文章来源：北京青年报
作者：许树建
沪语改写、讲述：知足常乐
文字、语音审核：丁迪蒙
编辑：王乙其
看到视频号新推送个乔榛语言艺术馆开馆个现场视频，感叹辰光过得忒快了。11月9日，搿一日也是著名配音演员乔榛老师个生日，一晃，乔榛老师八十大寿了！
两年前头，我参加乔榛老师个“澄怀观道，魂个再塑”现场朗诵会，听伊朗诵个场景依然历历在目。记得埃日是好朋友张晓邀请我下半日到文艺会堂去参加乔榛老师朗诵会个。
文艺会堂我是第二趟来了，上一趟还是四个月前搭书友岑玥、徐春、丁福林来看意大利领事馆播放个新片《婚姻连系》。我熟门熟路乘电梯到三楼，只看见满满一堂个听众，张晓招手，我勒伊边浪坐下来，贴当中个位置哦。踏仔半个钟头个脚踏车就好圆我读书听书个梦，我得意自家有个好身体！当一个个耳熟能详个嘉宾勒第一排就座个辰光，我再晓得，搿日天是上海市电影协会组织个专场，集体庆祝乔榛老师个八十寿辰。
印象当中八十岁个老寿星，差勿多是要人家搀牢仔走出来个，啥人想到乔榛老师还好上台演讲！看完三部短片，再晓得原来伊勒44岁埃年得了癌症，开刀治疗，后首来又做了第二趟手术告化疗，伊曾经八趟搭阎罗王擦肩而过！能够健康个活到今朝，实在勿容易！座谈从下半日一点钟开始，整整四个多钟头，乔榛老师始终精神抖擞，炯炯有神个搭观众互动。为啥搿只讲座叫“澄怀观道，魂个再塑”？伊讲“作为表演者必须放弃自我，要怀着一颗感恩个心来观察世界，要拿作品当中个人物通过自家个语言，拿魂勒勒观众面前塑造起来。”
后来伊还背诵了《小草》、《老人与海》咾啥诗歌，抑扬顿挫，一字勿差，表情丰富，推心置腹。尤其是伊朗诵海明威《老人与海》里向个一句话，“一个人并勿是生来就要拨打败个，侬尽可以拿伊消灭脱，但永远也勿会打败伊。”伊个一刻，我觉着面前个乔榛老师，就是搿个“打勿败”个人——根本看勿出伊是一个多年个老病号，一个八十岁个老先生！乔榛老师战胜病魔个意志搭勇气，以及伊搭伊太太唐国妹相濡以沫个爱情，和睦个家庭，令人敬佩。
老新闻工作者胡展奋老师讲，乔榛老师拿俄罗斯、法国、英国等西方文学名著统统侪读过一遍，真个叫人惊叹，伊讲，就算是专门从事文学个人，也勿一定做得到！搿个恰恰就是乔榛老师能艺术常青，抗击病魔，一直走到今朝个奥秘所在。
一位从事生命医学研究个博士从生命科学个角度解释：良好个心态是一个人战胜病魔最有力个法宝。听到搿搭，我眼睛里个乔榛老师，再也勿是一个八旬老人、一个老病号，而是一个自信满满个年轻人，一个朝气蓬勃个老厂长，一个语音迷人个朗读者，一个慈眉善目个邻家大哥。
快要五点钟个辰光，我牵记了要去接孙女放学，只听见乔榛老师用商量个口吻讲：㑚是勿是还想搭我坐一歇，一道来读一首诗？大家异口同声个讲：“愿意！”“我伲来朗读一首戴望舒个《雨巷》好伐？”我刚刚想离开，好奇心又让我想再听一歇，哪怕是一歇歇。乔榛老师讲了搿首诗个背景故事：民国时期，戴望舒到施蛰存屋里去看望好朋友，伊拉两家头一道到松江火车站去接施个妹妹施绛年放学，施绛年当时勒上海中学读书，我一听伊居然搭我侪是上中个校友，兴趣更加浓了。放学回转去辰光突然落雨了，伊拉三家头侪没带阳伞，走勒前头个妹妹施绛年长辫子一甩，走勒后头个戴望舒就像触电一样……乔榛老师个故事讲得实在太动人了！
后来我一路赶辰光踏车子，一路浪耳朵边侪是乔榛老师朗诵《蜀道难》个高亢个声音。勿晓得是因为上个号头刚刚去过“一夫当关，万夫莫开”个剑门关，还是因为乔榛老师搭诗仙李白心心相印，伊朗诵最后一句个声音简直就像刺破了天空：“蜀道难，难于上青天！”后头伊又跟了一句：“我就勿相信！”听得人心情激荡。嘉宾讲伊个心理年龄赛过50岁，乔榛老师笑眯眯讲，“我自家觉着只有廿几岁！”搿是一种几化年轻个心态啊！有句闲话讲，榜样个力量是无穷个。乔榛老师就是我个榜样。
作者：许树建；
讲述：知足常乐；
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
