གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་བཅུ་དྲུག་གི་བྱེད་སྒོ་མུ་མཐུད་སྤེལ་བཞིན་ཡོད།

ས་སྐྱ་པཎ་ཆེན་གྱིས་མཛད་པའི《མཁས་པ་རྣམས་འཇུག་པའི་སྒོ་ཞེས་བྱ་བའི་བསྟན་བཅོས》ཀྱི་གཞུང་འགྲེལ། ཉེར་བརྒྱད་པ། 

གཞུང་འགྲེལ་གནང་མཁན་དགེ་བའི་བཤེས་གཉེན་བཀའ་དྲིན་ཅན་རྒན་མཁས་བཙུན་མཆོག

དྲག་ཤུལ་འཇིགས་རུང་རྣམ་གཉིས་ལ། །

དཔའ་དང་མི་སྡུག་ངམ་པ་འཇུག །

  དྲག་ཤུལ་དང་འཇིགས་སུ་རུང་བ་བསྔགས་པའི་རྒྱན་ལ་དཔའ་བ་དང་མི་སྡུག་པ་དང་ངམ་པའི་རྒྱན་སྦྱོར་བ་མི་འགལ་ལོ། །ངམ་པའི་རྒྱན་ལ་སྒེག་ཅིང་དཔའ། །དགོད་ཅིང་དྲག་ཤུལ་འཇིགས་རུང་འཇུག །ངམ་པའི་རྒྱན་བསྔགས་པའི་སྐབས་སུ་སྒེག་པ་ལ་སོགས་པའི་ཡོན་ཏན་འདི་དག་སྦྱོར་ཤེས་ན་སྡེབ་སྦྱོར་སྐྱོན་མེད་ཡིན་ནོ། །

སྒེག་དགོད་ངམ་པ་རྣམ་གསུམ་ལ། །

བསྒྱིངས་དང་འཕྱར་དང་ཟིལ་གནོན་དང་། །

དཔེ་རྒྱན་སྒྲོ་བཏགས་སྣ་ཚོགས་པ། །

རོལ་ཅིང་སྒེག་པའི་ཚིག་རྒྱན་འཇུག །

  སྒེག་པ་ལ་སོགས་པ་ཚིག་ཟབ་ཅིང་རོལ་པ་དང་བཅས་པ་དང་། དགའ་བ་སྐྱེད་པ་དང་། ཕ་རོལ་སྤ་སྐོང་བ་དང་། དཔེ་སྣ་ཚོགས་དང་། ཚིག་གི་རྒྱན་སྣ་ཚོགས་དང་། སྒྲོ་བཏགས་པའི་སྦྱོར་བ་དོན་དང་འཕྲོད་པ་རོལ་ཅིང་སྒེག་པ་དང་བཅས་པའི་སྙན་ངག་འཇུག་གོ །

དཔའ་དྲག་འཇིགས་རུང་རྣམ་གསུམ་ལ། །

ཁམས་གསུམ་ཟ་བའི་ངང་ཚུལ་ཅན། །

ངོ་བོ་ཉིད་ཀྱིས་འཇིགས་རུང་བ། །

སྤུ་ཟིང་ཞེས་ནི་བྱེད་པའི་ཆོས། །

རྩུབ་པའི་ཚིག་རྒྱན་སྦྱར་བར་བྱ། །

  དཔའ་བ་ལ་སོགས་པ་གསུམ་ལ་རང་དོགས་པ་མེད་ཅིང་ཕ་རོལ་སྐྲག་པར་བྱེད་པ། ནང་གི་ཁོང་ནས་འཁྲུགས་པ་དང་། ལུས་དང་། ངག་དང་། མཚོན་ཆ་ལ་སོགས་པའི་རྣམ་འགྱུར་མི་བཟད་པ་ངོ་བོ་ཉིད་ཀྱིས་ནང་དང་ཕྱི་རོལ་གྱི་འཇིགས་པ་སྐྱེད་པ། ཁམས་གསུམ་ཟ་བར་ནུས་པའི་ངང་ཚུལ་ཅན། སྐྱི་གཡའ་ཞིང་སྤུ་ཟིང་ཞེས་བྱེད་ནུས་པའི་ཚིག་སྦྱར་བར་བྱའོ། །དེའང་སྨིན་མ་བསྡུས་པ་ལ་སོགས་པ་ལུས་ཀྱི་ཆོས། རྩུབ་པའི་མཚོན་ཆ་ལ་སོགས་པ་ལུས་དང་འབྲེལ། འཇིགས་པའི་ཧཱུཾ་སྒྲ་ལ་སོགས་པ་ངག་དང་འབྲེལ། སྟག་ལྤགས་དང་། སྦྲུལ་གདུག་ལ་སོགས་པ་ཆ་ལུགས་དང་འབྲེལ། དུར་ཁྲོད་དང་། ཚང་ཚིང་དང་། ངམ་གྲོག་དང་། གཡང་ས་དང་། མུན་ནག་དང་། གཅན་གཟན་གྱི་ཁྲོད་ལ་སོགས་པ་གནས་དང་འབྲེལ་ལོ། །

མི་སྡུག་པ་ནི་ལུས་ངག་ཡིད། །

ལྷན་ཅིག་སྐྱེས་དང་སྦྱར་བ་ཡི། །

སྐྱོན་དང་འབྲེལ་བའི་ངང་ཚུལ་ཅན། །

ཡིད་འབྱུང་བྱེད་པའི་ཚུལ་ཡིན་ནོ། །

  ལུས་མི་སྡུག་པ་ཁ་དོག་དང་དབྱིབས་ཕྱིན་ཅི་ལོག་དང་། ངག་མི་སྡུག་པ་རྩུབ་པ་དང་མ་འབྲེལ་བ་དང་ཚོགས་པར་དབྱུང་བྱ་མ་ཡིན་པའི་ཚིག་འབྱིན་པ། ཡིད་མི་སྡུག་པ་ནི་ཕན་བཏགས་པ་ལ་གནོད་པའི་སེམས་དང་། མཆོད་པར་འོས་པ་བསླུ་བ་ལ་སོགས་པའི་བསམ་ཐོས་པ་ཙམ་གྱིས་ལྷ་དང་བཅས་པའི་འཇིག་རྟེན་ཡིད་འབྱུང་བར་ནུས་པའོ། །དེ་དག་ཀྱང་ནང་ནས་བྱུང་བ་ནི་ལྷན་ཅིག་སྐྱེས་པའི་མི་སྡུག་པའོ། །ལུས་ཀྱི་དྲི་མ་དང་། ཐལ་བ་བྱུགས་དང་། གོས་ཧྲལ་ཧྲུལ་ལ་སོགས་པ་ནི་ཆ་ལུགས་དང་འབྲེལ་བའོ། །གནས་ངན་པ་དང་། མི་གཙང་བ་དང་། ལྗན་ལྗིན་དང་། རད་རོད་དང་། གྱོ་མོ་དང་། མགལ་དུམ་དང་། སྐྲ་དང་། རུས་པ་དང་། སྡོང་དུམ་དང་། རུལ་པའི་ཆུ་ལ་སོགས་པ་ནི་གནས་དང་འབྲེལ་བའོ། །

དགོད་པའི་རྒྱན་ལ་རང་བཞིན་དང་། །

བསྒྲུབས་པ་ལས་བྱུང་རྣམ་པ་གཉིས། །

རང་བཞིན་ཕལ་ཆེར་བླུན་པོ་ལ། །

བསྒྲུབས་པ་མཁས་པ་རྣམས་ལ་ཡོད། །

   དགོད་པའི་རྒྱན་ལ་རང་བཞིན་གྱིས་གད་མོ་འབྱིན་པ་ནི་བླུན་པོ་ངོ་ཚ་མི་ཤེས་པའི་རྣམ་འགྱུར་ལས་ཕལ་ཆེར་འབྱུང་ལ། བསྒྲུབས་པ་ནི་སྙན་ངག་མཁན་དང་། ཟློས་གར་མཁན་དང་། བཞད་གད་མཁན་ལ་སོགས་པ་སྦྱངས་པའི་ཁྱད་པར་ཡིན་ལ། དེའང་ལུས་ངག་ལས་བྱུང་བའི་བཞད་གད་ནི་ནང་གི་ཡིན་ལ། ཡུལ་དང་ཡོ་བྱད་ལ་སོགས་པ་ལས་བྱུང་བའི་བཞད་གད་ནི་ཕྱིའི་ཡིན་ནོ། །འདི་དག་གི་དཔེ་བརྗོད་པ་ནི་ཀླུ་རྣམས་རབ་ཏུ་དགའ་བར་བྱེད་པའི་ཟློས་གར་ལ་སོགས་པར་ཤེས་པར་བྱའོ། །

སྙིང་རྗེ་ཞི་བ་རྣམ་གཉིས་ལ། །

སྒེག་ཅིང་དཔའ་བ་ལ་སོགས་པའི། །

ཚིག་རྒྱན་སྦྱར་ན་གཉིས་པོ་འཇིག །

དེ་ཕྱིར་བཅོས་མའི་དཔེ་རྒྱན་སྤང་། །

   སྙིང་རྗེ་དང་ཞི་བ་གཉིས་རང་བཞིན་གྱིས་ཉེ་བར་ཞི་བ་ཡིན་པས་དེ་དདང་མཐུན་པའི་རང་བཞིན་གྱིས་རྒྱན་རྐང་གི་ཁོང་ནས་སྐྱེས་པའི་ཚིག་བརྩེ་བ་དང་དུལ་བ་བསྐྱེད་ནུས་པས་ཕ་མས་བུ་སྡུག་པ་ལ་བརྗོད་པ་ལྟ་བུ་མ་བཅོས་པ་ཉིད་རྒྱན་གྱི་དམ་པ་ཡིན་ནོ། །འདི་ལ་བཅོས་མའི་ཚིག་རྒྱན་མི་སྦྱར་ཏེ། སྦྱར་ན་བརྩེ་བ་དང་དུལ་བ་ངང་གིས་སྐྱེས་པ་བཅོས་ནས་བྱས་པ་ལྟ་བུར་འགྱུར་བའི་ཕྱིར་རོ། །སྙིང་རྗེའི་དཔེ་བརྗོད་པ་ཐམས་ཅད་སྒྲོལ་དང་། ཞི་བའི་དཔེ་བརྗོད་པ་ལྕགས་ཀྱི་ཁྱིམ་དུ་སྐྱེས་པའི་རབས་ལ་སོགས་པ་ལྟར་ཤེས་པར་བྱའོ། །

སྒེག་སོགས་རྣམས་ལ་ཞི་བའི་དཔེ། །

མི་འཇུག་ཞི་ལ་སྒེག་སོགས་བཞིན། །

དེ་བཞིན་ཕན་ཚུན་འགལ་བའི་དཔེ། །

ཀུན་ལ་རང་གིས་བརྟགས་ཏེ་སྦྱར། །

  ཞི་བ་ལ་སྒེག་པ་ལ་སོགས་པའི་དཔེ་མི་འཇུག་པ་བཞིན་དུ། སྒེག་པ་ལ་ཞི་བའི་དཔེ་དང་། དྲག་ཤུལ་ལ་སྙིང་རྗེའི་དཔེ་མི་འཇུག་པ་བཞིན་དུ་སྙིང་རྗེ་ལ་དྲག་ཤུལ་གྱི་དཔེ་མི་འཇུག་པ་ལ་སོགས་པ་རང་གིས་བློས་བརྟགས་ཏེ་ཤེས་པར་བྱའོ། །

དཔེ་ཡི་རྒྱན་རྣམས་ཕལ་ཆེར་ནི། །

རང་གི་ཆོས་དང་མཐུན་པར་སྦྱར། །

དཔེ་དོན་འབྲེལ་བར་མ་གྱུར་ན། །

སྙན་ངག་མཁན་གྱིས་སྨད་པ་སྲིད། །

   དཔེ་དང་རྒྱན་ལ་སོགས་པ་ཐམས་ཅད་རང་རང་གི་དོན་དང་མཐུན་པར་སྦྱར་ཏེ་དཔེ་དོན་འགལ་བར་མཐོང་ན། སྙན་ངག་མཁན་གྱིས་ཅོ་འདྲི་བའི་གནས་སུ་འགྱུར་བ་སྲིད་པའི་ཕྱིར་རོ། །དཔེར་ན་དབྱངས་ཅན་གྱི་མགུལ་རྒྱན་ལས། རི་སུལ་ཤིང་གཅིག་པ། ནགས་ཚང་ཚིང་ཅན། ཆུ་འབབ་པ་ཞེས་བྱ་བ་ལ་སོགས་པ་དང་། རི་སུ་ནགས་ཚང་ཚིིང་གི་ནང་ནས་བྲག་གི་བུ་ག་ནས་ཆུ་འབབ་པ་ལ་སོགས་པ་སྐྱོན་ཅན་དུ་བཤད་པ་དང་། ཁོ་བོའི་རྣམ་པར་རྟོགས་པས་བསམས་ན། 

ཆུ་སྐྱར་བྱི་ཆོམ་རྐུན་དངག །

སྒྲ་མེད་འཇབ་ཅིང་འགྲོ་བ་ཡིས། །

མངོན་པར་འདོད་པའི་དོན་སྒྲུབ་པ། །

ཐུབ་པས་རྟག་ཏུ་དེ་བཞིན་སྦྱར། །

   ཅེས་བྱ་བའང་དོན་ལ་སྐྱོན་ཅི་ཡང་མེད་མོད། སྙན་ངག་གི་སྐབས་ཡིན་ན། མུ་སྟེགས་དག་གིས་ཁྱེད་ཀྱི་ཐུབ་པ་དེ་ལྟར་སྤྱོད་དམ་ཞེས་ཅོ་འདྲིའི་དོགས་པ་ལ། སྐྱེས་རབས་ལས། བྱང་ཆུབ་སེམས་དཔའ་ཉའི་རྒྱལ་པོས་སྨྲས་པ། 

ཁྭ་རྣམས་རབ་ཏུ་དགའ་བ་མེད་པར་མཛོད། །

  ཅེས་གསུངས་པ་ལ་བྱང་ཆུབ་སེམས་དཔའི་ཚིག་གི་རྒྱན་དུ་མི་མཛེས་ཏེ། ཁྭའི་འཇིགས་པ་འདི་ལས་བདག་ཅག་སྐྱོབ་ཅེས་བརྗོད་ན་མཛེས་པར་མངོན་ནོ། །འདི་ལྟ་བུའི་དཔེར་བརྗོད་དབྱངས་ཅན་མགུལ་རྒྱན་ལས་མང་དུ་བརྗོད་ཀྱང་ཡི་གེ་མངས་ཀྱིས་དོགས་པས་མ་བྲིས་ཏེ། རང་གིས་ལེགས་པར་བརྟགས་ལ་ཤེས་པར་བྱའོ། །

གྲགས་པའི་དཔེ་ལ་དཀར་བ་དང་། །

མཐོ་དང་འོད་དང་བ་དན་སོགས། །

སྦྱར་ཞེས་དབྱངས་ཅན་མགུལ་རྒྱན་སྨྲ། །

  སྙན་ཅིང་གྲགས་པ་བརྗོད་པའི་དཔེ་ལ། གངས་རི་ལ་སོགས་པ་དཀར་ཞིང་མཐོ་བ་དང་། རླུང་གིས་བསྐྱོད་པའི་བ་དན་ལ་སོགས་པ་དཔེར་བྱའོ་ཞེས་བཤད་དོ། །

ཞུམ་པ་ཝ་སྐྱེས་ཅེ་སྤྱང་སོགས། །

མཁས་པ་འཇམ་དབྱངས་སྟོབས་སྲེད་མེད། །

བླུན་ལ་བ་ལང་ཞེ་སྡང་སྦྲུལ། །

གསལ་བ་སྐྱེ་དགུའི་སྒྲོན་མེ་སོགས། །

རྒྱས་པར་སྦྱར་ཞེས་མཁས་རྣམས་སྨྲ། །

  འཇིགས་པ་མེད་པ་ལ་སེང་གེ་ལ་སོགས་པ། ཞུམ་པ་ཝ་སྐྱེས་ལ་སོགས་པ། མཁས་པ་ལ་འཇམ་དཔལ་ལ་སོགས་པ། སྟོབས་ལ་སྲེད་མེད་ཀྱི་བུ་ལ་སོགས་པ། བླུན་པོ་ལ་བ་ལང་། ཞེ་སྡང་ལ་སྦྲུལ། གསལ་བ་ལ་ཉི་མ། དེ་བཞིན་དུ་སྐྱོན་གྱིས་མ་གོས་པ་ལ་པདྨ་ལ་སོགས་པ་དཔེར་བྱའོ་ཞེས་སྙན་ངག་གི་བསྟནབ་ཅོས་དག་ལས་བཤད་དོ། །