来源：名家散文
作者：席慕蓉
沪语改写：俞镝
朗读：俞颖
文字、语音审核：丁迪蒙
编辑：王乙其
往期回顧：中年个心情（上）
但是，中年个心情，是由勿得我来随意后悔个呀！
于是，我勿断充实、锻炼、告诉自家：要了解世界浪美丽搭仔珍奇个无限，要安静、知足、从容、不勿后悔我所有个抉择，所有个分离搭仔勿舍。
因此，我对现在个辰光就邪氣珍惜了。所有撥我匆匆忙忙抛勒后头个日脚，对伊拉我是再也无能为力了。但是对挨些即将来临个，对眼門前个辰光，我还来得及把握，还好用我个全心搭全力来等待、企盼搭仔经营。我想，无论如何，从今往后个日脚里，对所有我珍惜个物事，侪要用从容、认真个态度去对待。
原来我以为，只要认真琢磨，我好拿中年时光琢磨成一块晶莹剔透个玉，只要我肯努力，生活就好变得邪气光洁、纯净、呒没丝毫个瑕疵。但是我勿晓得，生命里到处侪铺满勒像迷宮一样个轨道，就算到中年了，有些事体仍舊是无法探索、也无法明白、更加无法控制个了。
因此，我突然发现，人类个努力原来也是有限个。理想仍旧存在，只是勒每一個反复里，会得发生邪氣细小琐碎个错误，拿我搭理想慢慢叫隔开。回头望，生命里所有个记忆侪只能变成一幅褪色个画，只有我自家再晓得，勒我個心里向，伊曾经是邪氣鲜明个颜色呀！
面对搿能个结果，我勒悲伤之中又隐隐有得欢喜，欢喜臣服于自家个命运，欢喜时光搭仔浪潮对生命个冲洗。正如伊拉所讲个：搿就是我所有个诗里向个心情了。
自从拿诗印成功铅字之后，就勿断有认得个或者勿认得个读者来问，邪氣直接或者蠻有技巧个问我，伊拉想晓得，勒我诗里向个搿种心情，是真个还是假个？我要哪能再能回答伊拉呢？
莫奈个伊幅灰紫色个睡莲，或者伊画个所有个睡莲：清晨、正午、夜快頭个——伊些巨幅睡莲，或者小张速写，到底是真个还是假个呢？
勒伊画个辰光，伊个水池裏个睡莲开得邪氣好，搭伊拉娇艳个卖相相比，莫奈画浪个睡莲应该只是一种呒没生命个颜色而已。但是，画家勒画里加了一片伊愿意留下来个，伊希望留下来个美丽，借大自然里无穷个光彩变化，伊画出了一朵又一朵盛开个生命。
搿个夏天我立勒伊个画前頭，七十年前个夏天里一池个睡莲老早已经枯萎死脱了。搭伊画裏向个睡莲比，到底是啥再是实？啥個再是虚呢？又有啥人能够回答我呢？
中年个心情，或许就是种勿再急切个去索求解答个心情了伐？
或许就是勒拨误会个辰光，勿再辩解、再拨刺伤个辰光，勿再躲闪个伊种心情了。无怨也无尤，只保留一个单纯个希望。
希望终于可以再有一日天，画出一张永勿褪色个画来。
朗读：俞颖
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
