作者：辛旭光
沪语改写、播讲：王静（二十七）、汪婷（二十八）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（二十七）
朱舟山来煞勿及个拆开了迭个八行竖版个信笺，上头写个是:
“舟山贤侄安好！晓得㑚母子平安，相当安慰。当年国军转进台湾，我也被迫卷入。同船碰到侬个姆妈，伊是个孕妇，老罪过个。我当时年轻，毕竟勿要紧，就拿囥勒两块银洋钿个鞋子踢拨侬姆妈，让伊有个应付时艰个办法。
“再讲，杜公馆一家门要逃到香港去，杜先生忧心忡忡，哮喘病发作，影响出行。杜公馆个四太姚玉兰，就迓迓叫到城隍庙，请来了“罗天大醮”大法师、正一派掌门人陈莲笙道长，来捉蛊驱病。三日天以后，陈道长拿搿两块银洋钿拨我，交代我要掼到马路浪去。伊讲要朝北面走，掼得越远越好，有人拾到了以后，就会得拿老板个毛病带跑个。
“我看搿两块赤刮勒新个银洋钿，是难板看见个孙小头船洋，只不过是拨烟熏过了。想想时局介紧张，留勒海拨自家救救急，勿是更加好么？我就跑得老老远，掼脱了几只铜板，自家拿船洋留下来了。后来，我就带勒银洋钿回到了南通。哪能晓得船拨兵痞抢得去了，人也拨伊拉捉得去做壮丁了。看起来，不义之财还是勿好要个。”
朱舟山看了信，心里拿谜团整理出了线索。原来，搿两块银洋钿是船洋，真个是杜公馆里出来个，特别新。不过，银洋钿肯定是道士先生经手过个，伊先拿来做道场道具，老底子人家没铜钿看医生，就请个道士，画张符去捉鬼，比如“天惶惶，地惶惶，我屋里出了个夜啼郎，过路君子念一遍，一觉睏到大天亮。”上海人家也常庄形容神神道道勿好捉摸个人或者事体，叫做“祝由科”。
（二十八）
朱舟山好像变成功福尔摩斯了：瞎眼接生婆也有一式一样个船洋，说明伊年纪轻个辰光一定勒上海滩混过，而且一定拜过 “老头子”，所以伊也晓得搿种“船洋”浪个记认，搿是走江湖个派司，代表是帮里个兄弟姐妹。再讲，伊拉就是用搿种银洋钿个权威，去“指挥、节制”船老大个。
朱舟山特别去查了银洋钿个图册，发现只有民国21年，也就是1932年个船洋浪，再有得三只飞鸟个，当年只发行了六万只。而民国22年，民国23年个船洋，也叫“孙小头”，迭个上头就呒没三只鸟个图案了。物以稀为贵么，作为民间秘密帮会组织，当然就会得利用“三只鸟”个船洋，来作为入门个身份标志。
至于道士先生，也可能是清门成员，伊搭瞎眼接生婆认得个，同时伊又发现搿块“三鸟船洋”已经拨火熏烤过，有特殊个檀香味道，就觉着迭个物事邪气勿一般。所以伊自然勿会收个。但是天机勿可泄露，原因勿好随便告诉外头人，索介顺带便看好了小毛头个厌食萎靡症。
姆妈倒是局外人，伊无意当中拿着两块船洋，意外个闯进了搿只危险圈子里。不过不知者勿怪，可能老天爷认为伊还带勒一条小生命，就罚伊吃苦头，拿小囡养勒羊棚里。还算好碰着了埃个瞎眼接生婆，伊原来是岛浪穷人出身，跑到上海混饭吃，人生地勿熟，只好靠老乡帮忙，而舟山老乡撑船个多，跑船走江湖个欢喜抱团，往往结拜入会，搿是青红帮个群众基础，也是旧时代穷人抱团取暖个写照。瞎眼接生婆是只认银洋钿个，伊以为姆妈也是天涯沦落人，同病相怜，所以伸出了援手。
朱舟山解释得头头是道，搭姐弟分享了七十年前头个故事，再加伊自家个研究成果。大家觉着谜团已经解开，必须豪扫报告公安局，可以盖棺定论，告慰姆妈了。
朱舟山吃光了杯子里个老酒，交关得意个讲：“瞎讲有啥讲头啦？”
作者：辛旭光
播讲：汪婷（二十八）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
