作者：辛旭光
沪语改写、播讲：汪婷（二十三）、茅赢之（二十四）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（二十三）
老朱力气大，推开人群，拉仔家主婆就走。十六铺到药水路也就是两站。回到熟悉个屋里向，姆妈实在是立勿牢了，伊拿别勒腰里个布鞋子厾勒台子浪，倒勒床浪向迷迷糊糊就想睏。老朱一看，是一只男人个鞋子，里向还囥勒几只银洋钿，心里向侪是疑问。看看自家个女人，瘦得来眼乌珠也凹下去了，伊马上拿门关好，拿儿子摆勒床浪，要姆妈拿所有个破衣裳侪脱下来，汏衣裳烧饭侪是伊个生活。
儿子像煞认得搿搭是自家屋里，一直勒笑。老朱要家主婆起来喂奶。“没饿煞冻煞就算命大了，阿里还有奶水啊。阿拉娘两家头是药店里个揩台布，苦透苦透呀。”姆妈一直勒诉苦。
老朱马上讲我去买奶粉。姆妈讲：“有粥伐，热热伊，倒眼猪油细盐就好了，㑚儿子命硬，第一口奶就是烂糊面。”听得老朱心交关痛：“我勒船浪就好了，侬也勿会吃介许多苦头了”。其实再哪能想，伊也想勿到船会得拨劫持出去，更加想勿到，过脱四个号头，自家个家主婆会活囵吞回来，还带了个儿子。
“侬勒船浪更加倒霉，我是顾侬好，还是顾我肚皮里个小人好？搿真要一家门侪死脱了”。姆妈一头喂儿子吃粥，一边自家也吞了半碗下去，乃末再有力气开口讲闲话。
搿歇辰光，伊对自家四个号头惊心动魄个经历有眼骄傲了。
老朱邪气吃惊个数了数鞋子里向十几只银洋钿，讲“侬讨饭赚来个铜钿，比做生活还多啊？”
“放侬娘个风凉屁！侬去讨讨看，面孔朝阿里搭摆啊？” 姆妈回了一句。
老朱要紧搭乡下头老家寄了平安信，自家整天抱勒个儿子。
姆妈睏仔三日三夜，小姐妹来看过伊，讲老板搭伊留了岗位。伊叫老朱拿伊留了四个号头个辫子剪短。还搭儿子改了几件像样个小衣裳。
搿几天，屋里来了好几批着制服个干部，居民小组长要老朱到门外头等勒海，上级要问姆妈一眼情况。老朱就抱勒儿子，到门外头去孵太阳去了。
（二十四）
姆妈勿识字，人家问，伊就唠唠叨叨个讲，兴奋得来停勿下来。伊也终于明白了，搿只船是反动派特务抢得去个，舟山马上也会得解放了。
伊拿带回来个破衣裳侪堆勒台子浪，讲一趟哭一趟。“打铁店个好阿娘，羊棚，瞎眼接生婆，道士先生，船老大。”讲来讲去也就搿点事体。
带回来银洋钿侪拨工作同志看过，伊只男人个鞋子拨人家收得去研究了。伊还讲了两块船洋是南通老乡拨个，下趟要还拨人家个。
各路人马回去之后，写了各种文章报告。《申报》记者以姆妈个口气，控诉了反动派特务劫持民船，置孕妇于死地个可恶行径。
居委小组长要老朱去报户口。姆妈讲：“儿子是农历八月十八养个。属牛。已经请道士先生取过只寄名，叫妙生。”
老朱讲：“妙生是寄名，勿好做大名个。既然养勒舟山，就叫朱舟山蛮好个。”
警察查了日历，讲：“八月十八是阳历个1949年10月9号。朱舟山也勿好听，下趟会得拨人家取绰号叫猪头三个。” 伊看了登记簿浪，朱家大囡儿叫朱惠娥，二囡儿叫朱惠芳。“姓朱就叫朱伟忠伐”，“惠”“伟”同音。勒屋里还是叫小名“舟山”好了。
四十年后，姆妈已经故世了，朱舟山也退休了，伊从姆妈单位复印了姆妈个人事档案，想留只纪念。发现了五十年代，几家单位调查姆妈个报告：军管会公函：该女工随船拨劫持到舟山，四个号头之后自行逃回上海，期间生下一男婴，查无材料证明与国民党特务有联系，请单位注意后续情况，及时报告。
公安局个调查报告邪气具体：
1、 船上有个陈姓同乡，拾到此人一只鞋子，鞋子里有两块银圆。该同乡被抓壮丁到了台湾，此后去向不清，两人也无联系。
2、流落舟山时，有个开打铁店个阿娘帮助。借住人家羊棚，生下儿子。接生婆是个瞎眼，收了十几块银圆接生费，并经她介绍联系了走私船老大。
3、 舟山码头后山有一道观为难民提供免费吃住，道观里有个道士为婴儿取了寄名叫“朱妙生”。道士讲，此婴儿以后只能“向北面发展，向南有灾。”是不是特务接头暗号不可知，但一定是封建迷信。
4、 据本人讲，船老大是个满脸横肉的黑面孔男人，粗鲁像流氓。是瞎眼接生婆介绍的，收了大人二十银元偷渡费，没收婴儿个费用。这个有疑问，船老大应该是个走江湖个帮会头目，他与瞎眼接生婆茶馆见面时，讲了许多江湖黑话。此二人政治面貌不清，应该是旧社会道门帮会黑势力，不知为什么会帮一个女工乘船逃回上海。
文章写到搿搭，后面是一只大大个问号。
5、 该女工在沈家门流浪四月余，据称乞讨得来三十多块银圆，据其丈夫讲，比她做工的工资还要高，兵荒马乱时代，一个女工人生地不熟活下来已经很难，怎么可能讨要到这许多银元？
结论：继续调查，该女工今后入党提拔使用，必须事先与公安机关联系。
最后个落款日脚是1950年5月。
作者：辛旭光
播讲：汪婷（二十三）
播讲：茅赢之（二十四）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
