作者：沈嘉禄
沪语改写、讲述：杜郁芬
整合：金和平
文字、语音审核：丁迪蒙
编辑：王乙其
往期回顾：
（十四）
郑晓风从李老师个眼神里看到一种邪气深远个物事，迭个是围绕山岚个云岫，正慢慢叫个飘向蓝天；是沙滩外头个海浪，正勒勒拍打岸礁；是夜空里个星辰，勒勒闪烁诱人奉献个神话；是教堂里延绵勿断个钟声，勒勒召唤赤身裸体个天使扑打翅膀飞过来。
郑晓风别过面孔，伊常怕有得眼泪水落下来，拨李老师看见。李老师拿起茶杯去倒茶，伊背对牢郑晓风讲：“侬去伐，去上课伐，侬是聪明人，下头个闲话勿要我再讲了伐。”
郑晓风突然之间冒出来一句：“其实，我真个希望侬心情好。”
郑晓风拼命让自家回复到原来个状态，认真听课，认真做回家作业，但结果并勿理想，成绩还是一路浪滑坡，有一趟测验，居然连吃了两只红灯！上课辰光，伊还是勿由自主个望牢仔窗门外头，搿个辰光，伊想得更加多个是哪能介帮老师破案。伊想，假使破了搿只案子，老师个心情就会得好起来，一切就从头开始了。
郑晓风开始写小说了。作文是伊个强项，勒伊个理解当中，小说搭作文是一对亲兄弟，交拨老师个是作文，贴到网浪，或者印成功书，葛末就是小说了。
伊是勒勒一个礼拜六个早浪向开始写个。伊本来是准备做数学题个，回家作业本来就多，双休日还要加倍，呒没愚公移山个精神，学生仔是会得精神崩溃个。伊想先拿数学放一放，先做一节心情体操，乃末像煞拨鬼拉牢仔一样，勒本草稿簿浪写了第一句：搿日天，天气晴朗，阳光明媚，李老师从屋里出来。小区个绿化带里有老太勒跳扇子舞，大红扇子像煞是伊拉个另外一件衣裳，随风飞舞……
写了几句，伊自家轻轻叫读了一遍，感觉勿错，蛮像小说个样子个。
一得意呢，就收勿牢了。就像一个人从高个地方滑雪，滑下来，就控制勿牢了一样。只觉着风声勒耳朵边浪呼呼响，眼门前个景物邪气快个掠过去，脚下头个滑雪板勒积雪浪向磨擦，散发出热量，热量又转换成白色个气体，又像烟一样，看勿见了。
埃种快感勒勒勿断个刺激自家，快！快点！再快点呀！
作者：沈嘉禄
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
