作者：申欣雨
沪语改写：朱枫
讲述：潘慧芳
文字、语音审核：丁迪蒙
编辑：王乙其
还勒读小学辰光，看到里委干部勒弄堂个墙头浪刷出“解放妇女生产力，建设工业化城市”个标语。后首来，里弄里出现了交关辅助工厂企业个加工组搭小车间，居民们侪叫伊里弄生产组。
当时，我居住个弄堂里就有缝纫组、橡胶组、纱头组等。搿些生产组个工作场所一般侪勒石库门房子个客堂间，或者是简陋个老房子，或者是临时搭建个工棚。生产组个人员呢大都是妇女，做个生活侪是手工操作，技术难度勿大。埃歇横里，勒弄堂里常庄看到工厂里个工人师傅踏着黄鱼车上门送加工个原材料搭仔零配件，或验货收货，还指导生产组个加工装配等工作唻。
1968年，全国掀起上山下乡高潮，中学毕业生“一片红”，侪要到农村、边疆接受“再教育”。有残疾或生慢性毛病个，或者独养儿子、独养囡儿，再好作为“病休青年”或“待业青年”留勒上海。到了上世纪70年代初期，搿些青年侪陆续安排进了里弄生产组工作，因为每日天工资只有七八角洋钿，搭全民企业单位福利待遇相差忒大了，有些青年胸闷哦。生产组个大组长就用“7角8角，胸怀世界各国”等大道理教育大家，弄得搿些年轻人哭笑勿得。不过，对我伲搿排勒农村广阔天地“修地球”个知青来讲，对生产组还是蛮眼热个。
到了70年代中后期，大批知青返城后，大多数安排进里弄生产组。我从江西农村回上海后，虽然安排勒街道团委当干事，但关系挂勒街道个集体事业组，经常要到里弄生产组去劳动。曾经勒缝纫组踏缝纫机缝制水壶背带；勒房修队踏黄鱼车帮助运送五金、木料搭冷饮水咾啥。有一趟到铝环组里劳动，搿是专门装配钢宗锅子胶木环个，昏黄个灯光下头，我搭阿姨们围坐勒一道，“乒乒乓乓”勿停个用木榔头敲打，拿胶木装进去。从上班一直敲到下班，每日天侪重复搿种枯燥个劳动，敲得手臂把又酸又痛，抬勿起来。想想小组里个搿些阿姨，几年下来，每日天侪勒重复搿种敲打生活，真个勿容易。
后来，勿少里弄生产组进行扩建改造，添加机器设备，或配备运输货物个汽车，有个还造了三四层个大楼。一些颇具规模个生产组经过整合，开始升格为工厂，让交关年轻人喜出望外。因为有些青年已到了谈婚论嫁个年纪，有个就是因为工作单位是生产组，人家看勿上眼，寻勿着心仪个恋爱对象。当时，有个为邮电设备企业加工组装交换机的电信生产组，列入街道首批升格行列，名叫“宇宙电信厂”，挂牌埃个一日，员工们侪开心得勿得了。
里弄生产组虽然小到勿起眼，待遇也推板，但勒埃个特殊个年代里，伊为工厂企业拾遗补缺，也为大批青年提供了就业机会，为上海迭座工业化城市个建设，起到了特殊个历史作用。我伲搿代人对生产组个记忆是勿会忘记个。
讲述：潘慧芳
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
