来源：夜光杯
原创：沈嘉禄
沪语改写、讲述：牛美华
文字、语音审核：丁迪蒙
编辑：王乙其
上个号头搭朋友到苏州去参加老苏州茶酒楼重新开张个庆典，门口头摆了一长溜个大花篮，丝带飘飘，灼灼其华，我希望陆文夫先生在天之灵可以看得到。
是个，迭个茶酒楼就是陆老师个“原创作品”。据苏州市烹饪协会原会长、饮食文化研究会会长、陆文夫生前好友华永根老师回忆，陆文夫勒1957年运交华盖，所幸伊是带薪下放到农村个，还勿至于饿到肚皮贴牢脊梁骨。插秧、割稻、挑大粪、挖河泥，筛驮到脱皮抽筋，只好七转八兜买瓶土烧酒，一杯落肚，百愁皆消。华老师讲：“伊年轻辰光搭周瘦鹃、范烟桥、程小青侪吃过松鹤楼等名店名厨个苏帮菜，嘴巴老刁个。而搿辰光，一只鸡脚爪、一块豆腐干，也可以调半醉了。”
后来我看到陆绮写个一篇回忆父亲个文章，里向讲到1969年伊拉全家随父亲下放到苏北射阳个情景：“勒长江北面个小村庄里，伊会得扎鹞子、做弓箭、削竹制小手枪、用长杆粘知了、掏鸟窠、捞鱼摸虾，无所勿为……伊会得磨剪子戗菜刀、修锁配钥匙、焊面盆补铅桶、补镬子修水壶、修脚踏车、缝纫机、钟表。伊还会得木工，会用刨子、凿子、锯子，筛驮了，立勒一大堆刨花屑里呼呼……”陆文夫还帮厂里女工修过阳伞、手表，大家再勿管伊是勿是“鸳鸯蝴蝶派个小爬虫”唻。
陆文夫（1929-2005）
风雨过脱之后，鲜花重新开放，伊以中篇小说《美食家》震烁文坛，拿苏州人嘴巴里个“馋痨胚”“吃食癞皮”尊称为“美食家”，呼唤人性个回归，为追求雅致生活个中国人正名。今朝我勒砚台边头用余墨研究中国饮食文化、而拨大家戏称为美食家，其实也是沾陆先生个恩泽个。
讲起1995年个十全街改造，有个地方粉墙黛瓦杉木窗个沿街面三层楼房子、拨苏州市文联接管，陆文夫就搭搿单位合作，开了家茶酒楼。伊个初心是烧好苏州菜，传承苏州文化，拿苏州民间食物个味道还原、荟萃勒此地。
茶酒楼除脱散席也有几间包房，其中有间叫“灶屋间”，里向还原了只柴灶，墙浪挂了件箬笠蓑衣。陆文夫身为作协领导，会议比较多，还要写小说，勿可能“春日独当垆”，所以让伊个小囡儿陆锦担任经理，用经营所得补贴伊创办个《苏州杂志》。杂志社就勒一箭之遥个滚绣坊青石弄里向个叶圣陶故居。
（陆文夫先生与叶圣陶先生子女至善、至美、至诚等在《苏州杂志》社所在地苏州青石弄叶圣陶故居）
陆老师还请来了苏州餐饮界名厨“四根一家”（张祖根、吴涌根、邵荣根、屈群根、刘学家）出任顾问，要求伊拉每个礼拜来一趟，每人传授几只苏帮名菜拨年轻厨师。
就搿能，茶酒楼一炮打响，生意火爆，门庭若市。外省作家访问苏州，去茶酒楼吃杯茶、吃壶老酒，成了保留节目。可以想像，有勿少稿子就勒搿搭诞生个。
作者：沈嘉禄
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
