༢༠༢༤ལོའི་མཐོ་རྒྱུགས་བོད་སྐད་ཡིག་གི་རྒྱུགས་གཞིར་རགས་ཙམ་དཔྱད་པ།

འདིར་གླེང་བྱར་འགྱུར་པའི་སྤྱི་ལོ༢༠༢༤ལོའི་རྒྱལ་ཡོངས་ཀྱི་སྤྱིར་བཏང་མཐོ་རིམ་སློབ་གྲྭར་སློབ་མ་བསྡུ་བའི་གཅིག་གྱུར་རྒྱུགས་ལེན་བོད་སྐད་ཡིག་རྒྱུགས་གཞིའི་དྲི་བའི་འདོན་ཕྱོགས་ལ་གུས་མོ་རང་ཉིད་ཀྱི་རང་བློས་དབྱེ་ཞིབ་རགས་ཙམ་ཞིག་བགྱི་ཁུལ་བྱས་པས་རྒན་ལགས་རྣམས་ཀྱི་སྙན་ལམ་ལ་ཕུལ་ཆོག་པར་ཞུ།

དེ་ཡང་།  མཐོ་རྒྱུགས་ནི་རྒྱལ་ཁབ་དང་མི་རིགས་ལ་སྤྱོད་ཡོན་གཉིས་ལྡན་གྱི་མི་སྣ་འདེམས་བྱེད་ཀྱི་ཐབས་ལམ་གལ་ཆེན་ཞིག་རེད་ལ། མཐོ་འབྲིང་སློབ་མ་ཞིག་གི་ངོས་ནས་བརྗོད་ན། མཐོ་རྒྱུགས་གྲ་སྒྲིག་གི་བརྒྱུད་རིམ་ནི་སློབ་མའི་རང་འགུལ་གྱི་བསམ་པ།  གནོན་ཤུགས་ཐེགས་ནུས། དཀའ་སྤྱད་ཀྱི་བློ་སྟོབས། གནད་དོན་ཐག་གཅོད་ཀྱི་འཇོན་ཐང་། སེམས་ཁམས་སྙོམས་སྒྲིག་གི་རྩལ་ནུས། སོགས་གང་ཅིའི་ཐད་ནས་སྦྱོང་བརྡར་བྱེད་པའི་བརྒྱུད་རིམ་ཞིག་ཀྱང་ཡིན། དེར་བརྟེན། སློབ་མའི་སྦྱོང་བའི་ནུས་པ་ཙམ་མ་ཡིན་པར་དགེ་རྒན་གྱི་ཁྲིད་པའི་ནུས་པར་ཡང་བརྟག་བྱེད་ཀྱི་ཐབས་ལམ་གལ་ཆེན་ཞིག་ཡིན་པར་འདོད་དོ། །

དང་པོ། རྒྱུགས་གཞིའི་སྒྲིག་གཞི་དང་སྐར་མའི་བགོ་བགྲེམ་གྱི་སྐོར་བཤད་པ།

གཉིས་པ། དངོས་གཞིའི་ནང་དོན་ལ་འཇུག་པ།

གསུམ་པ། སླད་ཕྱིན་སློབ་ཁྲིད་ཀྱི་ཁ་ཕྱོགས་དང་ལག་ལེན་སྐོར་བཤད་པ།

གཅིག  ཉེ་བའི་ལོ་གསུམ་རིང་གི་མཐོ་རྒྱུགས་ཀྱི་རྒྱུགས་གཞི་སྤྱིའི་སྒྲིག་གཞི་ཁ་གསལ་རེའུ་མིག

གཉིས། ཉེ་བའི་ལོ་གསུམ་གྱི་མཐོ་རྒྱུགས་རྒྱུགས་གཞིའི་ཆ་ཤས་སོ་སོའི་དྲི་བའི་ཁ་གྲངས་དང་སྐར་མའི་བགོ་བགྲེམ།

གོང་གསལ་རེའུ་མིག་གཉིས་ལས་ཤེས་རྟོགས་བྱུང་བ་ནི།  གཅིག  ༢༠༢༢ནས༢༠༢༤བར་ལ་རྒྱུགས་གཞིའི་སྒྲིག་གཞིའི་ཐད་འགྱུར་བ་ཆེ་ཙམ་བྱུང་འདུག  སྐབས་སུ་བབས་པའི2024ལོའི་ཡིག་རྒྱུགས་འདིར་དྲི་གཞིའི་རྣམ་གྲངས་དེ་སྔོན་དང་བསྡུར་ན་ཉུང་དུ་ཕྱིན་ཡོད།    གཉིས། སྐར་མའི་བགོ་འགྲེམ་ཐད་ལའང་འགྱུར་བ་ཆེ་སྟེ།  ལྟ་ཀློག་དང་དབྱེ་ཞིབ་ལ་སྔོན་གྱི་སྐར༡༦ནས༢༠ལ་འཕར་བའི་འགྱུར་བ་བྱུང་ཡོད།  དེ་གཞན༢༠༢༢ནས༢༠༢༤བར་གྱི་ལོ་གསུམ་གྱི་རྒྱུགས་གཞིའི་རྩོམ་ཡིག་གི་སྐར་རིམ་བཞིན་སྐར༥༠དང་། སྐར༥༥  སྐར༦0བཞིན་རིམ་གྱིས་སྐར5འཕར་འདུག་པ་དེར་བལྟས་ན། སློབ་མའི་སྐད་ཡིག་གི་སྦྱོང་སྤྱོད། སྐད་ཆའི་གཏན་ཚིགས་དང་རྩོམ་འབྲིའི་ནུས་པར་བརྟག་པ་དེ་རྒྱུགས་གཞིའི་ཆ་ཤས་གཙོ་བོ་ཞིག་ཏུ་ངོས་བཟུང་འདུག

གཅིག  འདེམ་འཇུག་དྲི་གཞི།

    སྐད་ཡིག་རྒྱུགས་གཞིའི་འདེམ་འཇུག་གི་ནང་དོན་ནི་ཁྱབ་ཁོངས་རྒྱ་ཆེ་ཞིང་ཚད་ལེན་གྱི་ཤེས་བྱ་ཕུན་སུམ་ཚོགས་པ་ཞིག་ཡིན་ལ། དེ་ནི་སློབ་མའི་སྐད་ཡིག་གི་རྨང་གཞིའི་ཤེས་བྱ།  བསམ་གཞིག་དང་ངོས་འཛིན་གྱི་ནུས་རྩལ་སོགས་ལ་བརྟག་པའི་ཐབས་ལམ་གལ་ཆེན་ཞིག་ཏུ་འདོད། དེས་ན། 2024ལོའི་མཐོ་རྒྱུགས་རྒྱུགས་གཞིའི་འདེམ་འཇུག་ལ་སྔར་ལས་ཀྱང་དཔྱད་གཞི་ཕུན་སུམ་ཇེ་ཚོགས་སུ་བཏང་ཡོད་ལ།  དཔྱད་གཞི་དང་དྲི་གཞི། གདམ་བྱ་གསུམ་པོ་ཕན་ཚུན་ལ་མདུད་པ་དམ་པོས་མཐུད་ནས།  སློབ་མའི་བསམ་གཞིག་དང་དབྱེ་ཞིབ་ནུས་རྩལ་ལ་དཔྱོད་ཅི་ཐུབ་བྱས་འདུག

གཉིས།  སྟོང་འཇུག་གི་དྲི་གཞིའི་སྐོར།

དེ་ནི་སློབ་མའི་བློ་འཛིན་དང་ཡིད་འཛིན་སོགས་ཀྱི་ནུས་པ་བརྟག་ཐབས་ཤིགག་ཡིན། 2024ལོའི་མཐོ་རྒྱུགས་དྲི་གཞིའི་སྟོང་འཇུག་གི་དྲི་གཞིའི་འདོན་ཕྱོགས་ནི་རྒྱུན་གཏན་གྱི་མཐོ་རྒྱུགས་རྒྱུགས་གཞིའི་སྟོང་འཇུག་དྲི་གཞིའི་སྤྱིའི་འདོན་ཕྱོགས་ཀྱི་བཀག་རྒྱ་ལས་ཡོངས་སུ་གྲོལ་ཏེ། གཅིག་ནས་སློབ་མའི་སྐད་ཡིག་བསམ་གཞིག་གི་ནུས་པར་དམིགས་ནས། བློ་འཛིན་ནི་བམ་ཀློག་དང་ནེ་ཙོའི་འདོན་པ་ལྟ་བུ་མ་ཡིན་པར་དངོས་གཞིའི་ཉམས་ལེན་དོན་དུ་འཁྱོལ་བ་དགོས་རྒྱུར་དམིགས་ནས་ཡོད་པ་དེ་ཡིན། དཔེར་ན། དྲི་གཞིའི་ནང་གི་ཨ་མ་ལགས་ཀྱི་བདག་ལ་མི་ལུས་སྦྱིན་ལྟ་བུ་ལས་སློབ་མར་ཐོག་མའི་ཐེ་ཚོམ་ནས་ག་ལེར་བསམ་གཞིག་བྱེད་པ་དང་དེ་ནས་རྟགས་འཇུག་གི་རྩ་ཚིག་འདི་འབྲི་དགོས་སྙམ་པའི་གོམ་གང་མདུན་སྤོས་ཀྱི་བློས་རྩ་ཚིག་འདྲེན་པ་ལས་མཁྲེགས་སྐྱོར་མཁྲེགས་འཛིན་གྱིས་ཅིས་ཀྱང་ཕན་མི་ཐོགས་པའི་གོ་བ་བསྐོན་ཐུབ་སྙམ།

གསུམ། ལྟ་ཀློག་དང་དབྱེ་ཞིབ།

ལྟ་ཀློག་ནི་ལོང་བ་ལ་མིག་སྦྱིན་པ་དང་། བླུན་པོ་ལ་ཤེས་རབ་སྩོལ་བྱེད་ཀྱི་ཐབས་ཤིག་རེད་ལ། ཆ་འཕྲིན་འཚོལ་བསྡུ་བྱེད་པའི་ལམ་གལ་ཆེན་ཞིག་རེད། ལྷག་པར་སློབ་ཕྱིའི་དཔེ་ཆ་གང་མང་ལྟ་ཀློག་བྱེད་ཐུབ་ཚེ། སློབ་མའི་རིག་གནས་ཀྱི་ལྟ་མཐོང་ཆེ་རུ་འགྲོ་ཐུབ་ལ། ཡང་དག་གི་མི་གཤིས་གསོ་སྐྱོང་། རིན་ཐང་ལྟ་བའི་འཛུགས་སྐྱོང་།  མི་རིགས་ཤིག་གི་ལོ་རྒྱུས་དང་རིག་གནས་ལ་རྒྱུས་མངའ་ཡོང་བ་སོགས་ཕྱོགས་སྣ་ཚོགས་ནས་དགེ་མཚན་བླ་ལྷག་ལྡན་ཡོད། 2024ལོའི་མཐོ་རྒྱུགས་རྒྱུགས་གཞིའི་ལྟ་ཀློག་དང་དབྱེ་ཞིབ་ཀྱང་སྔར་གྱི་རྒྱུན་འཛིན་ལྟར་དཔྱད་གཞི་གཅིག་ནི་སྐད་ཡིག་ངེས་སྦྱོང་གཉིས་པའི་སྡེ་ཚན་དང་པོའི་སློབ་ཚན་ལམ་གྱི་ལེའུ་ལས་དྲངས་པ་དང་གཉིས་པ་ནི་བོད་ཀྱི་རིག་གནས་རྣམ་བཤད་ལས་དྲངས་པའི་བོད་ཀྱི་གནའ་བོའི་རོལ་ཆ་གླིང་བུའི་དར་ཚུལ་སྐོར་ཏེ། ཕྱི་ནང་ཟུང་འབྲེལ་གྱི་ལྟ་ཀློག་དཔྱད་གཞི་གཉིས་ཀྱི་ལམ་ནས་དཀའ་སླ་རན་ཞིང་བསམ་གཞིག་གི་རིན་ཐང་ལྡན་པའི་དྲི་གཞི་བཀོད་སྒྲིག་གནང་བ་དེ་ལས་རྟོགས་ནུས་སོ། །ལྷག་པར་དྲི་གཞི༣༣དང་།  ༣༤  ༣༨ གསུམ་པོ་ནི་སློབ་མའི་བསམ་གཞིག་དང་དབྱེ་ཞིབ།  ཕྱོགས་བསྡུས་ཀྱི་ནུས་པ་དང་། སྐད་བརྡའི་སྤྱོད་སྟངས། ཚིག་སྦྱོར་སྤེལ་སྟངས་སོགས་སྐད་ཡིག་ཅིག་གི་རྩ་བར་འགྱུར་བའི་བེད་སྤྱོད་ཀྱི་ནུས་པར་ཚད་ལེན་སྤུས་དག་ཅིག་བྱ་ཐུབ། དྲི་བ༣༦ནི་སློབ་མའི་སློབ་ཕྱིའི་ལྟ་ཀློག་གི་གོམས་གཤིས་དང་ལོ་རྒྱུས་ཀྱི་ཤེས་བྱའི་གསོག་ཚད། མི་རིགས་རིགས་གནས་ཀྱི་འདུ་ཤེས་སོགས་གསལ་བར་བྱ་བའི་མེ་ལོང་དང་གཉིས་སུ་མེད་པར་སྣང་།

བཞི། འདེམ་སྦྱོང་།

2024ལོའི་མཐོ་རྒྱུགས་རྒྱུགས་གཞིའི་ཆ་ཤས་གསུམ་པའི་འདེམ་སྦྱོང་ཀ་པ། ཁ་པ། ག་པ་གསུམ་ཀར་དྲི་གཞི་ཁོ་ན་ལས་དཔྱད་གཞི་མཁོ་འདོན་གནང་མི་འདུག་པས། དྲི་གཞི༢༡དག་འཆིང་ཐག་ལས་གྲོལ་ཏེ་རང་དབང་ཐོབ་པ་བཞིན། དྲི་བའི་རྣམ་པ་གང་སར་གྱེས་ཤིང་། སློབ་མའི་ཤེས་བྱའི་ཚད་ལེན་གྱི་ཁྱབ་ཁོངས་རྒྱ་ཇེ་ཆེར་ཕྱིན་འདུག་སྟེ།  དེའི་ཁྲོད་བརྡ་སྤྲོད་དང་ཚད་མ། ཚིག་རྒྱན་རིག་པའི་ཤེས་བྱ། བོད་ཀྱི་ལྷ་མོའི་ཟློས་གར་དང་རོལ་མོ། སྨན་རྩིས། དཀར་ཆག་རིག་པ། ལོ་རྒྱུས། རྩོམ་རིག་སོགས་རིག་གནས་ཀྱི་ཁྱབ་ཁོངས་སྣ་ཚོགས་ནས་སློབ་མའི་ཤེས་བྱ་གསོག་ཚད་ལ་དཔྱད་དཔོག་སྨན་པར་མཛད་འདུག  འོན་ཀྱང་། གལ་ཏེ་སྐབས་བབས་ཀྱི་འདེམ་སྦྱོང་ཁ་པ་རྩོམ་རིག་བརྩམས་ཆོས་མྱོང་དཔྱད་དང་ག་པ་རིག་གནས་བསྟན་བཅོས་དཔྱད་ཀློག་གཉིས་ལ་དགོས་ངེས་ཀྱི་དཔྱད་གཞིའམ་ཆ་འཕྲིན་ཞིག་མཁོ་འདོན་བྱས་ནས་དྲི་གཞི་དང་གདམ་བྱ་བཀོད་སྒྲིག་གནང་ན། བསླབ་གཞི་རང་གི་མཚན་བྱང་ཁྲོད་ཀྱི་མྱོང་རོལ་དང་དཔྱད་ཀློག་ཅེས་བཀོད་པའི་ཚིག་དང་མ་རྒྱང་བར་གནས་ཐུབ་སྙམ།

ལྔ། རྩོམ་ཡིག་འབྲི་བ།

རྩོམ་ཡིག་ནི་སློབ་མས་བྱ་དངོས་ལ་ལྟ་ཞིབ་བྱེད་པའི་ནུས་པ་དང་འཚོ་བར་ཉམས་ཞིབ་བྱེད་པའི་བསམ་བློ། སེམས་ཁམས་ལ་མྱུལ་ཞིབ་བྱ་ཐབས། དེ་བཞིན་སློབ་མའི་སྐད་ཆ་དང་ཡི་གེའི་ཉེར་སྤྱོད་ལ་སོགས་པའི་ནུས་པར་བརྟག་པའི་བརྒྱུད་རིམ་ཞིག་ཡིན།  དེས་ན་ང་ཚོས༢༠༡༩ལོ་ཚུན་ཆད་ཀྱི་རྩོམ་ཡིག་བྲི་བའི་རྒྱུ་ཆར་བལྟས་ན། ཉེ་བའི་ལོ་ལྔའི་ནང་གི་མཐོ་རྒྱུགས་རྒྱུགས་གཞིའི་རྩོམ་ཡིག་བྲི་བྱའི་ནང་དོན་གཤམ་གསལ།