作者：孙犁
沪语改写：潘庆纽
讲述：知足常乐
审核、指导：丁迪蒙
编辑：王乙其
前兩年，我瞎写过两句诗：“梦中每迷还乡路，愈知晚途念桑梓”。搿两日又连牢仔做梦：想要轉去，请勿出假，要么是路忒远。有辰光想起来要走，出门辰光又总歸是夜快頭了，寻勿着路，又问勿着人。要么是落雨天，路浪向烂泥一塌糊涂。脚浪向个鞋子呢，一歇忒大一歇忒小，搿鞋子嘛，有辰光横勒海着，有辰光又著倒脫了，还有辰光呢要拿根绳子縛牢仔……定歸是要拿我从梦里向急醒。
其实，文革之后，老家我已经轉去过两趟了，搿兩年倒是再也没去过，也勿想再去了。一是屋里已经没啥亲人，回转去连得帮我烧饭个人也呒没。二是村里向认得我个人越来越少了，中年朝下侪勿认得个，碰着也不过点点头，呒啥意思了。
前两趟转去，一趟是陪伊歇辰光脱我相爱个人，另外一趟是已经脱伊勿要好了。头一趟，阿拉勒村庄周围走了几圈，勒田頭路邊坐坐，也採过蘑菇，也拾过柴火。第二趟我一家头转去，看到亲人个坟墩头，家乡荒废个样子，心里交关难过，呒没几日就回转来了。
现在，牵挂故乡个梦又浓起来了，是啥道理呢？我实在讲勿清爽。
故乡，我十二岁就离开了。但是有辰光出去，有辰光轉来，老家还是我一只固定个窠，是游子个归宿。中年之后，勒外地个日脚多，回老家个日脚少，再加上经历了打仗咾啥，走到啥地方也讲勿定。到了晚年，勿管我哪能讲哪能想，回转去住是完全勿可能个了。
是个呀，从我搿一辈開始，阿拉一家门，就算流落异乡了。
人对故乡个感情是勿容易割断个，反而会得越来越深个堆积勒勒意识深处，变成功勿断出现个梦境。故乡个河浜已经干脱了，不过风沙还是老熟悉个。房顶浪向个烟囱管里已经呒没烟了，灶头浪烧饭个人也老早就勿勒海了。老房子个屋顶浪草长得老老高，一副破败个样子。村里人走过，侪会得指老房子讲：搿家人家侪到外头去了，勿轉来了。
我越来越思念、也越来越尊重我个故乡。前一腔我写信拨一個青年作家：写文章、得罪人是免勿了个。但我实在勿想因为写文章而得罪我个乡亲。假使碰着搿种情节，侬要提醒我個哦！
最近有朋友到阿拉村里去过，搭我个老房子拍了几张照片，勒村支部书记屋里吃了顿饺子。关于老房子，支部书记脱伊讲：“我前几年写信问过伊，伊讲勿拆也勿卖，随便伊去，倒脫再讲。看样子伊对搿几间破房子还是蛮有感情个。”
朋友搭我讲，现在村里向侪是新房子，村外头侪是果树林。我搿几间破房子夹勒里向，实在是忒难看了。
我只好自我解嘲：葛么总归也是只标志咾，证明我也是搿搭个人呀。有人走过伊面，看到破房子就会得想起我，勿然嘛就真个拿我忘记脱唻。
是个呀，新个物事勒海起来，老个物事总归会得消失个。
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
