作者：沈嘉禄
沪语改写、讲述：汪婷
整合：金和平
文字、语音审核：丁迪蒙
编辑：王乙其
往期回顾：
等郑晓风想到应该下去看看清爽个辰光，车门已经关牢了，车厢慢慢叫开始启动，然后平稳加速。郑晓风发觉自家把牢栏杆个手是湿溚溚个，心脏咚咚咚跳得邪气结棍。伊后悔自家反应忒慢了，刚刚为啥勿下去呢？我到底是要到阿里一站下车呢？伊骂自家是木瓜、笨蛋、憨大，然后又是憨大、笨蛋、木瓜，到了下一站伊马上冲出车厢，调乘反方向个一列地铁返回莲花路站。
车站已经恢复了平静，贼骨头呒没了，埃个中年男人也勿看见了，刚刚围追堵截个地方，呒没留下来一丝痕迹，连一根头发也呒没留下来。乘客像水一样勒流动，电子显示屏浪显示个是下一班地铁到站个辰光。郑晓风走到一家报摊前头，买了张夜报，然后伊问卖报纸个人是勿是看到捉牢一个贼骨头，报摊浪个中年妇女讲，搿搭呒没小偷，“刚刚我看到小偷打人了。”郑晓风提醒伊。中年妇女朝立勒夜报摊头勿远地方个安保歪歪嘴巴，讲：伊拉勒搿搭，搿个事体应该伊拉管。
就勒搿个辰光，郑晓风个目光搭迎面走过来个李老师碰勒一道，伊刚刚从一节车厢里走出来，走得邪气快。不过啥人也呒没看错，是郑晓风，是李老师。郑晓风首先想到个是李老师会哪能想啊？我呒没理由出现勒此地，我屋里并勿勒勒搿搭，葛末我哪能会出现勒此地呢？郑晓风自家也回答勿出。但是，李老师没搿能问伊，伊只是嘴巴动了一记，好像也寻勿到合适个词。郑晓风叫了李老师一声，但是声音小得根本就听勿见，只好头一低跑开了。
刚刚跑出地铁站口，伊又后悔了，先头贼骨头打人个事体搭我又呒没关系个，我为啥跑啊？我乘地铁是因为我……我可以跟老师讲是去走亲眷，啥人家呒没亲眷呢？
搿日天，回到屋里向已经老晏了，郑晓风潦潦草做好回家作业，想接下去写小说，一支圆珠笔勒纸头浪向划勒了半天，一个字也写勿出来。伊第一趟发觉自家个想象力是邪气荒凉个。
还算好，李老师并呒没提起地铁里个事体，搿多少拨了郑晓风一眼宽慰搭仔勇气，接下去写伐。
作者：沈嘉禄
讲述：汪婷
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
