གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་ཐེངས་བཅོ་དྲུག་པ་འགོ་ཚུགས་ཡོད།
གྲོང་ཁྱེར་ལྷ་སའི་དགེ་རྒན་གྱི་རྒྱུན་མཐུད་སློབ་གསོའི་སློབ་གྲྭའི་མཐོ་འབྲིང་ཞིབ་སྦྱོང་ཁང་དང་གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་སློབ་དཔྱོད་རྟེན་གཞིའི་སློབ་གྲྭ་ལྷ་ས་གྲོང་ཁྱེར་མཐོ་འབྲིང་གཉིས་པའི་བོད་ཡིག་སློབ་དཔྱོད་ཚོགས་ཆུང་ནས་མཉམ་གཉེར་གྱི་ལྷ་ས་གྲོང་ཁྱེར་ཁུལ་གྱི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་ཐེངས་བཅུ་དྲུག་པ་སློབ་འགོ་ཚུགས་པའི་མཛད་སྒོ་དེ་སྤྱི་ལོ༢༠༢༤ལོའི་ཟླ་བ་དགུ་པའི་ཚེས་གཉིས་ཉིན་གྱི་ཕྱི་དྲོའི་ཆུ་ཚོད་གསུམ་པའི་ཐོག་གྲོང་ཁྱེར་ལྷ་སའི་དགེ་རྒན་གྱི་རྒྱུན་མཐུད་སློབ་གསོའི་སློབ་གྲྭའི་རིག་གཞུང་སྙན་སྒྲོག་ཁང་དུ་དངོས་སུ་འགོ་ཚུགས། ཐེངས་འདིའི་བྱེད་སྒོའི་ཐོག་ཏུ་གསོ་སྦྱོང་བྱེད་སྒོའི་སྒྲིག་འཛུགས་པ་དང་འཛིན་གྲྭའི་འགན་འཁུར་བ་ལྷ་ས་གྲོང་ཁྱེར་སློབ་གསོ་ཞིབ་འཇུག་སོའོ་ཡི་མཐོ་འབྲིང་སློབ་དཔྱོད་པ་ཕུར་བུ་སྲིད་ཐར་གྱིས་མཁས་དབང་དགེ་ཆོས་མཆོག་གིས་གསུངས་པའི་ལེགས་བཤད་ཀྱི་བདུད་རྩིའི་གསུང་གིས་བསུས་ཏེ། གསོ་སྦྱོང་བྱེད་སྒོའི་ནང་ཞུགས་མཁན་གྲོང་ཁྱེར་ཐད་གཏོགས་མཐོ་འབྲིང་སློབ་གྲྭ་ཁག་གི་བོད་ཡིག་རྒན་ལགས་རྣམ་པ་དང་། ལྷ་ས་གྲོང་ཁྱེར་ལས་རིགས་ལག་རྩལ་གཉིས་པའི་རྐང་འཛིན་དགེ་རྒན། ལྷ་སའི་མངའ་རིས་ཧྭའེ་པེ་ཆ་ཚང་སློབ་འབྲིང་གི་དགེ་རྒན་ཁྱོན་བརྒྱ་དང་ལྔ་བཅུ་ང་གཅིག་ལ་སྙིང་ཐག་པ་ནས་དགའ་བསུ་ཞུ་བ་དང་སྦྲགས། ལྷ་ས་གྲོང་ཁྱེར་སློབ་གསོ་ཅུད་ཏང་འཛུགས་དབུ་ཁྲིད་ཀྱིས་ཆོག་མཆན་ཐོབ་པ་དང་གཏན་འཁེལ་གནང་བའི་ཡིག་ཆའི་ནང་དོན་གསལ་འགྲེལ་གྱིས་མུ་མཐུད་དེ་འདི་ལྟའི་གསོ་སྦྱོང་བྱེད་སྒོ་སྤེལ་བའི་དམིགས་ཡུལ། གསོ་སྦྱོང་གི་ནང་དོན། གསོ་སྦྱོང་བྱ་ཡུལ། གསོ་སྦྱོང་བྱེད་སྒོ་གཉེར་སྟངས། གསོ་སྦྱོང་བྱ་ཡུལ། དེ་བཞིན་གདན་ཞུས་ཀྱི་མཁས་དབང་སོགས་སྟབས་བདེའི་ཚུལ་གྱིས་གསལ་སྤྲོས་གནང་བ་མ་ཟད། ཐེངས་འདིའི་གསོ་སྦྱོང་ནང་ཞུགས་མཁན་དགེ་རྒན་ཡོངས་ཀྱིས་གྲོང་ཁྱེར་རིམ་པའི་གསོ་སྦྱོང་བྱེད་སྒོ་འདི་ལྟའི་སྒྲིག་འཛུགས་སྒྲིག་ལམ་ལ་ངེས་པར་དུ་གྲོང་ཁྱེར་སློབ་གསོས་གཏན་འཁེལ་གནང་བའི་ཡིག་ཆ་བཞིན་ནན་སྲུང་དགོས་ཚུལ་སོགས་ནན་གྱིས་གསུང་གནང་། དེ་ཡང་ཁོང་གིས་གསུང་པའི་ནང་དོན་ཁག་སྟབས་བདེའི་ཚུལ་གྱིས་བཀོད་ན་གཤམ་གསལ།
སྔོན་འགྲོའི་གཏམ།
རང་སྡེའི་རིགས་ལ་ཞེན་པ་དཀར་པོའི་མདངས། །རང་བྱུང་སྙིང་གི་དབུས་ན་གནས་པ་འདིས། །རང་ཅག་ཁ་བ་ཅན་གྱི་སྐྱེ་འགྲོ་ལ། ། རང་གི་ནུས་པས་སྲི་ཞུ་ཅུང་ཟད་སྒྲུབ། །ཅེས་པའི་ལེགས་བཤད་ཀྱི་བདུད་རྩི་འདི་ལུང་དུ་གཡར་ཏེ། རྣམ་དཀར་དགེ་བའི་ལས་ལ་འབྲས་བཟང་སྨིན་ཞིང་། ངེད་ཅག་སླར་ཞལ་འཛུམ་བཞིན་མཚར་གྱིས་མཇལ་བར་བཀྲ་ཤིས་བདེ་ལེགས་ཞུ་ཞེས། བཀྲ་ཤིས་དགའ་བ་འབུམ་དང་སྤྲོ་བ་སྟོང་གིས་སློབ་དུས་འདིར་བསུ་བ་ཞུས་ཏེ་ངེད་ཅག་གི་སློབ་གསོ་སློབ་ཁྲིད་ལ་གཡུར་ཟའི་འབྲས་བཟང་ཐོབ་པ་དང་ཐམས་ཅད་བཀྲ་ཤིས་བདེ་ལེགས་ཡོང་ཕྱིར་འབྲེལ་ཡོད་ནང་དོན་རིམ་བཞིན་སྟབས་བདེའི་གསལ་བཤད་གནང་བ་ཡང་།
ལྷ་ས་གྲོང་ཁྱེར་ཁུལ་གྱི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་བྱང་ཚད་དང་སློབ་གསོའི་གསར་གཏོད་ནུས་པ་སྔར་བས་མཐོ་རུ་གཏོང་བ། སློབ་གསོའི་འདུ་ཤེས་དང་། སློབ་གསོའི་ནུས་པ། ཚན་རིག་ཞིབ་འཇུག་གི་འདུ་ཤེས། ཚན་རིག་ཞིབ་འཇུག་གི་ཆུ་ཚད་བཅས་སྔར་བས་མཐོ་རུ་བཏང་ནས་དགེ་རྒན་གྱི་ཆེད་ལས་འཕེལ་རྒྱས་ལ་སྐུལ་འདེད་གཏོང་ཆེད་དང་། མཐོ་འབྲིང་བོད་སྐད་ཡིག་སློབ་ཁྲིད་ཁྲོད་ཐོན་པའི་གནད་དོན་དང་ཟུང་འབྲེལ་བྱས་ཏེ། ལྷ་ས་གྲོང་ཁྱེར་སློབ་གསོ་ཅུད་ཀྱིས་སྤྱི་ལོ༢༠༢༤ལོའི་ཟླ༩པའི་ཚེས༢ནས་ཟླ་བ༡༢ཚེས༢བར་རེས་གཟའ་ཟླ་བའི་ཕྱི་དྲོའི་ལྗོངས་ཡོངས་ཀྱི་སློབ་དཔྱོད་བྱེད་སྒོའི་དུས་ཚོད་བེད་སྤྱད་དེ་མཐོ་འབྲིང་བོད་སྐད་ཡིག་དགེ་རྒན་ལ་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་བྱེད་སྒོ་སྤེལ་རྩིས་སུ་གཏན་འཁེལ་བྱས་པ་གཤམ་གསལ།
དང་པོ། གསོ་སྦྱོང་གི་དམིགས་ཡུལ།
མུ་མཐུད་དེ་ཆེད་ལས་གསོ་སྦྱོང་བྱས་པ་བརྒྱུད་མཐོ་འབྲིང་བོད་སྐད་ཡིག་དགེ་རྒན་གྱི་ཀུན་སྤྱོད་བློ་སྦྱོང་དང་སློབ་གསོ་སློབ་ཁྲིད་ནུས་པ་སྔར་བས་མཐོ་རུ་གཏོང་བ་དང་། སློབ་ཁྲིད་ཀྱི་ལྷུ་ཚིགས་ཁག་ཚད་ལྡན་དུ་གཏོང་བ། ཕུལ་བྱུང་གི་རིག་ཚན་སྣེ་ཁྲིད་པ་དང་། གྲོང་ཁྱེར་ཡོངས་སུ་རྐང་འཛིན་དགེ་རྒན་དཔུང་ཁག་དང་། ཕུལ་བྱུང་གི་དགེ་རྒན། གྲགས་ཅན་དགེ་རྒན་གྱི་དཔུང་ཁག་འཛུགས་སྐྱོང་བྱས་ནས་གྲོང་ཁྱེར་ཡོངས་ཀྱི་མཐོ་འབྲིང་བོད་སྐད་ཡིག་སློབ་ཁྲིད་ཀྱི་སྤུས་ཚད་མཐོ་རུ་གཏོང་ཐུབ་ཆེད་དུ་གསོ་སྦྱོང་བྱེད་སྒོ་འདི་སྔར་རྒྱུན་བཞིན་སྤེལ་བ་ཡིན།
གཉིས་པ། གསོ་སྦྱོང་གི་ནང་དོན།
ཐེངས་འདིའི་གསོ་སྦྱོང་གི་ནང་དོན་གཙོ་བོར། ལྟེ་བའི་བྱང་ཚད་ལྡན་པའི་དགེ་རྒན་གྱི་ཀུན་སྤྱོད་བློ་སྦྱོང་དང་སློབ་གསོ་རིག་པའི་གཞུང་འགྲེལ་གསན་སྦྱོང་། མཐོ་འབྲིང་བོད་སྐད་ཡིག་སློབ་ཁྲིད་ཁྲོད་ཀྱི་གཙོ་གནད་དང་དཀའ་གནད་གསལ་འགྲེལ། སློབ་ཁྲིད་ཀྱི་ལྷུ་ཚིགས་ལྔ་ཡི་ཕྱོགས་བསྡུས་ལག་བསྟར་བྱེད་ནུས་ཆེ་རུ་གཏོང་བ་སོགས།
གསུམ་པ། གསོ་སྦྱོང་བྱེད་སྟངས།
༡ གྲགས་ཅན་མཁས་དབང་གི་འཆད་ཁྲིད་གསན་སྦྱོང་། 《མཁས་པ་རྣམས་འཇུག་པའི་སྒོ་ཞེས་བྱ་བའི་བསྟན་བཅོས》ཀྱི་གཞུང་འགྲེལ་གསན་སྦྱོང་གིས་དགེ་རྒན་གྱི་ཀུན་སྤྱོད་དང་རིག་གནས་ཀྱི་བྱང་ཚད་མཐོ་རུ་གཏོང་བ།
༢ ཆེད་ལས་མཁས་པའི་འཆད་ཁྲིད་གསན་སྦྱོང་། སློབ་གསོ་སློབ་ཁྲིད་དང་སློབ་ཁྲིད་ཀྱི་དོན་དངོས་དང་ཟུང་འབྲེལ་བྱས་ཏེ། སློབ་ཁྲིད་ཁྲོད་ཀྱི་ཐུན་མོང་རང་བཞིན་གྱི་གནད་དོན་ལ་དམིགས་ནས་ཆེད་ལས་མཁས་པ་གདན་ཞུས་ཀྱིས་བསླབ་གཞིའི་དཀའ་གནད་དོགས་སེལ་གསན་སྦྱོང་།
༣ དཔེ་སྟོན་སློབ་ཁྲིད་ལྟ་སྦྱོང་། གྲོང་ཁྱེར་རིམ་པའི་སློབ་ཁང་སློབ་ཁྲིད་ཀྱི་འགྲན་བསྡུར་ཁྲོད་བྱ་དགའ་རིམ་པ་ཨང་དང་པོ་ཐོབ་པའི་དགེ་རྒན་གྱི་སློབ་ཁྲིད་ལ་ལྟ་སྦྱོང་བྱེད་པ། ལྷ་ས་གྲོང་ཁྱེར་གྱི་མཐོ་འབྲིང་བོད་སྐད་ཡིག་དགེ་རྒན་གྱི་ཐེངས་དྲུག་པའི་སློབ་ཚན་གླེང་བརྗོད་འགྲན་བསྡུར་ལ་གསན་སྦྱོང་།
༤ མྱོང་སྤེལ་དང་སློབ་སྦྱོང་། སྤྱི་ལོ༢༠༢༤ལོའི་མཐོ་རྒྱུགས་ཀྱི་བོད་སྐད་ཡིག་རྒྱུགས་གཞིའི་སྤུས་ཚད་དབྱེ་ཞིབ་ལ་གསན་སྦྱོང་དང་གྲགས་ཅན་བརྩམས་ཆོས་དཔེ་ཀློག་མྱོང་གླེང་གསན་སྦྱོང་།
༥ བྱང་ཚད་མཐོ་རུ་གཏོང་བ། མཐོ་འབྲིང་བསླབ་གཞིའི་རྟོགས་བརྗོད་རྩོམ་ཡིག་དང་ལེགས་བཤད་བསྟན་བཅོས་སློབ་ཚན་སློབ་ཁྲིད་ཀྱི་ཐབས་ཇུས་སོགས་ཀྱི་འཆད་ཁྲིད་གསན་སྦྱོང་།
བཞི་པ། གསོ་སྦྱོང་བྱ་ཡུལ།
གཙོ་བོ་གྲོང་ཁྱེར་ཡོངས་ཀྱི་མཐོ་འབྲིང་སློབ་གྲྭའི་ལོ་ན་གཞོན་པའི་བོད་སྐད་ཡིག་དགེ་རྒན་དང་ལྷ་ས་གྲོང་ཁྱེར་འབྲིང་རིམ་ལས་རིགས་ལག་རྩལ་སློབ་གྲྭ་གཉིས་པའི་རྐང་འཛིན་དགེ་རྒན། ལྷ་སའི་མངའ་རིས་ཧྭ་པའེ་ཆ་ཚང་སློབ་འབྲིང་གི་དགེ་རྒན་སོགས་བསྡོམས་དགེ་རྒན༡༥༢ཙམ་ཡོད།
ལྔ་པ། གདན་ཞུས་དགེ་རྒན་གྱི་མཁས་དཔུང་ཁག
ད་ཐེངས་ཀྱི་གསོ་སྦྱོང་ནང་རྒྱལ་ཁབ་རིམ་པའི་སློབ་གྲྭ་འབྲིང་ཆུང་གི་བོད་སྐད་ཡིག་དགེ་རྒན་གསོ་སྦྱོང་གི་ཉམས་མྱོང་ལྡན་པའི་གྲགས་ཅན་མཁས་དབང་། བོད་ལྗོངས་སློབ་གྲྭ་ཆེ་མོའི་རིག་གཞུང་སློབ་གླིང་གི་དགེ་རྒན་ཆེན་མོ་དང་དགེ་རྒན་ཆེན་མོ་སྐུ་གཞོན། མཐོ་འབྲིང་བོད་སྐད་ཡིག་སློབ་དཔྱོད་པ་དང་གཅིག་ལྕོགས་སློབ་དཔྱོད་པ། སློབ་ཁྲིད་ཞིབ་འཇུག་དང་ཉམས་མྱོང་ཕུན་སུམ་ཚོགས་པའི་མཐོ་རྒྱུགས་རྒྱུགས་གཞི་འདོན་མཁན་དང་མཐོ་རྒྱུགས་རྒྱུགས་བཅོས་ཕྱག་ལས་ལ་ཉམས་མྱོང་ཕུན་སུམ་ཚོགས་པའི་ཕུལ་བྱུང་དགེ་རྒན། གྲོང་ཁྱེར་ལྷ་སའི་ཁུལ་གྱི་སློབ་འབྲིང་དགེ་རྒན་ཁྲོད་ཀྱི་འབུམ་རམས་པ་དང་ཤེས་རམས་པ། མཐོ་འབྲིང་གི་ཕུལ་བྱུང་དགེ་རྒན། རྐང་འཛིན་དགེ་རྒན། ལྗོངས་དང་གྲོང་ཁྱེར་རིམ་པའི་རིག་ཚན་སྣེ་ཁྲིད་པ་གདན་ཞུས་བྱས་ཡོད་ཚུལ་སོགས་ནས་ངོ་སྤྲོད་གནང་བ་མ་ཟད། གསོ་སྦྱོང་ལ་ཞུགས་མཁན་ཡོངས་ནས་མུ་མཐུད་དེ་རྒྱབ་སྐྱོར་གང་ལེགས་དང་། དེ་བས་རྨང་གཞིའི་སློབ་གསོའི་སྤུས་ཚད་སྔར་བས་འཕེལ་རྒྱས་ཡོང་བར་རང་འགན་ཕྲག་ཏུ་འཁུར་ཏེ་རང་ནུས་གང་ཐུབ་འདོན་ཐུབ་པའི་རེ་འདུན་བཟང་པོ་ཞིག་གིས་སློབ་ཚུགས་མཛད་སྒོ་གང་དེ་གནད་འཁེལ་ཁ་གསལ་དང་། མདོར་བསྡུས་གལ་ཆེས་ཚུགས་པར་བྱས་སོང་ངོ་། །
འཕྲིན་སྟེགས་འདིར་དོ་ཁུར་གནང་བ་དང་བརྒྱུད་བསྐུར་གནང་བར་བཀའ་དྲིན་ཆེ་ཞུ།
མཐོ་འབྲིང་བོད་ཡིག་དཔྱད་གཞི་ཀུན་གྱི་ཨ་མ།
༄༅། །སློབ་ཆེན་བདེ་བགྲོད་ལམ་གསར་ལས་བཏུས། མཐོ་རྒྱུགས་རྒྱུགས་དཔེ།
《སློབ་ཆེན་བདེ་བགྲོད་ལམ་གསར》ངེས་པར་དགོས་མཁོ་ཆེ་བས་འབྲེལ་བ་གནང་ཤོག
གསར་དུ་བསྒྲིགས་པའི《མཐོང་བ་མྱོང་གྲོལ》མཚམས་སྦྱོར་སྟབས་བདེ།
