༄༅། །སྐྲ་དཀར་གཉེར་མ་ལྷཌ་དུས་སུའང་། །
ཐོས་པ་བསགས་པར་བྱ་བ་སྟེ། །
གང་དུ་ཐོས་མང་འགྲོ་འགྱུར་བ། །
དེར་ནི་ཕུང་པོར་འགྲོ་མི་འགྱུར། །
ཞེས་པའི་བརྡ་དོན་བཀྲལ་བ་བེམ་ཤེས་ཐ་དད།
ལས་ཀྱི་ནུས་པ་བསམ་མི་ཁྱབ་པ་ལས། །
འགྲོ་བ་མི་ཉིད་སྐྱེས་པའི་དུས་ནས་བཟུང་། །
འཚར་ཞིང་ལོངས་ཏེ་སྐད་ཅིག་མི་སྡོད་པར། །
རྒ་བའི་བྱེད་པ་མ་རྫོགས་བསྐྱོད་དེ་འགྲོ །
རང་ལུས་སྐྲ་ལོ་གནག་ཅིང་སྣུམ་པ་དག །
སྐྱ་ཕྱེད་དང་ནི་རིམ་བཞིན་དཀར་འགྱུར་ཀྱང་། །
ཐོས་པ་བྱ་བ་འགྲོ་བ་མི་ཡི་ལས། །
གཙོ་བོར་བཞེད་དེ་རྟག་ཏུ་བྱེད་ལ་བསྐུལ། །
ཐོས་པ་ཞེས་བྱ་བསླབ་པའི་ཐོག་མ་སྟེ། །
གཞུང་ལུགས་གང་ལ་ཐོས་པའི་བྱ་བ་ནི། །
སྤེལ་ཅིང་རབ་ཏུ་དོན་ལ་གནས་གྱུར་ན། །
ཐོས་པའི་ཕན་ཡོན་ཡོངས་ཤེས་ཐེ་ཚོམ་ཅི། །
དེ་ལྟར་ཐོས་པའི་ཕན་ཡོན་ལེགས་བསམས་ཤིང་། །
ཉིན་རེ་བཞིན་དུ་འབད་པས་ཞུགས་པ་ལ། །
སླར་ཏེ་གོམས་པ་ཡོངས་སུ་འདྲིས་པ་ན། །
ཐོས་མང་བྱེད་ལ་ཚེགས་མེད་བརྟུགས་ཞུགས་འཛིན། །
དེས་ན་ཐོས་པ་མང་པོ་བྱས་འགྱུར་ན། །
དེ་ཡི་འབྲས་བུ་ཆུད་ཟོས་མི་འགྲོ་ཞིང་། །
ཆ་ཤས་རྡུལ་རྫས་བསགས་པའི་ཕུང་པོ་རུ། །
འགྱུར་དུ་མི་ནུས་ཆོས་ཉིད་རང་གསལ་ལོ། །
ཞེས་འཕགས་མཆོག་ཀླུ་སྒྲུབ་ཞབས་ཀྱི་མན་ངག་གོ་ཚོད་ལྟར་རིས་སུ་བཀོད་པ་དགེའོ། །
༄༅། །གཞུང་ལུགས་དག་ལ་བྱང་བྱས་ཀྱང་། །
ཉམས་སུ་ལེན་པར་མི་བྱེད་ན། །
ལག་ན་སྒྲོན་མ་ཡོད་ཀྱང་ནི། །
ལོང་བས་ལམ་ནི་མཐོང་མི་འགྱུར། །
ཞེས་པའི་བརྡ་དོན་བཀྲལ་བ་བྱང་ལེན་ཐ་དད།
ཐོས་སོགས་ཐབས་ཀྱིས་སློབ་གཉེར་ལམ་བུ་ལ། །
བརྩོན་པ་ཆེན་པོས་དོན་གཉེར་རྩེ་གཅིག་པས། །
རང་དགོས་ཤེས་བྱ་རིག་པའི་གཞུང་ལུགས་ལ། །
གོམས་ཏེ་བྱང་བ་དམིགས་པར་འཛིན་འོས་སོ། །
རྩ་བ་དགེ་བའི་བཤེས་གཉེན་དམ་པ་རྣམས། །
བསམ་སྦྱོར་གཉིས་ཀས་ཚུལ་བཞིན་བསྟེན་བགྱིས་ཏེ། །
ཡང་དག་རིག་པའི་གནས་ཆེན་ཐམས་ཅད་ལ། །
ལེགས་པར་སྦྱངས་ཏེ་བྱང་གོམས་རྙེད་དགོས་གསུངས། །
ཡོན་ཏན་དག་ལ་བྱང་ཞིང་གོམས་ན་ཡང་། །
ཉམས་ལེན་གནས་སུ་འཁྱོལ་བ་མ་བྱས་ན། །
རང་རང་ལག་ན་སྒྲོན་མ་འཐོགས་ཡོད་ཀྱང་། །
ལོང་བས་ལམ་བུ་མི་མཐོང་ཇི་བཞིན་ནོ། །
དེས་ན་ཡོན་ཏན་སྦྱོང་བའི་སྐབས་དག་ཏུ། །
ཐོག་མར་ཁྲིད་སྟོན་ནུས་པའི་བཤེས་གཉེན་དང་། །
ཚད་ལྡན་གཞུང་ལུགས་དག་ལ་བྱང་བའི་ཁར། །
ཉམས་ལེན་གནད་ཀྱི་དོན་པོར་ནན་གྱིས་གསུངས། །
ཞེས་འཕགས་མཆོག་ཀླུ་སྒྲུབ་ཞབས་ཀྱི་མན་ངག་གོ་ཚོད་ལྟར་རིས་སུ་བཀོད་པ་དགེའོ། །
འཕྲིན་སྟེགས་འདིར་དོ་ཁུར་གནང་བ་དང་བརྒྱུད་བསྐུར་གནང་བར་བཀའ་དྲིན་ཆེ་ཞུ།
