作者：辛旭光
沪语改写、播讲：徐雯俊（二十一）、李群（二十二）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（二十一）
第二日半夜里，有人带勒姆妈上了一只老大个帆船，娘两家头播拨塞到白砂糖麻袋个缝隙里，舱板一盖，里向一片墨墨黑，好像传来了女人个哭声。姆妈拿破军毯里个蜡烛包捂紧，心勒别别跳：“小讨债啊，今朝带侬回上海，侬千万覅哭噢，要害煞一船人个。”
大概是因为第一趟乘船，海浪摇啊摇，从来没睏过摇篮个宝宝，只当勒姆妈个胸口头。船朝北开了8个钟头，天已经老老亮了，有人掀开舱板，叫舱里个人出来透口气。姆妈拿蜡烛包轻轻叫摆勒脚边头，自家立起来透口气，冬天个海风呼啦啦个吹，刮得桅杆、缆绳，侪发出呜呜呜个啸叫声，腊雪刺骨。船头伊面个舱门也开了，闪出一个魁梧，又长又大，又熟悉个身影，伊走到姆妈面前，蹲下来了。
姆妈勒舟山听说过，走私船会得勒半路浪，要侬再增加买路钱钿，假使勿答应，就会拨掼到海里向去。伊晓得勒上海滩，有人拨绑牢石头沉到黄浦江底，迭个叫“种荷花”；要是套勒麻袋里拨掼到潮水里，就做了“氽江棺材”了。姆妈豪扫拿出一袋银洋钿讲：“只要保牢我个儿子，我侪答应侬。”
“勿怕虎生三只口，就怕人怀两样心。”船老大勿怀好意个眼光，穿透了姆妈瘦小干瘪个身体。伊手一抖豁末，一只大头滑落仔下来，勒糖包浪三级跳，最后“咕咚”一声闷响，落到了舱底。船老大突然四面看了看。伊拿姆妈个头扳到眼面前，又粗又硬个胡子戳到了姆妈额骨头。辰光好像也僵牢了。只听见一个低沉个男人声音：“马上到鸭窠沙了，要放点人下去，侬覅下去。记牢，千万勿好发出一眼声响。”姆妈半条命也吓脱了，一屁股坐到船舱底，手旁边碰着块银洋钿，拾起来一摸，还是伊块三只鸟个船洋，姆妈觉着迭个两块银圆洋钿真是有神力，回到上海，要拿伊打一把长命锁，锁牢搿个小冤家个的命。
（二十二）
船进了吴淞口，好几趟看见有解放军上船来巡查，姆妈看见过“老八路”，晓得伊拉是勿会寻老百姓麻烦个。熟悉个苏州河潮水恶臭个气味，开始飘上来扑过来，反倒有了一种亲切熟悉个感觉了，姆妈哭笑勿得，百感交集，衣裳着得破破烂烂，比叫花子还勿如，浑身侪是鱼腥气味，头发也变成长辫子了，天晓得等一歇屋里个男人，还会认得出自家个家主婆伐？
十六铺码头浪，仍旧是人山人海，到处侪是挥手哇啦哇啦喊个人，哄哄闹闹一大片，大帆船是勿好靠到客轮码头个，只好停勒几层驳船外头。船老大手插牢仔腰，厚厚个毡帽下头是伊张黑周仓面孔，伊叼了根烟杆，紧张个指挥伙计送人送货上岸。伊瞄好姆妈跨上跳板前，低低叫个交代：“我讲闲话算数，江湖浪再会！”
走进十六铺喧嚣个人群，姆妈抱紧儿子勒胸口头，伊有一肚皮个眼泪水，准备扑勒自家男人身浪哭伊个三日三夜。
“阿珍啊！侬终于回来啦！”一双有力个手臂膊突然张开，一记头拿母子两家头合抱勒一道。两只大手又拿蜡烛包接过去：“老天爷有眼啊，是男个还是女个啊？”。姆妈屏牢仔眼泪水讲：“侬自家看呀。”又委屈又骄傲个眼泪，像煞是泼水一样个挂下来。老朱伸手到蜡烛包里去一摸：“有把个，哦呦，朱家有得儿子唻！”伊看牢仔大头大脑个儿子，嘴巴张得老大，笑得合勿拢了。“四个号头了呀，我是日日到十六铺来等侬！船阿是开到台湾去啦？”
看见家主婆一身酸臭，叫花子衣裳着勒海，人瘦得脱形了，老朱豪扫拿棉马甲脱下来拨伊着好。
“侬只死鬼，为侬个儿子，我死过去几趟侬晓得伐？船拨抢到舟山去了，儿子是养勒羊棚里个！”姆妈委屈个扑勒男人身上，终于可以毫勿掩饰个邪气痛快个放声哭出来了。
边浪向个人，听到姆妈是从舟山逃回来搿，侪轧上来了，有人问，阿看到过自家亲人伐？有人问，到舟山之后，又哪能了？姆妈倒是来劲了，马上老神气个告伊拉讲：“年轻个侪拨捉壮丁了，老人小人女人统统赶下来，勿管㑚个死活个哦！”
作者：辛旭光
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
