作者：辛旭光
沪语改写、播讲：张娅佳
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（十七）
天气开始转冷了，眼睛一眨，勒舟山已经蹲了四个号头了，日脚已经到了1950年个元旦。尽管兵荒马乱个世面，沈家门个人家，还是侪勒迓迓叫准备年货，各种鱼干肉条，一串串个晾勒家家户户个屋檐下头，石臼旁边，交关人侪忙勒勒打年糕。阿娘屋里个弹棉花店铺，脚踏棉花机一歇勿停个轰隆轰隆，过年了，大人小囡侪想要换新个棉袄棉裤，新个被头。
姆妈看看自家手里个小囡，呒没一件衣裳是像像样样个。有趟从海边拾来一条有枪洞个军用旧毛毯，一半铺床，一半剪开来搭儿子做了件兜蓬，算是可以勉强挡挡海边潮湿个冷风。姆妈个眼泪落了一路。
回到羊棚间，半钵斗粥摆勒稻草铺个床浪，还没冷透，姆妈快点嗍了口粥，含勒嘴巴里捂热，再喂拨勒儿子吃。搿歇辰光伊真个是想屋里了——从前迭个辰光，是伊勒屋里，搭乡下头个两个囡儿准备新衣裳，搭自家男人补好棉袄棉裤，再做双新棉鞋。现在真是叫度日如年啊！伊看牢儿子天真个面孔，心里对自家拼仔命个叫：“回去，回去，回去！”
第二天早浪，一路浪看到个人家，屋前、房后个扫帚、犁耙、箩筐浪，侪挂仔一小段个年糕。阿娘讲，舟山过年个风俗，除脱要敬妈祖菩萨，辛苦一年个农具也是要犒劳个，搿能末，明年再好“顺顺流流，年年有余”。 搿一天，是老虫也好正大光明出来吃年糕个。
姆妈突然想起，自家结婚第一年，勿舍得买鱼买肉，就搭自家男人做了一缸酒酿。挖一调羹就好烧一碗酒酿汤，搓几只糯米小圈子，摆一眼桂花糖浆，就是一碗酒酿圆子。再潽只蛋，就是大年初一个早饭了。伊从小就跟娘做家务，做酒酿就是拿手好戏。再讲现在流浪勒舟山，碰到介许多贵人，总归要还还人情个。
想到搿搭，姆妈马上拿出五角洋钿，买了两斤糯米，几分洋钿个酒药。伊打算到庙里去问师父借只地方，因为庙里地方大，也清爽。
（十八）
做酒酿最犯忌个，是生水搭仔油渍，碰着迭个两样，酒酿就会得发酸、发霉。
搿日天，姆妈忙了一上半日，先拿小钵斗、铁镬子、筷子、蒸笼搭仔蒸笼布，侪用碱水汏过三遍。再用庙里个稻草扎了只草窠。半熟晾温个糯米摆勒钵头里，拌好酒药，密封好，摆到暖热个灶头间里，伊关照道士先生，三日天里向勿要让人碰。
过了三日天，姆妈到了庙堂个后院。热气腾腾个厨房间里，围了一大群道士师徒，道士先生勒搭大家从大镬子里舀酒酿汤，每碗酒酿汤里两只蛋，迭个就叫“甜酒酿水潽蛋”，是过年辰光招待老长辈吃个。搿眼道士也真个是馋痨胚。
姆妈快点过去，一看酒酿还剩半钵斗，也就放心了。伊马上盛出去一碗，要去送拨瞎眼接生婆，又盛了一只蓝边大碗，搿是留拨打铁店个阿娘个。
“上海小娘手艺好，甜酒酿呱呱叫，先吃勿怪。”呵呵呵，一帮道士侪抿牢仔嘴巴笑。姆妈勿敢光火，本来也打算要送拨伊拉一半个。
搿辰光，正好打铁店阿娘个孙囡寻过来了，伊告诉姆妈，瞎眼接生婆勒寻伊。
原来，瞎眼接生婆要告诉姆妈，后日，有班走私船要到上海去，要伊事先准备好船票铜钿。明朝一早到码头边浪个茶馆店里去搭船老大碰头。
姆妈讨得来个铜钿，日朝囥勒身浪，已经有三十八块大洋了，再加上两只船洋，一共有四十块。伊担心还铜钿勿够，勿晓得船老大阿会得狮子大开口。
赶到码头边浪个茶馆，瞎眼接生婆已经坐勒海，伊今朝拿舟山渔妇整日围勒身浪个竹笠白兜布脱脱了，戴了顶黑丝绒帽子，头个后髻浪是一根金光闪闪个簪子，小脚浪着勒双绣花圆口鞋，邪气体面。
只听见伊开口讲：“算搿个小囡有运道，明朝，㑚就有船到上海去了。”
作者：辛旭光
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
