作者：沈嘉禄
沪语改写、讲述：李群
整合：金和平
文字、语音审核：丁迪蒙
编辑：王乙其
往期回顾：
李老师从抽斗里翻出来一只信封，又从里向抽出来一张贺卡。郑晓风有点勿好意思起来，坐勒海扭了扭屁股。
李老师满面孔个真诚，对伊讲：“侬看，侬个贺卡呶，老师一直珍藏勒海。是个呀，老师碰到了一桩勿开心个事体，经济浪有困难了，同学侪来帮老师一把。照理讲，老师是勿好收学生任何物事个。但是，我要讲‘但是’两个字！勒今朝人情淡薄个社会环境中，我直接拒绝学生子个好意，来三伐？要是迭能做，我就等于残酷个剥夺了学生表达真挚情感个权利，搿对伊拉个成长是勿利个。所以我先收下来了，我先保管勒海。我想通过搿桩事体，拨大家一种情感个体验：做一个有爱心个人，交关幸福。当然咾，我是会得回报我个学生个。而侬迭张贺卡，同样是一种爱心个表达。从某种意义浪讲，比钞票更加有价值。因为贺卡是侬亲手画，亲手做个，所以老师一直摆勒搿搭，只要我看到搿张贺卡，心里就会拨一种温暖个情感包围起来。”伊做了只拿物事包起来个手势，有点像郑晓风投篮辰光，总归要先拿球勒手里转转顺手个一只习惯动作。
郑晓风看牢仔李老师，伊呒没想到班主任对搿桩事体个认识会得介深刻，有交关地方自家真个也呒没想到。毕竟是有得多年教龄个一级老师啊，原来伊想得介深入。
“侬勒听我讲伐？喂，覅走神哦。而侬呢，大概为自家呒没钞票帮助老师而一直觉着难为情，侬为此有了自卑感，失落感，对伐？千万勿要哦！哎，侬覅为自家辩解，老师还看勿透学生子啊？覅有迭能个想法。我已经晓得了，㑚屋里个经济状况并勿好，爷娘侪身体勿好，收入也勿高，侬送张贺卡拨我，已经是力所能及了，侬个付出已经老多了，搿正是我为此感动个地方。阿拉覅去告伊眼家境老好个同学比，伊拉个零用钿有个比老师个工钿还要多唻，伊拉上下课还有私家车接送个，但是，伊拉勿会得送张自家画个贺卡，侬懂伐？侬是老优秀个学生哎。”
李老师停了一停，又慢慢叫接下去讲：“但是，我又要讲‘但是’两个字了，侬呒没认识到自家个价值，侬个情绪有点问题，已经影响到侬个学习了。数理化，还有语文、外语，每趟测验，成绩侪勒倒退，要查侬个成绩，现在只好从最后一页开始，朝前头翻过来了。”
作者：沈嘉禄
讲述：李群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
