གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་བཅུ་དྲུག་གི་བྱེད་སྒོ།
ས་སྐྱ་པཎ་ཆེན་གྱིས་མཛད་པའི《མཁས་པ་རྣམས་འཇུག་པའི་སྒོ་ཞེས་བྱ་བའི་བསྟན་བཅོས》ཀྱི་གཞུང་འགྲེལ། ཉེར་དགུ་པ།
གཞུང་འགྲེལ་གནང་མཁན་དགེ་བའི་བཤེས་གཉེན་བཀའ་དྲིན་ཅན་རྒན་མཁས་བཙུན་མཆོག
ཚིག་ཀྱང་ཚོགས་པར་དབྱུང་བྱ་བ། །
ལེགས་པར་སྦྱར་དགོས་སྨད་པའི་ཚིག །
སྙན་ངག་མཁན་གྱིས་སྤང་བར་བྱ། །
སྙན་ངག་གི་སྐབས་སུ་ཚིག་ཀྱང་ཚོགས་པར་དབྱུང་བར་བྱ་བ། མཁས་པ་རྣམས་དགའ་བར་བྱེད་པའི་སྒྲ་སྦྱར་གྱི། ཚོགས་པར་དབྱུང་དུ་མི་རུང་བ་བླུན་པོ་དགའ་བ་བསྐྱེད་ཀྱང་། མཁས་པ་རྣམས་ཀྱིས་འཕྱས་གདགས་སུ་རུང་བའི་སྒྲ་མི་སྦྱར་རོ། །
དཔེར་ན་མཆོག་ལུས་ཉེར་གནས་དང་། །
བསྐུལ་དང་ཡང་ཞིང་གཡོ་སོགས་བཞིན། །
ཚོགས་པར་དབྱུང་དུ་མི་རུང་བའི་སྒྲ་ཇི་ལྟ་བུ་ཞེ་ན། མཆོག་གི་ཡན་ལག་ནི་སཾ་སྐྲྀ་ཏའི་སྐད་དུ་ཝ་རཱཾ་ག ཉེར་གནས་ནི་ཨུ་པསྠཱ་སྟེ་ཕོ་མོའི་དབང་པོ་ལ་འཇུག སྐུལ་བའི་སྒྲ་ཙོ་ད་ཡིན་ལ། འཕྲལ་སྐད་དུ་མི་ཚངས་པར་སྤྱོད་པུ་ལ་འཇུག ཡང་ཞིང་གཡོ་བ་ལ་སཾ་སྐྲྀ་ཏས་ཧ་ར་ན་ཞེས་ཟེར་ལ། ངོ་ཚ་བའི་གནས་ལ་འཇུག་མོད། ལུང་ཆོས་ལ་སྐྱོན་མེད་སྙན་ངག་གི་སྐབས་སུ་སྒྲ་སྐྱོན་དུ་བརྩི། དེ་བཞིན་དུ་སཾ་སྐྲྀ་ཏས་ནས་ལ་ཡ་བ་ཟེར། བྷ་ཡ་ཞེས་བརྗོད་ན་མི་ཚངས་པར་སྤྱོད་པ་ལ་འཇུག་པས་སྒྲ་སྦྱོར་བའི་སྐབས་ལེགས་ན་སྐྱོན་མེད་མོད། ཉེས་ན་སྐྱོན་ཅན་དུ་བརྩིབ་སྲིད། དེ་ལྟ་བུའི་སྒྲ་སཾ་སྐྲྀ་ཏ་ལ་སྐྱོན་མེད་དུ་འགྲོ།
དད་པ་ཅན་མང་བཟུང་ཉེས་ན། །
ཅིག་ཤོས་བསྲེགས་པ་སྨོས་ཅི་དགོས། །
ཞེས་བྱ་བའང་རྒྱ་གར་སྐད་ལ་སྐྱོན་ཡེ་མེད་མོད། བོད་ལ་སྐབས་འགར་བཞད་གད་དུ་འགྲོ་བའང་སྲིད། མེ་ཏོག་ཁ་འབྱེ་བ་དང་། འབྱེ་འདོད་པ་དང་། པོག་ཕོར་དང་། སྤོག་གིས་བདུག་པ་ལ་སོགས་པ་སྒྲ་ལ་སྐྱོན་མེད་ཀྱང་ཡུལ་འགའ་ཞིག་ན་ཚོགས་པར་དབྱུང་དུ་མི་རུང་བའི་ངག་ཏུ་འགྱུར་བས་སྐབས་བརྟགས་ཏེ་སྦྱར་བར་བྱའོ། །ལུང་དང་རིགས་པའི་བསྟན་བཅོས་འགའ་ཞིག་ཏུ་དཔེ་མི་མཛེས་པ་དང་། སྒྲ་ཚོགས་པར་དབྱུང་དུ་མི་རུང་བ་ཡང་དོན་ལ་རྟོན་པ་ཡིན་པས་སྐྱོན་མེད་དོ། །སྙན་ངག་ནི་སྒྲ་གཙོ་བོ་ཡིན་པས་ཐམས་ཅ་དུ་སྐྱོན་མེད་པར་སྦྱར་བར་བྱའོ། །
བསྟན་བཅོས་བྱེད་པས་ཚིགས་བཅད་དང་། །
རྐྱང་པ་དང་ནི་སྤེལ་བ་གསུམ། །
བསྟན་བཅོས་ལ་འཇུག་པ་རྣམས་ཀྱི་ལམ་ནི་གསུམ་སྟེ། ཚིགས་སུ་བཅད་པ་དང་། རྐྱང་པ་སྟེ་ལྷུག་པ་དང་། དེ་གཉིས་སྤེལ་བའི་རྒྱུན་ཆགས་བཅད་པ་ནི་ཚིགས་སུ་བཅད་པའི་ཁོངས་སུ་འདུ་ལ། རྒྱུན་ཆགས་མ་བཅད་པ་ནི་སྡེབ་སྦྱོར་རྒྱུན་ཆགས་འདྲ་བ་ལ་རྐང་པར་མ་ཕྱེ་བས་རྐྱང་པ་དང་འདྲ་བའོ། །
ཚིགས་བཅད་ལུང་ལས་གྲགས་པ་དང་། །
སྡེབ་སྦྱོར་མཁན་ལ་གྲགས་པ་གཉིས། །
བཅོམ་ལྡན་གྱི་ལུང་དང་། སྡེབ་སྦྱོར་མཁན་ལ་གྲགས་པའོ། །
ལུང་ལ་རྐང་པ་གཉིས་པ་ནས། །
བརྩམས་ཏེ་དྲུག་གི་བར་དུ་བཤད། །
བཅོམ་ལྡན་འདས་ཀྱི་ལུང་དང་། འཇིག་རྟེན་པའི་བསྟན་བཅོས་འགའ་ཞིག་ལས་རྩ་བ་གཉིས་པའི་ཚིགས་བཅད་དང་། དེ་བཞིན་དུ་གསུམ་པ་དང་། བཞི་པ་དང་། ལྔ་པ་དང་། དྲུག་པའི་བར་བར་རོ། །བདུན་པ་ཡན་ཆད་གྲགས་པ་མེད་དོ། །
སྡེབ་སྦྱོར་ཚིགས་བཅད་རྐང་བཞི་པ་། །
འཇུག་དང་རིགས་ཀྱིས་དབྱེ་བ་གཉིས། །
སྙན་ངག་མཁན་གྱི་ཚིགས་སུ་བཅད་པ་ནི་རྐང་པ་བཞི་པ་ཁོ་ནའོ། །འཇུག་པ་ཞེས་བྱ་བའི་ཚིགས་བཅད་ཡི་གེ་བགྲང་བ་དང་། རིགས་ཞེས་བྱ་བ་ཕྱི་མོ་བགྲང་བ་སྟེ། འདི་དག་ཤེས་པར་འདོད་ན་ཁོ་བོས་བྱས་པའི་སྡེབ་སྦྱོར་མེ་ཏོག་གི་ཆུན་པོར་བལྟ་བར་བྱའོ། །ལུགས་འདི་སྙན་ངག་མཁན་རྣམས་པའི་གྲུ་བོ་ཆེ་ཡིན་ཏེ། རྒྱན་ལས། སྡེབ་སྦྱོར་སྤྲོས་པ་ཞེས་བྱ་ལ། །དེ་ལ་མཐའ་དག་སྤྲོས་ཏེ་བསྟན། །སྙན་ངག་རྒྱ་མཚོ་ཟབ་མོ་ལ། །རིགས་ཏེ་འཇུག་འདོད་རྣམས་ཀྱི་གྲུ། །ཞེས་བཤད་པ་ལྟར་རོ། །
སྙན་ངག་ལ་ནི་ལུས་དང་རྒྱན། །
རྣམ་པ་གཉིས་སུ་བསྡུས་ཏེ་བཤད། །
སྙན་ངག་བསྡུ་ན་ལུས་དང་རྒྱན་གཉིས་སོ། །ལུས་ནི་འདོད་པའི་དོན་སྒྲུབ་པར་བྱེད་པ་ཡིན་ལ། རྒྱན་ནི་དེ་མཛེས་པར་བྱེད་པའི་ཚིག་དང་དཔེ་ལ་སོགས་པའི་སྦྱོར་བ་ཁྱད་པར་ཅན་ནོ། །ཚིགས་སུ་བཅད་པ་དེ་དག་ཀྱང་བརྗོད་ཚུལ་གྱི་དབྱེ་ན།
ཚིགས་བཅད་གཅིག་གི་བརྗོད་བྱའི་དོན། །
རྫོགས་པར་གྲོལ་བ་ཡིན་པར་འདོད། །
ཚིགས་བཅད་གཅིག་གི་ནང་དུ་སྐབས་ཀྱི་བརྗོད་བྱ་ཚང་བར་སྟོན་པ་ནི་གྲོལ་བ་ཞེས་བྱའོ། །
ཚིགས་བཅད་ཕན་ཚུན་འདུས་པ་ལས། །
བརྗོད་བྱ་རྟོགས་པར་རིགས་འབྲེལ་ཡིན། །
ཚིགས་བཅད་ཕན་ཚུན་བྱ་བ་མེད་ཅིང་འདུས་ནས་བྱ་བ་གཅིག་སྟོན་པ་ནི་རིགས་འབྲེལ་ཞེས་བྱའོ། །
འཕྲིན་སྟེགས་འདིར་དོ་ཁུར་གནང་བ་དང་བརྒྱུད་བསྐུར་གནང་བར་བཀའ་དྲིན་ཆེ་ཞུ།
མཐོ་འབྲིང་བོད་ཡིག་དཔྱད་གཞི་ཀུན་གྱི་ཨ་མ།
༄༅། །སློབ་ཆེན་བདེ་བགྲོད་ལམ་གསར་ལས་བཏུས། མཐོ་རྒྱུགས་རྒྱུགས་དཔེ།
《སློབ་ཆེན་བདེ་བགྲོད་ལམ་གསར》ངེས་པར་དགོས་མཁོ་ཆེ་བས་འབྲེལ་བ་གནང་ཤོག
གསར་དུ་བསྒྲིགས་པའི《མཐོང་བ་མྱོང་གྲོལ》མཚམས་སྦྱོར་སྟབས་བདེ།
