作者：辛旭光
沪语改写、播讲：郭咏梅（二十五）、金和平（二十六）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（二十五）
朱舟山总算明白了，为啥自家姆妈，童工出身，工作勤奋，好几趟做了厂里个劳动模范，但就是呒没入党，也呒没得到提拔。
南通乡下有过消息，陈同乡40年之后回来探亲过一趟，伊勒台湾成了家。伊回乡还打听过船浪向伊个大肚皮女人，“勿晓得养个是儿子还是囡儿”。
朱舟山想，自家脚后跟个老茧也是真个，迭个就是生勒羊棚间稻草堆里个最好个证明。两只“船洋”是真个，现在鞋子交上去了，钞票还是要还拨人家个。至于陈同乡为啥要送银洋钿拨姆妈，迭个两块银洋钿是啥个来历，问了陈同乡就晓得了。
好勿容易通过南通老家个人，讨来了陈同乡个电话，相互加了微信。朱舟山激动个搭屏幕里向个陈老伯伯问好。果然是只胖乎乎个面孔，面架子浪两块肌肉厚扑扑个，一副南通乡下人个面相，陈老伯伯也是邪气个激动：“噢，噢噢，，侬就是大肚皮女人个小囡啊，---还是个儿子啊。”
陈老伯熬勿牢感叹：“真勿容易，侬姆妈勒船浪走路侪摇摇晃晃，后来逃难到舟山了伐，哪能活下来个？”
“我养勒舟山个羊棚间里向，所以就叫朱舟山。陈伯伯，侬还认得迭个两块银洋钿伐？侬囥勒侬个鞋子里向个？”朱舟山激动起来了，伊拿两块银洋钿摆勒镜头面前，“我要还拨侬个。”
（二十六）
老人横看竖看，看仔半半六十日，“喔唷，㑚还囥勒海啊？覅去讲伊了，我勒船浪拨捉壮丁，鞋子里囥了两块大洋，想想会拨伊拉搜脱个，勿如送拨㑚姆妈，伊要养小囡唻。船拨人家绑架了，勿晓得会得落到啥个下场。作孽啊，㑚姆妈还勒海伐？”
我姆妈已经过世几年了。陈伯伯，谢谢侬个救命铜钿，迭个两块银洋钿我要当面还拨侬个，侬是阿拉屋里个恩人呀！
勿必个勿必个，当年我勒杜公馆拉黄包车，49年国军败退了，杜先生一家门要到香港去，我也失业了，杜太太拨了我几块遣散铜钿，也是救急勿救命个。
朱舟山终于搞清爽两块银洋钿个出处了，也晓得陈老伯明年春节回来探亲，就约好陈老伯路过上海，请伊到城隍庙湖心亭吃茶。朱舟山还准备仔交关礼品。
春节前头，南通乡下突然来通知。“老兵陈××先生已于年前病逝，享年95岁，根据老兵个遗嘱，落叶归根，当地台办将协助家属，在清明前举行奉安仪式。”
世事难料，朱舟山懊恼勿及，只好带着仔二块银洋钿到南通去参加“老兵回家”奉安仪式，一只青花瓷罐带仔陈伯伯个灵魂回到了故乡。
朱舟山拿二块银洋钿交拨陈家个家属，伊拉坚决勿要，讲老人送出个物事是勿好拿回来个。倒是勒陈老伯留下来个遗书里，掯出来了一封信，署名“上海 朱舟山贤侄启”。
作者：辛旭光
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
