作者：申涛
沪语改写、讲述：边秦翌
文字、语音审核：丁迪蒙
编辑：王乙其
记得交关年之前，我有一个外地朋友打电话来问：“我勒勒上海买了瓶辣酱油，哪能一眼勿辣，一眼也勿咸个呢？”我讲：“照阿拉上海人个讲法，侬正宗是个洋盘了，辣酱油勿是辣油，也勿是酱油呀。”朋友讲：“葛么到底是啥个油呢？”我讲：“是辣酱油呀！”朋友回了一句：“侬等于呒没讲！”挂脱电话，我自家也笑起来了。
派派自家也是老上海了，从小就吃辣酱油，居然也讲勿清爽到底是啥个味道。哎，侬讲怪伐？越是讲勿清啥个味道，上海人越是欢喜吃，辣酱油就是搿种老老奇葩个油。
还有一桩事体也蛮发噱个。朋友个囡儿轧了个男朋友，是北方人，两个人勒勒上海荡马路，看到一家生煎馒头店，男朋友拉了小姑娘想进去，小姑娘讲：“慢慢叫、慢慢叫，让我看看清爽呀。”一面讲一面瞄了瞄店堂间，然后拖了男朋友就走。男朋友问伊，侬看啥物事啊？小姑娘回了一句：“生煎馒头居然呒没辣酱油来蘸蘸伊，搿有啥吃头啊！”侬讲讲看，辣酱油老嘎伐？呒没辣酱油，生煎馒头算老几啊！
老上海人侪是吃辣酱油长大个。我吃了几十年个辣酱油了，觉着伊个味道邪气特别。真个呶，辣酱油勿大辣，也勿大咸，搭仔黄豆、辣椒咾啥浑身勿搭界个。伊个颜色搭酱油有眼眼像，吃起来有眼酸尖尖，辣蓬蓬，香喷喷，甜滋滋，鲜嗒嗒，就算用“五味杂陈”搿句成语来形容，好像还是勿大准足。搿能介奇怪个调味品，上海人也想勿出叫啥个名字好，乃么就笼而统之，侪叫伊“辣酱油”了。
实际浪，辣酱油个前身叫“喼（jiē）汁”，是英国人偶然发明个。里向个配料老老奇怪个，有洋葱、芹菜、辣根、生姜、大蒜头、胡椒、大茴香、丁香、豆蔻咾啥，要有三十几种香料唻，还要经过发酵，小火加热，过滤，调色，工艺邪气复杂。搿种调料到了上海，经过改良，变成了中西合璧个调味品。
老底子，酱油、麻油、生发油侪好零拷个，但是从来呒没听到过有零拷个辣酱油。伊个辰光，上海个普通老百姓吃勿起红房子西餐，假使讲能够吃到炸猪排，再有眼辣酱油蘸蘸，就觉着老老上档次了。搿能介讲起来，勒勒高级调味品里向，辣酱油真个好算算了。
记得小辰光每趟吃炸猪排，一只大碟子摆猪排，还有一只小碟子摆勒旁边，大人老老当心个拿辣酱油瓶捧出来，对牢仔小碟子抖抖豁豁倒出来一眼眼酱汁，一面倒，一面还要关照几句：“少蘸点哦，老老贵个！”㑚看看叫，搿个辰光，到底炸猪排是老大，还是辣酱油是老大啊？照我看，要是呒没辣酱油，搿块猪排还好充充老大，辣酱油一来么，伊只好老老实实当当配角，跑跑龙套了。
记得有一趟带囡儿到小饭店去吃炸猪排，还千关照万关照伊回去勿要告诉姆妈哦！四十几年过去了，直到搿歇囡儿还记得搿桩事体，伊讲：“喔唷，伊个辰光吃眼搿种物事算大事体唻，勿得了唻！还勿好拨姆妈晓得。”想想看，辣酱油勒勒当时是多少吃香啊。
老上海人搭仔辣酱油好像蛮有眼默契个，一面是梅林厂闷仔头生产辣酱油，一面是上海人迓迓叫用辣酱油蘸蘸猪排、生煎、小笼、春卷、锅贴、馄饨咾啥，蛮乐惠个。反正，样样物事侪好蘸。老上海人一面吃，一面开心：“外地人勿会吃辣酱油个，蛮好蛮好。葛么阿拉上海人独吃，还勿会涨价，蛮好蛮好，邪气好唻。”
圣诞节的欢乐
-MERRY CHRISTMAS-
作者：申涛
讲述：边秦翌
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
