文章来源：上观新闻
作者：孔曦
沪语改写：朱枫
诵读：潘慧芳
文字、语音审核：丁迪蒙
編輯：王乙其
三十八年前，我勒一只中专学堂里做老师。学堂远离市区，青年教师常庄住校。一日夜里，一帮子同事勒一道讲讲笑笑，讲起了谈朋友寻对象个事体。有位四十岁横里个姓凌个男老师老欣赏法律教研室一位年轻女教师，夸伊以后会是一个贤妻良母。有人让伊评论一下我，伊笑笑讲：“伊末，只有真正个男子汉再压得住。”伊歇辰光年纪轻、糊里糊涂勿懂事体，还当补药吃。多年以后回想迭个一幕，再明白过来，人家是勒批评我勿好相处。
仔细想想，真正个男子汉，勿就是要有担当末？确实，呒没担当的个人，黄牛肩胛，勿管男女，侪得勿到我个尊敬。
小辰光读《水浒传》，108将，能让我服帖个好汉也呒没几个，鲁智深算一个。伊拳打镇关西，拿金氏父女安置得妥妥贴贴，为此丢了提辖个饭碗头；伊痛打小霸王周通，为刘太公个囡儿解除逼婚个困扰。迭个两对父女搭伊素昧平生，路见勿平，伊挺身而出。伊擅离职守，从开封到沧州郊外，千里迢迢护送结拜兄弟林冲，得罪了高太尉，看管菜园子个差事也呒没了，但伊无怨无悔。而一身功夫个林冲，自家个老婆拨高衙内调戏，伊只敢阻拦，勿敢反击。自家拨高太尉陷害，也只敢克制忍耐，做缩头乌龟。拨发配前头，还写休书拨老婆，撇清干系。鲁智深勒野猪林救下了伊，伊转身就拿救命恩人个来历透露拨差人，害得鲁智深再次流落江湖。大家津津乐道个风雪山神庙复仇个夜里，只是伊拨逼得山穷水尽，实在呒没办法个本能反抗，并勿是出于正义。讲武艺，一百单八将里，鲁智深排名第十三位，林冲排勒第六位；论担当，二个人一个天浪，一个地浪。正义感爆棚个花和尚鲁智深，只是一个艺术形象。现实生活当中，有担当个人，我倒也见识过几位。
担当，就是担负起其他人避之不及个闲事或责任，愿意接烫手山芋，甚至愿意付出沉重个代价。担当，勿单单坚守正义，还包括为以前犯下个错误负责，直面遗憾乃至伤痛。担当，更要放下自家个执念，换位思考，包容亲友个过错。有担当个人是值得尊敬个；有担当的人更是应该珍惜个；有担当个人，绝对勿好辜负个。
每日早浪向搭九十三岁个老母亲例行通话，伊欢喜追忆往事，讲发讲发，就开始发各种牢骚：侬爷当年哪能待推板我……侬外公外婆哪能介重男轻女勿拨我读书……有辰光我熬勿牢顶伊几句：“老公是侬自家选个。”“投胎呒没投好。”
我自家，也曾勒心里各种抱怨。追根溯源，几乎，所有个勿如意侪能列出各种各样外因。往深里想，拿锅扣勒人家头浪，固然容易，却一眼用场也呒没个，反倒伤了亲情友情。勿如反躬自省，想一想自家，为啥会犯搿能介个错误；会导致搿能介个结果；今后哪能避免。
法国思想家、文学家罗曼·罗兰讲过：“世界浪只有一种真正个英雄主义，搿就是勒认清生活个真相之后，依然热爱生活。”我以为，真正个英雄主义，就是有担当。
有担当，并非苛求自家成为圣人，而是做一个有正义感、重信誉个人。碰着事体勇承担，出仔差错勿推诿，有啥勿当及时改。还有，勿去轻易承诺。
如果人人侪拿“担当”二字看成功自家个责任，时时呵护，倍加珍视，我伲个社会就会和谐得多。
作者：孔曦
诵读：潘慧芳
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
