文字、语音审核：丁迪蒙
編輯：王乙其
一推开门，原本寂静个房间里立刻有了骚动。
铁笼子里，一只小小个身体立起来，两只小腿扒勒铁栏杆勿停个動，两只小眼睛急切個盯牢我，准确个讲，是朝我手里拎勒海个菜看。
葛是一只小仓鼠，我老歡喜个宠物。迭个小家伙模子勿大，胃口却是勿小，小嘴巴一日到夜勿停個，吃蔬菜个量比我还多，养仔伊四年，花费個銅鈿银子勿少。開始辰光我想：人家养猫养狗，猫、狗还好搭人亲近、互动，搿只小仓鼠我抱又勿好抱，摸也勿好摸，还要天天像服伺少爷一样个喂水、喂食、打扫“寝宫”，我图啥呢？
超市买菜轉来也嘸没顾得上休息，先拿油麦菜個葉片一片一片汏清爽，用小毛巾拿几片揩干（带水喂，小动物容易肚皮射），再拿到老早就急得勿得了個仓鼠嘴巴边浪，伊头也勿抬、窮吃八吃，伊副猴急相让人又好气又好笑，像煞我虐待伊，没撥伊吃过饱饭一样。
小仓鼠个吃相真個是难看：一根老长个油麦菜，从头吃到底、当中横里一眼也勿停個，小小個頭随牢仔嘴巴个动作也勒勿断个点發一發，小貴頭哪能就勿吃力個呢？我从来嘸没看到过油麦菜撥伊咬断再吃个。
有一日天，我突发奇想，拿仔根卷面个面条凑到伊嘴巴边頭，伊居然拿小脚爪抬起來，抓牢面条就往嘴巴里向送，嘿，见证奇迹个辰光到了：一根干個面条晃晃悠悠、既勿落地、也勿碎脫，就进了伊个肚皮里。葛两根呢？小鬼頭照单全收、一道吃进去，象煞勒搭我表明：面条落地、本吃货就勿算有本事個哦。
小仓鼠个精彩表演拿屋裏人惹得邪氣開心，成为屋裏来人客之后个经典保留节目，我突然曉得了：养宠物图啥呢？勿就是图伊个陪伴搭仔乐趣嘛！
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
