来源：名家散文
作者：席慕蓉
沪语改写：俞镝
朗读：俞颖
文字、语音审核：丁迪蒙
编辑：王乙其
今朝夜到勒灯光下头，我终于觉著有种中年个心情了。搿是种既复杂又单纯，既悲伤又欢喜，既无奈又无怨个心情。搿是种我一直勿完全晓得个心情。
十几年前头，轮船停靠勒旅程个最后一站，我勒法国马赛港上岸个辰光，世界曾经以邪气光辉灿烂个样子来迎接我，一个艺术系个小小毕业生，一个年轻个东方女子，帶仔颗热烈如朝圣者个心，勒博物馆搭仔美术馆个长廊里，拿画一张一张看过去，每只角落侪勿肯放过。冷飕飕个半夜，勒布鲁塞尔市中心租来个简陋画室里，埋头画图个我，像煞有种烈士个心情。挨个辰光，我身边充满各种各样美丽个物事，每种侪有勿同个光彩，每种我侪欢喜，侪想要，而且一定侪要得到。
十几年过去了，就勒搿个夏天，我去了趟纽约搭芝加哥，勒纽约个大都会博物馆里，我却有了种勿同个心情。墙浪挂勒海个画我仍舊欢喜，但是我已经学会用另一种方法来看了。我晓得博物馆里有惊人个珍藏，但是我每趟去，侪只看小小个一只区域。我好用几个钟头去欣赏莫奈个一幅灰紫色个睡莲，勒我欢喜个画前頭，我变得安静、从容，勿再像十几年之前個急切，匆忙，勒博物馆里上上下下奔来奔去，希望能拿每样物事侪看好，希望勿漏脫每只细节，每只角落。
十几年个生活，讓我有了勿同，我晓得，世界浪个美是无限个，终我一生，我所能得到个只是有限中个有限，就只有一眼眼而已。既然搿能，为啥勿好好叫享受眼门前所好看到个搿一点有限个美呢？
我当然晓得，勒另外幢楼里向，或者就勒另外间展览室里，甚至就勒一扇门個外头，有我还呒没看到个珍奇搭仔美丽，或许勒我一举足，一跨步，一开门之间就可以看到。
但是我也深深个明白，就勒我急急忙忙转身个辰光，伊张原来已经勒我眼門前，原来已经安静个呈现勒我眼門前个一幅画，原来已经勒墙浪等了我介許多年，已经等到我个来临了，原来巳经马上进入我个心里，成为我今后个安慰搭仔幸福个伊份美丽，会勒我转身个一刹那，撥我永远个抛勒身后头了。
因此，我就立勒海。或许是勒搿幅灰紫色個、小小个睡莲前头，或许是勒另外个博物馆里，勒挨个神奇个月夜，无邪个狮子勒轻轻叫個闻睡夢中个吉普赛人个画幅前头，我静静叫個立勒海。勒我能得到个有限之中，我甘心做一个无限专注、热情个观众。
中年看画，竟然看出了一种安静搭仔自家满足个心情来。
但是，“看画”到底仍舊是种可有可无个收获，而勒人生个搿条长路浪，走到中途个我，错过个，又岂是珍奇搭仔美丽呢？
勒人生个长路浪，总歸会碰到分歧个一点，无论我选择阿里个方向，总歸会有个方向搭我相反，讓我后悔。
此刻，勒我搿条路浪向，和风丽日，满眼苍翠；但我相信，当初假使选择了另外个方向，也必然会有同样个阳光，同样个鸟语花香。只不過就因为勒伊个分歧点浪，我只好选一条撥安排好个路。所以，每次回顾，就侪会有种莫名个难过。勒我個心里，挨条我呒没能走上去个小径每次就侪勒挨面，勒模糊个颜色里向，朝我展露一种模模糊糊个忧伤。
朗读：俞颖
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
