文字、語音審核：丁迪蒙
編輯：王乙其
我常庄勒黄昏头坐勒书房里，享受夕照穿窗而入带来个伊种异样个神奇。此刻，书房已经暗下来了。书籍文稿搭仔艺术品堆得到处侪是，重重叠叠迓勒阴影里。
夕阳，已经勿像日里向火热踏踏滚；伊变脫了，变得邪气温和，血血红个颜色，像煞橘黄色个灯光，勿管啥物事拨伊一照，侪显得特别漂亮。首先，是窗台浪伊盆已经干瘪脫个藤草，像镀仔金一样，蓬勃发光；挨下来，是书桌浪个玻璃灯罩，亮晶晶个，像煞是灯开了；再挨下来，一大片橙色夕阳带仔窗棂搭外头个树影，斑斑驳驳个投勒东墙伊面一排大个书架浪。阴影个地方，书侪是暗黜黜个，光照个地方呢，连得书脊浪个字也看得清清爽爽。《傅雷家书》是烫金个，放仔金灿灿个光芒，像煞勒讲：“我可以永存。”
哪能介个物事再能夠真正个永存？阿房宫搭华清池已经片瓦勿留，李杜个名句搭老庄个格言却一字勿误个镌刻勒每个华人个心里。世界浪延绵最久个还是非物质个——思想与精神。能够准确记忆思想个只有文字。告咾有搿能句闲话，文字是阿拉个生命。
夕阳慢慢叫个移过来，台子浪每样物事侪变得妙不可言。一尊苏格拉底个小雕像勒暗处，一束细细个光芒从一丛笔杆个缝隙当中穿过，停勒伊个嘴唇之间，像煞是想撬开伊个嘴巴，听听迭位古希腊哲人 对现在迭个混沌而荒谬个商品世界 个醒世之言。但是伊嘴巴紧闭、含仔夕阳，一声也勿响。昨日个哲人只好解释昨日，今朝个答案还是要今人来。搿能介看来，一声勿响个原来是阿拉自家。
摆勒台子浪个一块镇尺最离奇。是朋友送拨我个。伊是块纯净个无色玻璃，一条弯勒尾巴个小银鱼拨铸勒当中。阳光进去，玻璃非但没反光，反而因为纯度忒高消失了，只有伊条银光闪闪个鱼悬勒空中，无所依傍。
夕阳个生命是有限个。伊勒天边一点点落下去，伊个光却勒我个书房里慢慢叫升高。迭个辰光连得我书房个空气也是金红个。细细叫看，空气里浮动个尘埃，小得肉眼刚刚看得见个颗粒居然拨照得亮而美，伊拉勒半空中自由、无声、笃悠悠个飘来飘去，搿是只有夕阳再能创造个境象——伊好让最平凡个事物变得无比神奇。
勒太阳落下去个一霎那，光已经移到书架最高头个一格。伊面摆勒只泥公鸡。身体雪白，彩色翅膀，眼睛又黑又大，威武、神气。此刻泥公鸡勿晓得为啥，对牢仔将要熄灭个夕阳叫。叫声好像也感动夕阳了。一记头，泥公鸡居然拨照耀得夺目、通红，像煞燃烧起来了。
讲述：边秦翌
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
