作者：沈嘉禄
沪语改写、讲述：牛美华
文字、语音审核：丁迪蒙
编辑：王乙其
往期回顾：“卖花姑娘”个后代（上 ）
伊拉侪从平壤某宾馆选拔外派到上海个，没结过婚。其中姓金个姑娘坦言講已有男朋友，虽然中国疫情已经结束，但伊拉还勿好回国探亲。我问“男朋友四年勿见，想伊伐？”姑娘坦荡回答：“伊是退伍军人。前段辰光北方发生洪灾，伊报名参加抢险，所以我要用出色个工作来支持伊。”搿句闲话讲得老规范个，一眼没毛病。
不过小金又讲：“勒上海工作结束之后，我老想回平壤去做观光旅游。再告诉客人，我伲国家马上要恢复入境旅游了，欢迎㑚到平壤去观光。”我马上接口：“葛么我伲到平壤去就好再看到侬啦？”小金笑眯眯、勿回答。
愿望勒没实现之前勿可轻言，难道搿勿也是我伲搿代人个经验教训？
小金还講，伊已经拿到国家分配个婚房了。伊还老自豪个讲：平壤今年马上要新建五万套新公房分配拨居民。平壤人口300万，一年五万套应该是邪气大个成就了。我伲频频点头、表示羡慕。
尚龙兄勒微信群里晓得伊日天正好是朝鲜国庆节，我伲马上立起来举杯祝伊拉节日快乐。我讲：“勒中国节假日加班是好拿三倍薪酬个。”姑娘儕馬上講：“我伲房子侪是国家拨个，教育、医疗也是免费个，我伲从来没想过要更加多個薪酬，只想为国家多作贡献。”
搿能个觉悟让人惭愧呀。
伊拉外滩没去过，东方明珠没去过，南京路搭新天地也没兜过，不过伊拉欢喜看中国个电视剧脱仔电影，比如《潜伏》《永不消失的电波》还有《三国演义》《水浒传》咾啥，看影视好提高中文水平。
既要端盘子，又要推销人参酒，还要表演歌舞，午市加晚市，每日天工作辰光想想也勿会短，但是伊拉勿曉得吃力，面孔浪一直有天真、单纯个笑容。
舒萌告诉我，有趟伊带几个日本朋友來吃饭，明显觉着伊拉个态度蠻冷淡個，包房里应该有个歌舞表演临时取消，也勿作解释。我问小金，搿是规定动作还是自选個？伊从侧面回答：“韩国人来，我伲也勿表演。伊拉假使勒大堂吃饭，我伲必须为所有顾客表演，但勿会朝伊拉笑。美国人更加勿受欢迎。”
高丽馆有规定，服务员表演辰光顾客勿好拍照。我伲个交流友好、愉快，小金勒得到领导同意之后允许我拍，但只好一张。没想到后头个节目更加精彩，我摒勿牢又拍了张，马上拨另一姑娘和颜悦色个制止了。我想搭伊拉合影也拨婉拒了，只好拿欢乐个场面镌刻勒记忆里了。
我用笨拙个文字记录搿个夜裏个印象，真诚祝朝鲜姑娘和搭鲜人民幸福（“행복”）。
作者：沈嘉禄
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
