作者：沈嘉禄
沪语改写、讲述：牛美华
文字、语音审核：丁迪蒙
编辑：王乙其
朋友邀请到朝鲜平壤高丽馆吃饭，收到信息之後我居然觉着喜出望外。搿家饭店我勒十多年前头去过一趟，半为尝鲜，半为猎奇，最终收到超预期个体验。也一直想写篇文章拨读者分享，倒是一拖再拖，最后竟然勿晓得从啥地方开始写了，我想，主要原因大概还是掌握个信息勿够充分。经过搿十年个风风雨雨，餐饮业承受老大个压力，搿家居然还勒海，真是勿容易呀！
我特为着仔件新T恤赴宴，位于古北路、黄金城道街角个平壤高丽馆外貌没变，再一次看到朝鲜姑娘还是觉着邪氣亲切個。餐厅格局搭装修像煞也没变，一长條弧形大窗面对开阔个街景，只是餐桌摆放更加密集点了，服务员穿插上菜会更加辛苦眼。暮色一眼眼降临，靠牢窗門座位大多是散客预订好个，看来生意勿错，心里蛮开心個。
人参茶雅香馥郁，包房里向有电子琴搭勒上海已经拨淘汰个卡拉OK设备。菜品还是强调朝鲜风味，勿管泡菜、生菜包烧肉、碳烤松茸，还是烤四种肉、红烧明太鱼以及类似上海什锦砂锅一样个神仙锅，做得侪蛮地道个，搭我勒首尔、济州岛吃过个韩国料理比，平壤高丽馆个出品更加精细，味道也更加亲切。伊拉还有种米肠，风格搭东北血肠是一样画风，一只味道。生拌牛肉丝鲜嫩适口，告鞑靼牛肉比起来更加对我胃口。服务员介绍，以前伊拉个食材侪从朝鲜运来个，现在也就近采购中国食材了。
高丽馆吸引人个地方，包括就餐过程当中会有朝鲜歌舞表演，从端盘子个服务员变身为演员，也就勒弹指间，拨人一种魔幻感。大堂表演一结束，七八个姑娘就进到了我伲个包房。伊拉个中文主要是勒上海学个，虽然勿大流利，但表情是真诚、热烈個，语气搭平壤电视台新闻节目播音员一样。《阿里郞》《桔梗谣》《卖花姑娘》《中国人民志愿军军歌》……还有电影《摘苹果的时候》主题歌咾啥，上世纪八十年代个老歌也张口就来。旋律、歌词、还有手势，激起了我伲个共同记忆，眼淚水一记头会出來。伊拉肯定勿晓得，中学时代我学拉小提琴，抖抖索索个第一只曲子就是《卖花姑娘》主题曲。
搿眼姑娘勿单嗓子好，表情生动，顺帶便还拿伴奏生活也包圆了，电子琴、电吉他、小提琴、萨克斯、木琴轮番上，朝鲜个伽倻琴白相起来更加劲爆。伊拉着勿束腰个高丽裙，跳起来像鲜花勒风中绽放，举手抬足之间有优雅含蓄个东方美学勒裏向。突然冲进来三個着牛仔衣个姑娘，表演节奏邪气快个踢踏舞，简直要拿地板也蹬穿了，真是勿比《大河之舞》差呀。收尾辰光，一个姑娘还来了只原地前空翻，我倒是吓了一大跳。
舒萌兄是此地常客，姑娘侪蛮信任个，葛末我就蹭了搿股亲热劲搭伊拉展开友好交流了。来搿搭吃饭个其实侪老想晓得生活勒别地方个景象伐。
作者：沈嘉禄
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
