来源：新民晚报
作者：郑自华
沪语改写：周红缨
讲述：李国琪
文字、语音审核：丁迪蒙
后期制作：沉默是金
编辑：王乙其
1989年，我到北京去疗养。
伊个辰光，北京是国内唯一有得地铁个城市，让我迭个上海人邪气羡慕。同时期个上海，马路狭窄，交通拥挤，一部公交车到站，乘客一记头翁上去、跟牢仔车子跑，就怕轧勿上。
乘公交车要有人推乘客个屁股，包包搭仔衣裳拨轧勒车门个外头是常态。因为拥挤，车子浪交关人只好金鸡独立，曾经有人做过统计，20世纪80年代，上海个公交车浪，一平方米要立12个人，交关人讲乘车子比上班还要吃力。
现在看到地铁勒北京城个地下头邪气快个开，勿单单兴奋，还邪气好奇。我乘个方向是军事博物馆，到站之后，我拿出照相机，请同事搭我拍了张照片，背景是一部即将启动个蓝颜色个地铁。伊个辰光我就勒想，啥辰光上海也好像北京一样有得地铁，让我伲个通勤勿再成为难事体？
后来我再晓得，上海个地铁也勒勒邪气紧张个建设当中，我盼望能够早点乘上地铁。
我保存了一张一号线个地铁乘车证。从上海火车站到莘庄，共总有15只站点，票价2元，上头写勒海试运营，并且特别注明：“限人民广场至虹梅路上车”。
从1993年1月10日开始，第一列地铁列车（6节编组）进入了地铁一号线，新龙华站到徐家汇站（史称上海地铁一号线南段）勒勒搿个区间上行线正式调试。也就是讲，上海地铁终于实现“零”个突破了！
经过三十年个奋斗，到2023年，上海地铁达到了831公里。同时，目标向1000公里进军，勒上海，地铁个服务也是一流个。
前两年，我到金山去旅游，回来个辰光乘金山铁路到上海南站调1号线。去询问值班员垂直电梯个位置，值班员叫来了一个年轻姑娘。姑娘陪我迭个行走勿便个人一道乘电梯，伊还勿停个安慰我，讲还要走点路个，我晓得伊位老忙个，就讲自家好一家头乘电梯个，姑娘讲，伊个任务就是负责拿我送到站台。伊看我上地铁了，再挥手告别。
我觉着，勒地铁里工作个人勿仅年轻，而且还邪气美呀！
现在，车站文化墙、文化专列、地铁音乐角、钱学森画廊等等，近年来陆陆续续勒上海地铁站搭仔列车浪亮相。即使是再拥挤个交通枢纽站，一进站，看到搿些文化墙、艺术空间，心情就会变得勿一样。至于地铁沿线个美食，更加是我经常打卡个好地方。
有一日，搭几个新上海朋友聚会，大家讲起爱上海个理由，勒每个人列举个理由当中，侪讲到了上海个地铁。
是个呀，爱上海，哪能少得了地铁呢？
作者：郑自华
讲述：李国琪
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
