来源：横马路 竖马路
作者：陆勇
沪语改写、讲述：牛美华
文字、语音审核：丁迪蒙
编辑：王乙其
往期回顾：小洋房个主人（上）
弄堂
有一趟，勒路浪碰着同学，聊发聊发就讲到了卢培生。“伊有常时会得来看看我个爷."“伊还是一家头住勒老地方？”我搭同学侪已经结婚养好小囡了。“老地方，还是一个人。”“呒结婚？““女朋友有过个，但最后侪没结成功。”
“为啥？”听我爷讲，伊勿同意女个拿户口迁到伊个房子里。脾气老怪个，后来我娘也勿帮伊介绍了。”同学问，要勿要去看看伊。我犹豫了：“介许多年数过去了，我也勿是个好学生。勿好意思个。”朝后，又是廿几年。画图个辰光难板会得想起卢培生，想到伊个花园洋房，伊个黑铸铁条围勒海个小阳台，伊间书房搭仔老阔老大个写字台。想起伊为我改画稿个情景。
好几年前，有微信了。中学同学又联系上了，自然就有得聚会。我又碰到伊个同学，谈往事交关有兴味，自然又搭伊讲到了卢培生。“伊还是一家头住勒老房子里，我有伊微信个。”同学讲。
搿趟我终于提出，一道去望望伊。我同学马上微信联系伊，老快个讲，伊勒勒屋里。也勿晓得出于啥心理，我对同学讲：“还是勿要提到以前跟伊学画个事体，就讲我伲是朋友，我对老洋房有兴趣，看看而已。”
我伲还是从小夹弄穿过去。周围原来个小平房造高层了，低矮个小工厂改成功了创意园。到门口，我还是有眼小激动个。勿晓得伊会勿会认得出我。
铁门开了，是个头发花白，但头浪梳来老整齐个老人，面色红润，着一身米色个运动衫。“欢迎，欢迎。”语调缓慢稳重，像煞从遥远个地方飘过来。“打扰卢先生了。”我听出自家个闲话有眼勿自然。
我伲先勒花园里看看。我记得搭隔壁花园隔开个是戗篱笆，现在是堵高墙了。我伲又看看上下房间，阳光透过宽大个窗门，拿地板照得来光滑明亮。家生是柚木个，邪气有年代感，但没啥破损，摆个位子也觉着没啥变动。书房里个伊只书架，还有我曾经翻阅过个《美术》杂志。一切还是老样子，一阵恍惚，错觉里像煞昨日还来过。
“搿房子是1932年造个，原来个主人是个兆丰洋行买办。我个爷用廿根黄金顶下来个。”我伲到楼下个客厅沙发浪坐下来。卢端来咖啡，房间里一记头咖啡香弥漫开来了。“搿搭好吃香烟，其他房间侪勿可以。搿是我个爷定个规矩。”
“老多人家个洋房侪成了七十二家房客，侬还是一家头住。”我讲。
“也有，也有。”卢讲。我伲点好香烟，我看到伊个额骨头浪有老深个皱纹，胖了，动作也慢了。要是勒路浪碰着，随便哪能认勿出个。当然咾，我也勿是少年了，面孔浪也有皱纹了。伊勿可能认得出我个。搿就是岁月。
“我一直没弄清爽，哪能介许多年数，侬就是一家头住。”同学问伊。
卢培生居住个小洋房
“现在讲讲侪无所谓了。”卢培生弹弹烟灰，淡淡个笑个笑。“54年，我个阿伯，我，阿姐到香港去个申请批下来了。我姆妈搭我阿弟是52年去个。伊个辰光我十四岁。临走个伊日天，我阿伯拿我叫到搿间客厅，拍拍我个肩胛，搭我讲，要是全家侪走脱了，搿搭个房子哪能办，托佣人看管，伊勿放心。所以叫我留下来，住勒搿搭，看牢房子。我爷讲，要是我勿肯留下来，葛就一道走。”
“侬只有十四岁哎。”我四十年前头个好奇心又拨勾出来了。“佣人还勒海，是个老忠厚个老妈妈，伊照顾我。”
“我爷做事体勿会错个。我当时点点头，就留下来了。我爷讲，过段辰光伊会得回来个。后来个形势大家侪晓得个，伊勿可能回来了。自从我爷走了之后，我就再也没看到过伊。伊是1968年去世个。我1984年再到香港去，看到了姆妈。伊劝我留勒香港，我想想，还是回来了。继续看房子。到现在，房子还勒海，一切侪蛮好个，连小矮凳也没少一只。”
六十年个尘影往事，就搿能简单个讲完了。没寂寞，没孤独，也没无奈，只有自豪搭仔坦然。
卢培生拿得来一张照片：“我个阿伯搭我。”
我仔仔细细看，照片浪伊个爷还老年轻，梳个是伊个辰光老讲究个反包发型，西装领带。相貌平和，倒是有一双深邃个眼睛。男男头圆嘟嘟个面孔，撅仔只天真个小嘴巴。
我个心里一阵酸楚。搿是一个哪能介个爷，对一个十四岁弱小稚嫩个小囡，寄予了搿能沉重个希望，搿是无奈，还是一种天然个信任；搿又是哪能样子一个小囡，因为点了点头，就孤守一生，无怨无悔。父与子，先是天各一方，后又阴阳相隔，却是始终心灵相通，相依相爱。勒搿寂静个洋房里，没话音，没身影，但有温馨，有难舍难分个骨肉之情。一年又一年，从勿间断。搿是我伲每个人内心深处永存个生命感应伐。
出门告别，我抬头望望天，蓝天白云，几只小鸟从屋头顶老欢快个飞过去，初春阳光下头个小洋房，泛出了暖融融个米黄颜色。
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
