来源：网络
沪语改写与朗诵：李 群
文字、语音审核：丁迪蒙
编辑：王乙其
01
在一只医院个病房里，曾经住过两位病人，伊拉个毛病侪老重个。
迭间病房邪气狭小，只好摆得落两只病床。病房有得一扇门搭仔一只窗门，门通向走廊，透过窗门呢，好看到外头。
其中一个病人经过允许，可以勒拉每日天上半日搭下半日拨扶起来坐一个钟头。迭个病人个病床是靠近窗门个。
而另一个病人呢，就勿得勿日日夜夜躺勒病床浪。当然咾，两个人侪需要静养治疗个。
让伊拉特别痛苦个是，伊拉个病情勿允许伊拉做任何事体来消遣，既勿好读书看报紙，也勿好听“无线电”、看电视……只好静静叫个躺勒海。
外加，只有伊拉两家头。
02
两个人经常嘎三胡，一嘎就是几个钟头。
伊拉讲起自家个家庭、老婆、小囡，自家个工作，各自勒战争中做过点啥，曾经到过阿里些地方去度假咾啥个。
每日天个上半天搭下半天，辰光一到，靠近窗门个病人就拨扶起来，开始一个钟头个仰坐。
每当迭个辰光，伊就开始为另外个病友描述伊所看到个窗门外个一切。
慢慢叫，每日天搿能个两个钟头，几乎就变成功伊搭搿病友生活当中个全部内容了。
搿个病友就赛过晓得了，迭只窗门看出去下头有只公园，公园里向有一汪湖水，湖面浪向有一群群个野鸭子、天鹅勒勒自由个游来游去。
公园里向个小朋友，有个勒厾面包喂搿些鸭子，天鹅，有个勒勒白相游艇模型。
一对对年轻个情侣手牵牢仔手，勒树林里向散步。
公园里向鲜花开得老旺，主要是玫瑰花，但四周围还有五彩斑斓、争相斗艳个牡丹花告金盏草。
勒公园埃头个一角，有块网球场，有辰光埃面有得比赛，交关精彩，有常时也会有几场板球赛，虽然球艺够勿上正式决赛个水平，但是，有得看总比呒没看要好。
埃面还有块草坪，是白相滚木球个。
公园最后头个是一排商店，搿些商店个后头是闹市，隐隐约约可以看见。
躺勒海个病人津津有味个听伊讲搿一切。搿种辰光个每一分钟对伊拉来讲侪是一种享受呀！
03
描述还勒继续：一个小顽哪能差点跌到湖里向去了，身浪着仔夏装个小姑娘好看得来！
挨下来又是一场紧张刺激个网球赛。
另一个听了搿活灵活现个讲述，就好像亲眼看到了窗门外头所发生个一切。
一日下半天，当伊听到靠窗个病人讲到有个板球队员慢悠悠个拿球打得到处侪是个辰光，勿靠窗个病人突然产生了一个想法：
为啥偏偏是靠牢窗门个伊个人，可以有幸观赏到窗门外头个一切呢？为啥自家勿能得到搿种机会呢？
伊又为自家有迭种想法而觉着惭愧，劝自家覅再迭能想。但是，伊越是克制，迭种想法却是越加强烈。
伊日里一直拨迭个想法缠勿清爽，夜里又整夜整夜个睏勿着。结果，病情一天天加重了，几位医生对伊加重个原因却是木知木觉。
04
一天夜到，伊照例张开眼睛盯牢天花板。
突然，靠窗个病友醒转来了，开始穷心极恶个咳嗽，呼吸急促，时断时续，液体已经充塞了伊个肺腔，伊个两只手还勒摸发摸发，要寻电铃个开关，只要电铃一响，值班护士就会得马上赶过来。
但是，勿靠窗个病人却一动也勿动个看勒海。伊心里还勒想：凭啥伊要占窗门口埃只床位呢？
痛苦个咳嗽声一声又一声……卡牢了……停歇了……直到最后，连得呼吸声也停止了。
勿靠窗个病人仍旧盯牢仔天花板。
第二天早浪向，医护人员发觉靠窗个病人已经死脱了，伊拉安静熟练个忙碌了一段辰光，就拿尸体推到太平间去了。
稍微过了两天，剩下来个搿病人大概觉着迭个辰光开口比较得体了，乃么马上就提出来，阿好让伊搬到靠窗门个床浪向去。
医护人员拿伊扛过去了，拿伊适适意意个安顿勒病床浪。然后，伊拉就离开了病房，剩下来伊一家头静静叫个睏勒埃面。
医生刚刚离开，迭个病人就邪气痛苦个挣扎，气喘吁吁个用只手臂膊，拿身体撑起来。伊探头朝窗门望出去：唉，伊看到个只不过是一堵光秃秃墙呀！.......
缤纷圣诞快乐
朗诵：李 群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
