来，我再像拿大救星盼来了，解开头套，一记头蹿进伊个房间，甚至跳到伊个床浪。我搿记有靠山了，马上就神气了，我吓啥人啊？连得姆妈阿伯开门来看看，我也朝伊拉拼命个叫，勿让伊拉进来，……乖乖隆地咚！葛咾，姆妈买转来专门为了制服我咬人个长臂皮手套，揿牢我身体，打我头，勿拨我赖勒阿姐个床浪发疯。没办法，我只有四五斤重，力气小，罪过八腊个，结果末，用勿着讲了：我只好装老实，一动也勿动，但心里勿服气啊。
姆妈急煞脱了，请得来据说是专业个“训狗师”上门来搭我校校路子，邪气杀搏个拿我教训一顿，我个小身胚哪能吃得消啊？弄得浑身又酸又痛，还算好，我头子活络，勒埃个大模子专业调教之下，我勿服也要服呀，我个“克星”老得意个走了，姆妈开心了、笑了，我也识相个䟿起来，抖抖身体，心甘情愿拨牵牢仔到对过科普公园去白相了。
但是，只要阿姐一转来，我就熬勿牢、跑到伊房间里搭伊亲热亲热……搿个一刻，勿管是啥人推门进来，我就会狗没记性，旧病复发：又摆出一副老凶个样子，嘴巴里还有吓人到怪个声音。我像煞也已经晓得搿种反应勿讨人欢喜，但我却是控制勿牢。
其实，我也老胸闷个，我舍勿得离开迭个屋里。所以，求阿里位真正懂我个老法师来帮我搭搭脉、开只药方子好伐？拜托、拜托！
作者：丁汀
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
