作者：辛旭光
沪语改写、播讲：杭岚（十九）、陈美群（二十）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（十九）
就勒伊拉讲闲话搿辰光，上来个走八字步个男人，矮矮壮壮，敦墩实实，短头发，眉毛又粗又硬，老张扬个，面色是又黑又亮，比三国里个周仓还要精神。只看见伊上身着青颜色个大襟棉袄，下身是条又阔又短个蛮薄个灯笼裤，外头还罩了一身长到脚馒头个棉马甲。伊一眼看见对过坐个是个抱小囡个年轻女人，身材高挑，城里人个打扮，着个是短衣衫，伊好像蛮开心个，熬勿牢多瞄了几眼。勿请自坐，大大咧咧个坐到接生婆搿对面了。姆妈拨伊看得心里发慌，豪扫叫茶房上茶送糕点。
瞎眼接生婆挥了挥绢头，表示已经晓得，随手拿茶房送上来个大茶壶个壶嘴，转过来对准船老大。船老大面孔浪黑黜黜个肌肉一动，粗声粗气个问：“阿姐，有啥生意挑挑我啊？”
瞎眼接生婆自言自语，好像唱了句戏文：“地振高冈，一派溪山千古秀。”搿船老大随口就答：“门朝大海，三合河水万年流”。
只看见两家头一笑：“吃茶，吃茶。”乃末三盅茶吃过，点心也用过了。
问了几时开船，啥地方上船咾啥个要紧闲话。船老大翘起脚，一五一十讲得蛮清爽：明朝夜里十点钟，乘当兵个换防个辰光，海浪向没人岗哨巡查，船就迓迓叫起航。
瞎眼接生婆指牢仔姆妈讲，“伊是拨人家劫过来个上海难民，侬送伊拉母子回去，道里个事体，我自会搭师父进香个。”船老大回答：“阿姐讲了算!”
姆妈豪扫拿仔一包银洋钿，摆勒台子浪。瞎眼接生婆勒银洋钿当中摸发摸发，抽出埃两块锃锃亮个银洋钿，推到船老大个面前：“侬好好叫看看，见见世面。”
就勒船老大拿起两块银洋钿又是敲，又是吹气个辰光，瞎眼接生婆又来了一句戏文：“同根生，同苦楚，彼此平生情不割。”
（二十）
船老大马上回答：菊花开，兄弟情，刻骨铭心勿可忘。伊突然之间发现，迭种船洋浪向，有三只飞鸟，马上用两只手拿银洋钿合起来，反反复复个摩擦，嘴巴里叫出来：“啊呀，大家侪是安清道友呀。”
瞎子接生婆讲：“哼哼，侬再看看好！伊从自家绢头里，拿出一块银洋钿，啪一记拍勒台子浪向。太阳下头，也是一块赤刮勒新个船洋，帆船浪向也有三只飞鸟。”接生婆说：“当年我从上海滩回来，是杜先生亲手送拨我个，杜先生讲，碰到过勿去个事体，拿迭块银洋钿出来买条活路。”
狗朝屁走，人朝势走。瞎子接生婆个闲话，吓得船老大要跪下来了，伊听人家讲过，帮会里向，有三只鸟代表天地会里“天地人”个意思。伊晓得拿仔“三鸟船洋”个人是啥个分量，马上就讲： “我只收廿只，小囡免费，包勒我身浪，拿伊拉送到十六铺。”
姆妈听勿懂伊拉带仔黑话个舟山闲话，但是伊晓得，逃命个机会，是迭个混过十里洋场个阿姐拨个，心里也有眼觉着，迭两只船洋搭仔上海大亨一定是有啥个关系个。
船老大走脱之后，姆妈拿甜酒酿拿出来：“侬是阿拉娘两家头个贵人，我要让儿子认侬做过房娘。”瞎子接生婆呒没接口，自家舀了一勺子甜酒酿，咂咂嘴巴讲：“绿波廊个味道嘛。”伊笑得有眼尴尬，用伊个宁波上海闲话讲：“想当初，要勿是伊个泼妇浇了我硝镪水，我哪能会得是今朝搿能个鬼样子！”讲到搿搭，伊面孔浪向个疤血血红个翻开来了。但是伊个闲话是冰冰冷个，赛过边浪向呒没人一样。听了姆妈个建议，伊好像也呒没要认迭门亲个意思，只是用伊煞煞白邪气光滑个左手，反反复复摸牢仔自家右手中指浪个金刚钻戒指。叹了口气讲：“勿要看小姐出嫁，要看老太收场！”
作者：辛旭光
播讲：杭岚（十九）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
