作者：吴翼民
沪语改写、讲述：王邦基
文字、语音审核：丁迪蒙
编辑：王乙其
初到江西，无论是浔阳江畔个九江、还是洪都名城南昌，或者景德镇搭仔上饶，凡是进入餐饮店用餐，邪氣醒目个招牌大多数是“瓦罐米粉”或者是“瓦罐炒面”之属，小吃店迭能，大饭店也是迭能。
米粉搭炒面多數全国通行，搿个瓦罐恐怕只有江西流行伐。于是，我凡是 用餐，儕会得来上一罐，慢慢叫，竟然邪氣歡喜伊了，以至于凡餐必罐啦。
江西人特別歡喜个瓦罐，其实是瓦罐煲汤，是否跟迭搭盛产陶瓷攸关？也勿像呀，江西景德镇是瓷都，虽然也有陶器，却侪拨精细溜滑个瓷器盖了风头，勒省博物馆或者景德镇陶瓷博物馆个陈列裏的确是瓷器煌煌然、而陶器瘪瑟瑟個呀。我细細叫想了想，假使用瓷罐代替瓦罐，明显是上了档次，但失脫了大众化亲民化，恐怕是犯了餐饮之忌呢。
我看到个江西餐饮店家，勿單單是端上餐桌个小瓦罐亲切可人，而且交关广作招揽个、夯勒店门口个老老大个瓦罐也透仔殷实厚道个气息、也是伊能个惹人歡喜。乃末，勒江西個一礼拜个游历辰光，天天搭仔瓦罐亲密接触，感受伊个纯真本色，可丰可俭，饮其汤，清冽可人，食其料，爽然有味。我品尝了勿少种汤料个瓦罐，简單个，就是几枚菌菇几叶时蔬；豪华个，有鸡、牛肉乃至海鲜，大众化个是肉丸搭鱼丸打底，再加以菌菇搭仔时蔬，高汤侪是邪氣鲜爽勿油腻，关键是邪气烫，勒深秋季节邪气讨人喜欢。假使吃正餐，可以當汤吃，假使吃早餐，配炒面或者炒粉，一干一湿，价格相当个实惠。勿能勿讲是江西人對餐饮个一大智慧创造呢。
我勒品尝瓦罐时忽有所悟，搿道瓦罐煲汤，勿就是我伲江南个“元盅”么？譬如阿拉搿座江南滨水城市，就邪氣崇尚“元盅”，是道蒸菜，有“元盅排骨”“元盅面筋”搭仔“元盅蹄髈”之类，即使吃面，也会来一盅，是一直老受欢迎个，只不过阿拉迭搭用个是瓷缸，看上去比較细气，江西用瓦罐，显然原始得多。但有点不同，用瓷缸个“元盅”多數是蒸个，甚至是大鑊子燒好之后舀到小瓷缸，高档个饭店“元盅”就显示档次了，每位来一盅鲍鱼鸽蛋啥个，价钿就直线上升了。江西个小瓦罐多數是一罐一罐壁垒分明、单独燒个，我看見有家大饭店就有得一只灶台、是专门用來瓦罐煲汤個，交关小瓦罐象小顽童一样“排排坐，吃果果”，用夹钳一夹随时端上餐桌，热氣腾腾，香气氤氲一片。
勿仅是瓦罐“独立成章”，就是米饭也是迭能，搿只大饭店有只专门燒饭个灶台，一式迷你电饭煲，最多容納碗饭，客人点饭了，服务员就拿一只迷你煲米饭端上来，雪白喷香，讓人邪气有食欲。现在，大多数饭店对饭已经漠视了，而江西依然邪气看重饭店裏個饭，恐怕也搭瓦罐一样個接地气。
阅尽华夏诸菜系，赣菜也许嘸没啥名气，但单凭一道瓦罐煲汤，赣菜就有一席之地了，假使勿相信嘛，请儂亲访江西，舀一勺尝尝味道看。
作者：吴翼民
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
