ལྷ་ས་མཐོ་འབྲིང་གཉིས་པའི་ལོ་རིམ༣ འཛིན་གྲྭ（༡༡ ）
འཆི་མེད་སྒྲོལ་མ།
ཀ་ཡེ་གསོན་དང་ཕོ་གཞོན་མོ་གཞོན་ཚོ། །
ཁ་བཤད་ལག་བསྟར་བྱེད་པ་ཕོ་རབ་ཡིན། །
ག་དུས་ཡིན་རུང་ངག་འཆལ་སྨྲ་མི་ཉན། །
ང་ཅག་ཁ་བའི་ལྗོངས་ཀྱི་ལུགས་སྲོལ་རེད། །
ཅ་ཅོ་རྫུན་གཏམ་གཡོ་སྒྱུ་ཕྲ་མའི་ལས། །
ཆ་ཙམ་གྱིས་ཀྱང་རང་གི་མིང་འཛད་ན། །
ཇ་ཁང་ཆང་ཁང་སོགས་སུ་གཟབ་གཟབ་གྱིས། །
ཉ་མོ་གསེར་མིག་ཅན་ལྟར་ཁ་རོག་སྡོད། །
ཏ་རེན་མི་ལྟར་གང་སར་འཁྱམས་བསྡད་ན། །
ཐ་མ་རྗེས་སུ་ལུས་རྒྱུར་ཐེ་ཚོམ་ཅི། །
ད་ལྟའི་དུས་འདིར་སྐལ་བཟང་ཉིས་བརྩེགས་ལ། །
ན་གཞོན་ཁྱེད་ནས་སློབ་ལ་བརྩོན་ཅིག་ཨང་། །
པ་ཕའི་རྒྱུད་བཟང་ཁྱེད་ནས་མི་འཛིན་ན། །
ཕ་མའི་དྲིན་གཟོ་ཟེར་བ་ཅ་ཅོའི་གཏམ། །
བ་དན་སྐྱ་ཟད་སྔོ་སྡུག་ཆགས་པའི་དུས། །
མ་མས་ཐུགས་ཁྲལ་མཛད་ཀྱང་རྔོ་མི་ཐོགས། །
རྩ་བ་དོར་བའི་དོན་མེད་གཏམ་གྱིས་གཅིག །
ཚ་བས་གཙེས་ལྟར་སྨྱོ་ལབ་བྱེད་དང་གཉིས། །
རྫ་རྫོར་རང་གི་གཙང་སྦྲ་མི་བཟང་གསུམ། །
ཝ་ཞྭ་ཇི་བཞིན་གོང་དུ་བསྐུར་མ་མཛད། །
ཞྭ་ཡག་གོས་བཟང་བཀླུབས་དང་རྒྱན་གྱི་མཆོག །
ཟ་རྒྱུ་མར་རྩམ་མཆོད་དང་ལུས་ཁམས་བདེ། །
འ་ཅག་བོད་པའི་ལུགས་བཟང་དར་སྤེལ་གྱིས། །
ཡ་རབས་གུས་ལུགས་སྦྱོངས་དང་ན་གཞོན་ཚོ། །
ར་ཤ་ཟ་དུས་ཁ་ལས་མིག་ཆེ་ཙམ། །
ལ་ལུང་རྒྱབ་དུས་ལས་ལ་སྒྱིད་ལུག་ཆེ། །
ཤ་ཚའི་ཁ་ནས་གཏམ་སྙན་མེད་ཟེར་བ། །
ས་སྟེང་འདི་ན་སྔར་ནས་གྲགས་པ་ལགས། །
ཧ་ཧ་འདི་འདྲའི་ཕོ་གཞོན་མོ་གཞོན་ཚོ། །
ཨ་ཧོ་རང་གི་མདུན་ལམ་གཉེར་བར་ཕེབས། །
ཟུར་ཁྲིད་དགེ་རྒན། ཉི་མ་མཚམས་གཅོད།
འཕྲིན་སྟེགས་འདིར་དོ་ཁུར་གནང་བ་དང་བརྒྱུད་བསྐུར་གནང་བར་བཀའ་དྲིན་ཆེ་ཞུ།
སྤུས་ལེགས་དཔྱད་གཞི།
