作者：辛旭光
沪语改写、播讲：陈美群（十三）、徐慧丽（十四）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（十三）
眼睛一眨小人就已经过百日了，尽管儿子没吃过一口奶，姆妈也一直嘴巴对嘴巴个喂粥，没饿着过一顿。有人搀伊个小手就会得格格格个笑。当地人看搿个上海女人，一家头拿小人养活，有眼作孽，有眼眼痒。就劝姆妈拿小人送拨伊拉。想领养个当地老乡陆陆续续勿断。小人是姆妈个手心肉，无论如何勿舍得个。最难个关已经过脱了。是福挡勿牢，是祸躲勿过。伊咬紧牙齿也要拿朱家个种带回上海。
百日埃日天，瞎子接生婆有人搀过来，姆妈拿小人肉滚滚个手，摆勒瞎子接生婆手里向，迭双手绝绝细还夹䩍势白，手腕高头露出一只碧绿个镯头。姆妈一呆，好像记得墨墨黑个夜里帮一端米汤水个手，接生婆拿小人个手凑到面孔前头，眼乌珠一歇泛白一歇发黑，大概是白内障，可以看到点光。
接生婆拉开嘴巴笑了，掀开一眼头巾，伊个鹅蛋脸居然显得蛮年轻，看上去还勿到50岁。但是半只面孔从额骨头到嘴巴个肌肉，好像有眼吊，看起来蛮勿自然个。
啧啧，接生婆香了香小人个手，又凑到姆妈面前讲“㑚儿子额骨头饱满、长得老好个，必过侬要到庙里去，拨伊到庙里寄名，再可以顺顺利利养大，迭个小顽头生勒乱世，大难勿死必定有大出息个。”伊个舟山闲话里夹勒上海宁波腔，姆妈听得明明白白，连连答应。
小阿妹，侬住勒上海啥个地方啊？接生婆显得老亲热个。“城隍庙”。“噢，葛侬个两只大头是啥地方来个？”伊问。
“我个同乡拨我个，伊勒华格臬路杜公馆做事体。”姆妈马上从布鞋里寻出来搿两块银洋钿。
接生婆接过来摆勒眼皮底下，看了又看，摸了搿两块银洋钿有帆船图案个一面，用夹䩍势白个手节头停勒高头个三只飞鸟图案浪，好像勒确认点啥。
（十四）
“噢，杜先生——伊哪能啦？”问。“杜老板逃到香港去了。”回答。姆妈有啥讲啥，接生婆也勿再多问了，伊摸摸自家个头发，半只面孔浪一道上下贯通个伤疤隐隐叫露出来，伊眼睛个瞎脱，一定搭伤疤有关系个。姆妈勿敢问，但是心里有数，迭个接生婆勿简单个，一定勒上海滩混过。勒外地碰着一个混过上海滩个女个，姆妈自然搭伊有了种亲近个感觉。
瞎眼接生婆拿头巾放下来，关照姆妈：“两块银洋钿好好叫囥起来。回上海个船，我会得帮侬寻个。”
现在，吃、住勉强过得去了，关键是要讨到回上海个路费。眼看已经过了阳历新年，马上就要过年唻，姆妈心里急啊，又勿好搭人家多讲。瞎眼接生婆过一个号头左右，总归会得“路过”一次，姆妈个生活好像有眼好起来了，有辰光，夜里还会得有好心人勿声勿响送得来几斤米搭仔咸菜。
日脚一日一日熬过去了，姆妈讨来个山芋咾啥积少成多，歇勿歇还有人到伊屋里向买眼去，正好换成铜钿。伊再拿零散铜钿交拨开店个老阿娘，请伊调成银洋钿。
姆妈暗底里打听乘走私船回上海个行情，听说一只位子至少要廿块大洋，葛末两个人至少要四十块银洋钿。每个号头要讨到银洋钿十块，迭个简直是只天文数字。
伊勒厂里翻班纺纱，一个号头个工钿也只有五块大洋。姆妈熬勿牢，拿出陈同乡送个两只“船洋”来仔细看，伊个品相特别好，锃锃亮个，看来还没到市面浪用过。
姆妈横看竖看，银洋钿一面是孙中山头像，迭个一般叫“孙小头”，另外一面是两只帆船，所以也叫“船洋”。比较特别个是，天浪向有三只鸟，勒市面浪个“船洋”里向，有飞鸟个银洋钿倒是邪气少见个。搿是因为人家侪没看到过，所以就侪勿肯要了？
作者：辛旭光
播讲：陈美群（十三）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
