གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་བཅུ་དྲུག་གི་བྱེད་སྒོ་མུ་མཐུད་སྤེལ་བཞིན་ཡོད།
ས་སྐྱ་པཎ་ཆེན་གྱིས་མཛད་པའི《མཁས་པ་རྣམས་འཇུག་པའི་སྒོ་ཞེས་བྱ་བའི་བསྟན་བཅོས》ཀྱི་གཞུང་འགྲེལ། ཉེར་བདུན།
གཞུང་འགྲེལ་གནང་མཁན་དགེ་བའི་བཤེས་གཉེན་བཀའ་དྲིན་ཅན་རྒན་མཁས་བཙུན་མཆོག
དྲག་ཤུལ་འཇིགས་རུང་རྣམ་གཉིས་ལའང་། །
དེ་བཞིན་སྙིང་རྗེ་ཞི་བ་སྤང་། །
དྲག་ཤུལ་འཇིགས་སུུ་རུང་བ་ན་རྩུབ་ཅིང་གཞན་ལ་གནོད་པའི་ཆོས་ཡིན་ལ། སྙིང་རྗེ་དང་ཞི་བ་ནི་འཇམ་ཞིང་ཕན་འདོགས་པ་ཡིན་པས་ཕན་ཚུན་འགལ་བའི་ཕྱིར་རོ། །
སྙིང་རྗེ་ཞི་བ་རྣམ་གཉིས་ལ། །
སྒེག་དང་དཔའ་དགོད་དྲག་ཤུལ་དང་། །
འཇིགས་རུང་ངམ་པ་དྲུག་པོ་སྤང་། །
སྙིང་རྗེ་དང་ཞི་བ་ནི་ཕན་འདོགས་ཤིང་དུལ་བའི་ཡན་ལག་ཡིན་ལ། སྒེག་པ་ནི་འཕྱར་བ་དང་གཡེང་ཞིང་རྣམ་པར་མ་ཞི་བའི་ཆོས་ཡིན། དེ་བཞིན་དུ་སྙིང་རྗེ་དང་ཞི་བ་ནི་ཡིད་བདེ་ཞིང་དུལ་བ་ཡིན་ལ། དེ་བཞིན་དུ་དཔའ་བ་དང་། དགོད་པ་དང་། དྲག་ཤུལ་དང་། འཇིགས་སུ་རུང་བ་ནི་དེ་དག་ལས་བཟློག་པ་ཡིན་པའི་ཕྱིར་རོ། །གལ་ཏེ་ཆོས་དང་འབྲེལ་བའི་སྐབས་སུ་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་རྣམས་ལ་དཔའ་བ་དང་འཇིགས་སུ་རུང་བ་ལ་སོགས་པ་འགའ་ཞིག་མི་འགལ་བ་ནི། གོང་དུ་དཔའ་བའི་སྐབས་སུ་བཤད་པ་ལྟར་སྐབས་དང་སྦྱར་ལ་བཤད་པར་བྱའོ། །
ངམ་པའི་རྒྱན་ལ་སྙིང་རྗེ་དང་། །
ཞི་བ་གཉིས་ནི་རྣམ་པར་སྤང་། །
ངམ་པ་ནི་ང་རྒྱལ་གྱི་ཡན་ལག་ཡིན་ལ་སྙིང་རྗེ་དང་ཞི་བ་ནི་དུལ་བའི་ཡན་ལག་ཡིན་པའི་ཕྱིར་རོ། །
སྒེག་པའི་རྒྱན་ལ་སྙིང་རྗེ་དང་། །
ངམ་དང་ཞི་བ་འཇུག་པ་སྲིད། །
སྒེག་པ་བསྔགས་པའི་སྐབས་སུ་སྙིང་རྗེ་དང་གཞན་རྣམས་རྣམ་པ་ཅུང་ཟད་འགལ་བ་ཡིན་ཡང་། བརྗོད་འདོད་ཀྱི་སྟོབས་ཀྱིས་སྐྱོན་མེད་ཅིང་ཡོན་ཏན་དུ་འགྱུར་ན་སྐབས་དང་སྦྱར་ཏེ་སྙན་ངག་གི་ཚུལ་དང་མི་འགལ་ན་སྐྱོན་མེད་དོ། །
དཔའ་བའི་རྒྱན་ལ་དྲག་ཤུལ་དང་། །
འཇིགས་རུང་ངམ་པའི་རྒྱན་མི་འགལ། །
དཔའ་བ་བསྔགས་པའི་སྐབས་སུ་གཞན་འདི་དག་དང་རྣམ་པ་མི་འགལ་བའི་ཕྱིར་སྙན་ངག་སྦྱོར་ཤེས་ན་སྐྱོན་མེད་དེ། སྐབས་འགར་ཡོན་ཏན་ཉིད་དུའང་འགྱུར་རོ། །
མི་སྡུག་པ་དྲག་ཤུལ་དང་། །
འཇིགས་རུང་སྐབས་འགར་འགལ་བ་མེད། །
མི་སྡུག་པ་དང་གཞན་འདི་དག་ཀྱང་རྣམ་པ་མི་འགལ་བའི་ཕྱིར་ཚིག་སྡེབ་ཤེས་ན་འགལ་བ་མེད་དོ། །
སྙིང་རྗེ་ཞི་བའི་རྒྱན་ཕན་ཚུན། །
སྐབས་ཀྱིས་འགལ་བ་མེད་པའང་སྲིད། །
སྙིང་རྗེ་དང་ཞི་བ་ཕན་ཚུན་མི་འགལ་བས། རྒྱན་ཡང་ཕན་ཚུན་མི་འགལ་ལོ། །སྦྱོར་བའི་ཤུགས་ཀྱིས་འགལ་བར་སྣང་ན་ཡང་རྒྱན་འཆོལ་བར་མི་སྦྱར་ཏེ། འདི་ལྟ་བུའི་སྐབས་རང་གིས་བརྟགས་ཏེ་ཤེས་པར་བྱའོ། །
དགོད་པའི་རྒྱན་ལ་སྒེག་ཅིང་དཔའ། །
མི་སྡུག་ངམ་པའི་རྒྱན་སྦྱོར་སྲིད། །
དགོད་པའི་རྒྱན་འཆད་པའི་སྐབས་སུ། སྒེག་པ་དང་། དཔའ་བ་དང་། མི་སྡུག་པ་དང་། ངམ་པའི་རྒྱན་སྦྱོར་སྡིར་དེ། འདི་དག་ལ་བརྟེན་ནས་སྙན་ངག་མཁན་གད་མོ་འབྱིན་པའི་ནུས་པ་ཡོད་པའི་ཚིག་གོ །དཔེར་ན་ལྷ་རྣམས་གར་བྱེད་པ་ན་དབང་ཕྱུག་གི་སྦྲུལ་གྱི་མཆོད་ཕྱིར་ཐོགས་ས་ལ་ལྷུང་སྐབས་དེར་ནམ་མཁའ་ལྡིང་གར་ནང་དུ་ཞུགས། སྦྲུལ་སྐྲག་སྟེ་འབྲོས་སམ་མ་རྙེད་ནས་ཚོགས་ཀྱི་བདག་པོ་གར་བྱེད་པའི་སྣ་བུག་བུག་ཏུ་ཞུགས། དེར་ཚོགས་བདག་མ་བཟོད་དེ་མགོ་སྤྲུགས། དེ་མཐོང་བས་ལྷ་ཐམས་ཅད་བཞད་གད་བྱུང་། དེ་ལྟའི་བཀྲ་ཤིས་ཁྱོད་ལ་ཤོག ཅེས་ཚིག་སྡེབ་ལེགས་པའི་སྙན་ངག་དེ་ལྟ་བུ་དཔྱོད་པ་བའི་བསྟན་བཅོས་ཀྱི་ཀླད་ན་ཡོད་པ་ལྟ་བུ་ཡིན།
དྲག་ཤུལ་འཇིགས་རུང་རྣམ་གཉིས་ལ། །
དཔའ་དང་མི་སྡུག་ངམ་པ་འཇུག །
དྲག་ཤུལ་དང་འཇིགས་སུ་རུང་བ་བསྔགས་པའི་རྒྱན་ལ་དཔའ་བ་དང་མི་སྡུག་པ་དང་ངམ་པའི་རྒྱན་སྦྱོར་བ་མི་འགལ་ལོ། །ངམ་པའི་རྒྱན་ལ་སྒེག་ཅིང་དཔའ། །དགོད་ཅིང་དྲག་ཤུལ་འཇིགས་རུང་འཇུག །ངམ་པའི་རྒྱན་བསྔགས་པའི་སྐབས་སུ་སྒེག་པ་ལ་སོགས་པའི་ཡོན་ཏན་འདི་དག་སྦྱོར་ཤེས་ན་སྡེབ་སྦྱོར་སྐྱོན་མེད་ཡིན་ནོ། །
འཕྲིན་སྟེགས་འདིར་དོ་ཁུར་གནང་བ་དང་བརྒྱུད་བསྐུར་གནང་བར་བཀའ་དྲིན་ཆེ་ཞུ།
མཐོ་འབྲིང་བོད་ཡིག་དཔྱད་གཞི་ཀུན་གྱི་ཨ་མ།
༄༅། །སློབ་ཆེན་བདེ་བགྲོད་ལམ་གསར་ལས་བཏུས། མཐོ་རྒྱུགས་རྒྱུགས་དཔེ།
《སློབ་ཆེན་བདེ་བགྲོད་ལམ་གསར》ངེས་པར་དགོས་མཁོ་ཆེ་བས་འབྲེལ་བ་གནང་ཤོག
གསར་དུ་བསྒྲིགས་པའི《མཐོང་བ་མྱོང་གྲོལ》མཚམས་སྦྱོར་སྟབས་བདེ།
