作者：沈嘉禄
沪语改写、讲述：曹蓓蔚
整合：金和平
文字、语音审核：丁迪蒙
编辑：王乙其
往期回顾：
差勿多过了半个号头，故事终于收尾了。
贼骨头已经积着了邪气多个钞票，上一趟勒勒地铁车厢里，差一点拨人家捉牢个经历，也是对伊个严重警告：历经沙场个手节头，灵敏度比起老底子已经是大推大板了，乃末小偷决定金盆汏手了。不过，伊还想再进行一次谢幕演出，倒勿是为了钞票，而是为了表演拨自家看，纯粹是出于一种自我挑战。但是齐巧就是迭个最后一次，伊失风了，拨人家当场捉牢。
当迭个被害人回过头来个辰光，小偷更加是吃惊得嘴巴张得老老大。伊还认得出，眼前搿位受害人，就是自家个中学老师，一个邪气善良个老师，自家有一年生毛病住医院，老师用脱自家个半个号头工钿，买了交关营养品到医院来看自家，迭个恩情，自家至今也呒没回报。倒勿是勿想回报，小贼毕竟晓得，自家个钞票来得勿清爽，呒没回报个资格。
就勒老师有眼吃惊发呆个辰光，小贼挣脱了老师个手，冲出车门。但伊没想到，各个检票口侪轧满了人，伊想翻过检票机，但是到处侪有安保人员看守勒海，身后头好像还有人盯牢伊勿放。眼看四面八方侪出现了拦截，大家严阵以待，层层设防，步步紧逼，包围圈开始收缩，贼骨头走投无路了。最后，蹿到地铁站台个边浪。
伊个老师，正立勒搿搭。一家头，就老师一家头，孤零零个立勒搿搭，伊像煞是棵树，迎风挺立，头发像煞是挂霜个树叶，老师面孔浪是饱经风霜个愁苦，又好像带了一丝若有若无个微笑，迭个是一种怜悯，是一种大慈大悲个怜悯。
小贼绝望了，伊跪下来，求老师放伊一条生路。老师轻轻叫个讲：起来伐，侬个脚馒头也跌破了，出了介许多血，骨头伤着了伐？我陪侬到医院去看看伐。
桔黄色个灯光从隧道深处照过来，有一趟列车要进站了。愤怒个人群排山倒海一样个翁过来，老师朝伊伸出手，要拉伊立起来。小贼立时三刻感到无地自容，一转身，从站台浪向跳下去了。
作者：沈嘉禄
讲述：曹蓓蔚
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
