作者：辛旭光
沪语改写、播讲：王宇洲
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（十五）
每日天到半夜里，姆妈总归会得想起老朱。姆妈自家个工钿赚得比老朱多，不过老朱会过日脚，姆妈工钿就索介侪交拨伊了，屋里个开销、每日天烧饭，侪是伊做个，连得自家个小衣裳也是老朱来汏个。姆妈开始想自家个男人了。
听了瞎眼接生婆个闲话， 姆妈就抱勒小囡到施粥个伊家“海天碧霞寺”里向，去求当家师父，请伊搭自家小囡起只寄名。接待姆妈个大师父看上去有眼面熟陌生，身材矮小，头浪向戴了一顶宽宽大大个四角道士方帽。伊随手写了“妙生”两个字，叫小徒弟挂到经堂浪向去。
姆妈想想自家吃过庙里向介许多粥，今朝又是帮儿子来求寄名个，搿个事体勿好怠慢了天老爷，就从布鞋里向挖出一块银洋钿，捧牢仔递拨当家师父：“老师父，我个儿子前世勿修，生勒乱世。我现在只有搿眼力道，等伊长大了，定规要到搿搭来还愿报答”。
师父合掌回礼讲：“心诚则灵”，伊接过搿枚赤刮辣新个银洋钿，邪气开心，还习惯性个摸一摸吹一吹，像煞是老熟悉迭种“船洋”个，又凑拢到鼻头浪闻一闻，觉着好像有眼拨烧过个痕迹，突然手里发抖，马上双手拿银洋摆勒台子浪向，一声勿响。过脱一歇，伊再问：“施主侬好，是啥人介绍侬到小庙里头来个？”姆妈本来已经觉着勿大对头了，就马上拿瞎眼接生婆个闲话讲拨大师父听了。大师父边听边摇头晃脑，若有所思，又邪气客气个讲：“女施主，迭块银洋钿我勿好收个，侬摆摆好。要是侬早一眼拿事体告诉我，侬也勿会吃介许多苦头了。”
姆妈有眼搞勿懂了，伊讲：“是小和尚讲个，勿好让血光冲了菩萨”。大师父呵呵一笑：“此地是佛道一家，前殿敬佛，后殿道家法场。我搿搭是张天师当家，百无禁忌！”姆妈还是听勿懂，伊又从布鞋里向拿出一块银洋钿拨大师父。大师父一看，还是搿种船洋，又弓起仔腰摆回到台子浪向。伊别转头看看小囡，上下手脚侪捏了一遍，然后左手成掌念念有词。
今朝迭个小囡也奇怪，软扑扑个扑勒姆妈个身浪向，一眼勿像平常辰光，看到人就笑。
（十六）
大师父又讲：“小小囡，每日天风吹日晒，看来是有眼厌食个疲沓了。”姆妈也觉着了，就接口讲：“小囡勿哭勿吵没精神，回去睏一觉就好了。
大师父拉了拉小囡个舌头一看，皱起眉头，伊叫小徒弟拿来黄符纸，朱砂泥。先是画了张符，关照姆妈转去贴勒门浪向。师父拿起朱砂笔，勒小囡个面孔浪又画圈又写字，小面孔立时三刻变成只花小鬼了！道士先生叫姆妈抱起仔小囡到荷花缸边浪向，让小囡看水面。儿子转过头看水面，就像勒镜子里看到一只张牙舞爪个鬼面孔，一记头扑到姆妈个胸口头像煞要迓起来，大师父又拿小囡个面孔扳转来再看水面镜子，小囡又吓得别转面孔迓到姆妈个胸口，搿能来回三趟，小囡看一趟吓一趟，终于手脚乱蹬，哇哇哇个大声哭出来了。
迭个辰光，大师父撸撸自家胡子笑了，伊关照：“转去面孔勿要汏，再让小囡照三趟镜子，每趟侪要让伊吓得哭出来，急出一身汗，再睏一觉，乃末必定回到生龙活虎个样子了。”伊送姆妈一路走出山门，再三叮嘱伊勿好回头。还讲，以后迭个男小囡只好朝北发展，朝南就有灾祸。姆妈吓得快点连声答应。
姆妈勿识字，黄符纸贴勒门浪向个事体，勒上海伊也看到过个。回到羊棚间，伊豪扫照仔做。又勒只大碗里倒满水，让儿子看了三趟，吓了三趟。搿记真个是哭得来声嘶力竭，浑身出大汗，衣裳湿得嗒嗒渧。姆妈拿儿子个身浪揩好，花面孔汏脱，看到儿子已经吃力得来神智无主了，伊就勒边浪守了一夜天。上半夜，儿子身浪向呼呼烫，浑身勒出汗，下半夜，小囡平静了，身浪清凉下来，呼呼呼睏得稳了。
第二天早浪起来，儿子个嘴巴吧嗒吧嗒，要吃了，姆妈豪扫拿冷粥先勒自家个嘴巴里温热，再用手节头拿粥一口一口扫到儿子个嘴巴里。吃好，又睏到太阳落山，醒了就伸手要姆妈抱伊出去。
姆妈真个是又惊又喜，开心得勿得了，伊觉着舟山搿个地方忒稀奇了。好人多，人家也蛮富裕，还有介有本事个接生婆，介灵光个道士先生。
不过姆妈心里还是奇怪，啥道理，伊拉侪勿接受迭个两块银洋钿呢？是勿是有得豁口、破相了？要么，就是还有啥个其他原因。
作者：辛旭光
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
