གྲོང་ཁྱེར་ལྷ་སའི་མཐོ་འབྲིང་བོད་སྐད་ཡིག་དགེ་རྒན་གྱི་ཆེད་ལས་ནུས་རྩལ་མཐོར་འདེགས་ཀྱི་གསོ་སྦྱོང་ཐེངས་བཅུ་དྲུག་གི་བྱེད་སྒོ་མུ་མཐུད་སྤེལ་བཞིན་ཡོད།
ས་སྐྱ་པཎ་ཆེན་གྱིས་མཛད་པའི《མཁས་པ་རྣམས་འཇུག་པའི་སྒོ་ཞེས་བྱ་བའི་བསྟན་བཅོས》ཀྱི་གཞུང་འགྲེལ། སུམ་ཅུ།
གཞུང་འགྲེལ་གནང་མཁན་དགེ་བའི་བཤེས་གཉེན་བཀའ་དྲིན་ཅན་རྒན་མཁས་བཙུན་མཆོག
གནས་སྐབས་གཅིག་ལ་ཡུལ་ཐ་དད། །
བྱ་བ་ཐ་དད་སྟོན་པ་མཛོད། །
གནས་སྐབས་གཅིག་ཅིང་ཡུལ་ཐ་དད་བྱ་བ་ཐ་དད་སྟོན་པ་ནི་མཛོད་ཅེས་བྱའོ། །
ཡུལ་གཅིག་བྱ་བ་དུ་མ་ཡིས། །
བསྔགས་པ་ཚོགས་པ་ཡིན་པར་བཤད། །
ཡུལ་གཅིག་ལ་བྱ་བ་དུ་མས་བསྔགས་པ་ནི་ཚོགས་པ་ཞེས་བྱའོ། །
ཚིག་དོན་ཕུན་སུམ་ཚོགས་གྱུར་ཅིང་། །
སྐྱོན་མེད་མཁས་པ་མགུ་བྱེད་ན། །
ཡོན་ཏན་འགའ་ཞིག་མ་ཚང་ཡང་། །
སྙན་ངག་སྐྱོན་ཅན་མིན་པར་བཤད། །
ཚིག་དང་དོན་ཕུན་སུམ་ཚོགས་ཤིང་། བརྗོད་ཚུལ་དང་དཔེའི་རྒྱན་ལ་སོགས་པ་ལ་སྐྱོན་གང་ཡང་མེད་ན་ཡོན་ཏན་འགའ་ཞིག་མ་ཚང་ཡང་སྙན་ངག་སྐྱོན་ཅན་མ་ཡིན་པར་བཤད་དེ། རྒྱན་ལས།
གང་ཚེ་ཉེ་བར་ཕུན་སུམ་ཚོགས། །
དེ་ཉིད་རིག་པ་མགུ་བྱེད་ན། །
འདིར་ནི་གང་འགའ་མ་ཚང་ཡང་། །
སྙན་ངག་སྐྱོན་ཅན་མིན་ཤེས་བྱ། །
ཞེས་པ་བཤད་པ་ལྟར་རོ། །
གཙོ་བོའི་ཡོན་ཏན་སྔར་བརྗོད་ནས། །
དེ་ཡི་འགྲན་ཟླ་ཟིལ་གནོན་པ། །
ཕྱི་ནས་འཆད་པའི་ཚུལ་འདི་ནི། །
སྙན་ངག་མཁན་རྣམས་ཀུན་ལ་གྲགས། །
སྔོན་ལ་གཙོ་བོའི་སྐྱོན་དང་ཡོན་ཏན་བརྗོད་ནས། ཕྱིས་འགྲན་ཟླ་ཟིལ་གྱིས་གནོན་པའམ་འགྲན་ཟླའི་བསྔགས་པ་བརྗོད་པ་ནི་སྙན་ངག་པ་རྣམས་ལ་ཐུན་མོང་དུ་གྲགས་པའོ། །
རིགས་རྒྱུད་ཤེས་རབ་ཐོས་སོགས་ཀྱིས། །
དགྲ་ཡི་ཡོན་ཏན་སྔར་བརྗོད་ནས། །
ཕྱི་ནས་དེ་ཉིད་ཟིལ་གནོན་པའི། །
སྐྱོན་ཡོན་བརྗོད་ལ་འགའ་ཞིག་དགའ། །
སྔོན་ལ་དགྲའི་སྐྱོན་དང་ཡོན་ཏན་བརྗོད་ནས། དེའང་ཁྱོད་ཀྱིས་ཟིལ་གྱིས་གནོན་ཞེས་སྐྱོན་གྱི་སྒོ་ནས་སྨོད་པའམ། ཡོན་ཏན་གྱི་སྒོ་ནས་བསྟོད་པ་ནི་ཤིན་ཏུ་མཛེས་སོ་ཞེས་མཁས་པ་འགའ་ཞིག་འདོད་དོ། །
དེ་ལྟའི་ཚིགས་བཅད་སྦྱོར་བ་ལ། །
བཻ་དྷརྦྷ་དང་གཽ་ཌ་བའི། །
ཚིག་གི་སྦྱོར་ཚུལ་རྣམ་པ་གཉིས། །
འཕགས་པའི་ཡུལ་ནི་སངས་རྒྱས་བཞུགས་པའི་གནས་མ་ག་དྷཱ་ལ་སོགས་པའོ། །དེ་དག་གི་སྙན་ངག་མཁན་རྣམས་ལ་ཚིག་གི་སྦྱོར་ཚུལ་གཉིས་ཏེ། ལྷོ་ཕྱོགས་བཻ་དྷརྦྷའི་མཁས་པ་རྣམས་དགའ་བའི་ཚིགས་སུ་བཅད་པ་ནི་བཻ་དྷརྦྷ་ཞེས་ཟེར་ལ། ཤར་ཕྒཡོསག་གཽ་ཌ་བའི་ཡུལ་གྱི་མཁས་པ་རྣམས་ལ་དགའ་བའི་ཚིགས་བཅད་ནི་གཽ་ཌ་བ་ཞེས་བྱ་བར་གྲགས་སོ། །ད་ེགཉིས་ཀྱི་ཚིག་གི་སྦྱོར་བའི་ཁྱད་པར་ཅི་ཡོད་ཅེ་ན།
བཻ་དྷརྦྷ་ལ་ཡོན་ཏན་བཅུ། །
ཡོན་ཏན་འདི་བཅུ་ཕལ་ཆེ་བ། །
བཟློག་པ་གཽ་ཌ་བ་ཞེས་བཤད། །
བཻ་དྷརྦྷའི་ཚིགས་བཅད་ལ་ཡོན་ཏན་བཅུ་དང་ལྡན་ཞིང་། གཽ་ཌ་བ་ལ་ཡོན་ཏན་བཅུ་པོ་དེ་ཕལ་ཆེར་བཟློག་པ་ཡིན་ཏེ། དེའང་རྒྱན་ལས།
འབྲེལ་དང་རབ་གསལ་མཉམ་པ་ཉིད། །
སྙནང་དང་རབ་ཏུ་བཞོན་པ་དང་། །
དོན་གསལ་བ་དང་གོ་བདེ་བ། །
བརྗིད་དང་མཛེས་དང་ཏིང་ངེ་འཛིན། །
ཡོན་ཏན་འདི་བཅུ་བཻ་དྷརྦྷའི། །
ལམ་གྱི་སྲོག་ཏུ་བཤད་པ་ཡིན། །
འདི་རྣམས་ཕལ་ཆེར་བཟློག་པ་ནི། །
གཽ་ཌའི་ལམ་དུ་མཚོན་པར་བྱ། །
ཞེས་བཤད་པ་ལྟར་རོ། །
ཤིན་ཏུ་གྲགས་པ་མ་ཡིན་པའི། །
ཚིག་སྦྱོར་ལེགས་ཞེས་གཽ་ཌ་འདོད། །
ཤར་ཕྱོགས་པ་དག་འཇིག་རྟེན་ལ་གྲགས་ཆེས་པ་མ་ཡིན་པའི་ཚིག་གི་སྦྱོར་བ་ནི་ཚིགས་སུ་བཅད་པ་འགའ་ཞིག་ནང་དུ་སྦྱར་ན་མཛེས་པའི་རྒྱན་དུ་འདོད་དོ། །
ཆིངས་དང་ཡི་གེ་མཚུངས་པ་ཡི། །
ཚིག་སྦྱོར་རྗེས་སུ་མཚུངས་ཞེས་བྱ། །
ཚིགས་བཅད་ཀྱི་སྡེབ་སྦྱོར་གྱི་ཆིངས་དང་། ཡི་གེ་མཚུངས་པར་སྦྱར་བའི་ཚིག་གི་སྦྱོར་བ་ནི་རྗེས་སུ་མཚུངས་པ་ཞེས་བྱའོ། །
ཡི་གེ་འཁོར་མོ་མཚུངས་པ་ལ། །
སྔ་མའི་འདུ་བྱེད་ཉམས་མྱོང་བ། །
མི་རིང་བར་གནས་ཚིག་མི་རྩུབ། །
དེ་ནི་ཤིན་ཏུ་བཞོན་ཞེས་པ། །
ཡི་གེ་སྔ་ཕྱི་ཕན་ཚུན་བསྐོར་བ་མཚུངས་ཤིང་སྔ་མའི་ཚིག་གིས་ཕྱི་མའི་ཚིག་ཉམས་སུ་མྱོང་བ་དང་འདྲེན་ནུས་པ་ཉེ་བར་གནས་ཤིང་། ཚིག་འཇམ་པ་ནི་ཤིན་ཏུ་བཞོན་པ་ཞེས་བཤད་དོ། །
ཆིངས་ལ་གཅམ་བུའི་སྐྱོན་མཐོང་གི །
མཉེན་པའི་སྒོ་ནས་སྐྱོན་མ་ཡིན། །
ཚིག་གི་སྦྱོར་བ་ལ་ཧ་ཅང་མཉེན་པའི་ཚིག་འགའ་ཞིག་ཡང་ཞིང་བརྗོད་ཆུང་བའི་སྐྱོན་དུ་མི་འགྱུར་རམ་ཞེ་ན། དེ་ནི་གཅམ་བུའི་སྒོ་ནས་སྐྱོན་དུ་སོང་བ་ཡིན་གྱི་མཉེན་པའི་སྒོ་ནས་སྐྱོན་དུ་འགྱུར་བ་མ་ཡིན་པར་བཤད་དོ། །
འཇིག་རྟེན་ལུགས་ཀྱི་རྗེས་འབྲངས་ནས། །
ཡང་དག་གཏོད་པར་བྱེད་པ་དང་། །
ཅིག་ཅར་དུ་ནི་ཆོས་དུ་མ། །
བརྟགས་པའང་ཏིང་ངེ་འཛིན་དུ་བརྗོད། །
འཇིག་རྟེན་གྱི་རྗེས་སུ་འབྲངས་པའི་ཚིག་གི་སྒོ་ནས་ཡང་དག་པའི་དོན་སྦྱར་བ་དང་། ཅིག་ཅར་དུ་ཆོས་དུ་མ་དོན་གཅིག་ཏུ་བརྟགས་ནས་སྦྱོར་བ་ནི་ཏིང་ངེ་འཛིན་ཞེས་བྱའོ། །
ཚིག་རྒྱན་སྦྱོར་བ་འདི་རྣམས་ནི། །
སྔོན་གྱི་མཁས་པ་རྣམས་ཀྱིས་བསྟན། །
དེའི་དཔེར་བརྗོད་པ་རྒྱན་ལས།
རི་བོའི་ངོགས་ཀྱི་ཕོང་པ་ན། །
ལྕི་བའི་མངལ་གྱིས་མནན་པ་ཡིས། །
དུབ་པས་སྤྲིན་གྱི་ཕྲེང་བ་མཁུན། །
འདི་ནི་ཡང་དག་གནས་པས་ཉན། །
ཞེས་བཤད་པ་ལྟར་རོ། །
མཉམ་གཞག་ཅེས་བྱའི་ཚིགས་བཅད་རྒྱན། །
སྙན་ངག་མཁན་རྣམས་ཐམས་ཅད་འདོད། །
མཉམ་འཇོག་ཅེས་པ་བྱ་བའི་ཚིགས་སུ་བཅད་པའི་རྒྱན་གྱི་བྱེ་བྲག་སྙན་ངག་མཁན་རྣམས་ཐམས་ཅད་འདིའི་རྗེས་སུ་འབྲང་བ་ཡིན་ཏེ། རྒྱན་ལས།
མཉམ་འཇོག་ཅེས་བྱའི་ཡོན་ཏན་གང་། །
དེ་ནི་སྙན་ངག་རྣམས་ཀྱི་ནོར། །
སྙན་ངག་མཁན་རྣམས་ཐམས་ཅད་དུ། །
འདི་ཡི་རྗེས་སུ་འགྲོ་བ་ཡིན། །
ཞེས་བཤད་པ་ལྟར་རོ། །
འདི་དག་གཅིག་གི་ཁྱད་པར་གྱིས། །
དབྱེ་ན་ཤིན་མང་མོད་ཀྱི། །
མངར་བའི་ངོ་བོའི་ཁྱད་པར་ལྟར། །
དབྱེ་བ་དཀའ་ཕྱིར་འདིར་མ་བཤད། །
ཚིག་གི་སྦྱོར་བའི་དབྱེ་བ་དཔག་ཏུ་མེད་པ་ཡོད་ཀྱང་མཁས་པ་རྣམས་ཀྱིས་རང་གི་རིག་པའི་ཤེས་རབ་ཀྱིས་ཕྱེ་ནས་རྟོགས་མོད་ཀྱི། སོ་སོའི་མཚན་ཉིད་འཇོག་མི་ནུས་ཏེ། བུར་ཤིང་དང་བུ་རམ་ཀ་ར་དང་སྦྲང་རྩི་ལ་སོགས་པའི་མངར་བའི་བྱེ་བྲག་ལྕེའི་དབང་པོས་མྱངས་པ་ན། རིག་ནུས་ཀྱི་སོ་སོའི་ངག་གི་རྣམ་པར་རིག་བྱེད་ཀྱིས་དེ་དག་གི་ཁྱད་པར་བརྗོད་མི་ནུས་པ་བཞིན་ནོ། །
