作者：沈嘉禄
沪语改写、讲述：顾敏
文字、语音审核：丁迪蒙
编辑：王乙其
上海人喜欢吃酱爆螺蛳，顺带便也喜欢了本帮风味个糟田螺。中年以上个朋友侪晓得，从前江南一带个水稻田里是可以放养河鲫鱼个，为了让河鲫鱼活得自在，农民还勒里向放养田螺，有辰光鸭子啊、白乌龟啦，也会到水稻田里来寻吃食。田螺繁殖邪气快，也交关聪明，总归能够迓过鱼搭仔鸭子，不过，伊到底还是勿够聪明，因为迓勿脱人。过了立夏，田螺长肥了，农民就会得摸眼上来，葱姜爆香，酱油加糖，烧一大盘咪老酒。稻田里向个田螺肉头肥、厚，壳薄，味道也好。现在个田螺是塘里向养大个，有农民专门靠养迭个致富。
勒我小辰光，老家附近有两爿点心店，糟田螺相当出名。一家是大世界下头个五芳斋，另一家勒柳林路金陵路个角子浪向，全称叫“金陵中路饮食店”，简称“金中”。我常庄看到“金中”个师傅拿柏油桶改装个炉子搬到人行道浪，架起一只老老大个铁镬子烧田螺，靠墙个伊面有几个女学徒勒嘻嘻哈哈剪田螺尾巴。
田螺虽然勿登大雅之堂，烹饪浪倒是马虎勿得个。师傅讲，伊拉选用个是安徽屯溪出产个龙眼田螺，壳薄肉肥，味道好。采购到货，先勒清水缸里养个两天，养个辰光要用竹匾盖牢水缸，制造漆黑一片个混沌感，迭能呢，田螺再肯拿泥沙吐清爽。剪脱屁股之后汏清爽，倒到镬子里，加茴香、桂皮、酱油、糖、姜块等佐料，槽头肉当然是勿好少脱个，切两大块厾进去。到大功告成之前，再拿陈年香捣成糊状慢慢叫倒进去，烧开之后可以看到浮勒表面个酒糟。
然后呢，师傅拿炉膛内个火头GE小，一边焐好，一边叫卖。马路浪向人来人往，师傅烧槽田螺个细节，再带一眼幽默夸张个表情，烘托起都市个流金岁月。
槽头肉个作用可以增加田螺壳个亮色，丰富田螺肉个味道，并且使得汤面泛一层宝贵个油花，搿对劳动人民来讲是邪气具有吸引力个。槽头肉浮勒汤面，虽然经汤色浸染，肤色勿再白皙，但按照火候个指令，兢兢业业个拿油脂析出，去润泽一只只田螺。是个呀，伊拉侪是来自乡间，或许还是同乡，不过勒彼此个生命历程当中却是鸡犬之声相闻，老死不相往来。现在，为了搭阿拉奉献世俗个美味，伊拉赴汤蹈火，相濡以沫。特别是貌不惊人个槽头肉，真个有点蜡炬成灰泪始干个毅然决然了。
勒城隍庙里个与丰楼，田螺鲜香肥腴，壳薄油亮，红汤加了干辣椒，几块洋钿就可以买一大碗，浓妆艳抹个美眉翘起兰花节头，用牙签挑出田螺肉摆了搨成功紫红色个嘴唇边里，用一句俗得勿能再俗个闲话来形容就是“一道亮丽个风景线”。
我曾经多次试过勒家里烹制糟田螺，但风味总归勿如店里向出品个美妙，主要是肉质不够糯软。原因邪气简单，店里向用大铁镬子煮，火到猪头烂。而自己屋里用是个小砂锅，火候差了勿是一眼眼啊。后来我用高压锅试过，味道也是差勿多。
吃糟田螺可以享受大块吃肉、大碗喝酒个快感。伊是粗俗个食物，勒碗里向堆起来，用“两双半”抓起来吃，吃得满手油腻，满口酱汁也勿要紧。田螺肉从壳里向嘬出来，让人有略施小计而擒获猎物个成就感，而当猎物勒舌头浪打滚个一刹那，又可以让牙齿充分领受螺肉个恰当弹性，感觉肥腴柔滑个鲜美口感。
暮秋时节，我约了几个朋友到青浦朱家角游玩，勒北面一条街浪个一爿饭店吃到一盆稻草扎肉配田螺塞肉。扎肉是本帮红烧肉个乡土版，皮要厚，膘要足，三瘦三肥层次分明，块头切得大，迭能再显得派头十足，而且一定要用新割个稻草来扎，烧个辰光再能够散发谷物个香气。相比之下，田螺塞肉就显得有点闺房气了。厨师拿田螺摆了水里汆一汆，挑出螺肉，搭猪肉一道斩碎，经过去腥处理，再填到田螺壳里，封口过油，用小火红烧，浓油赤酱个本帮味道，最能收服人心。
田螺塞肉搿道土菜是有故事个。话说勒旧时代，有个长期念佛茹素个老太太，因病卧床已经交关年数了，一日天觉着自家快要走了，突然想起来要吃田螺塞肉。搿真是为难新妇了，勿让阿婆吃，心里向过意勿去，让阿婆吃么，等于破了戒，阿婆功亏一篑。想了半日天，终于想出一个好办法，伊拿香菇泡发后切成末，又拿无锡清水油面筋泡软扯碎，用搿两种净素食材拌成馅子，塞进汏清爽个田螺空壳里，加酱油白糖，小火慢笃，起锅后多浇麻油。勿是荤腥，胜似肉味，阿婆吃了邪气欣慰。搿只故事赞美了有变通能力个贤惠个新妇，老太太一身个修持也得以保全，结局堪称完美。
觥筹交错间，我讲了迭个故事，想看看同桌朋友个反应。果然，两位小姐姐认为：人生道路接近终点，满足一下卑微个心愿有啥勿可以？伊个新妇好像是勒行孝道，其实是一个“存天理，灭人欲”个卫道士。
哈哈，现在个小青年有思想，有个性！
作者：沈嘉禄
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
