作者：沈嘉禄
沪语改写：丁迪蒙
朗读：王邦基
编辑：王乙其
我爱外婆，也爱姥姥，但是，外婆搭仔姥姥还是有得区别个。
姥姥呢，欢喜吃煎饼，还要卷一根大葱進去，吃起来夸察夸察响；外婆呢？伊欢喜吃热個、脆個油条个，一口咬下去只有一眼眼，剩下来個半根冷油条，切成片，冲碗酱油汤。
姥姥开心起来欢喜吃水饺，还要剥大蒜頭，一剥就是小半碗；外婆末比较欢喜吃馄饨，荠菜加猪肉個馅頭，一碟醋是少勿了個。
姥姥欢喜拿仔大海碗吃玉米粥，吃個辰光还要发出呼噜呼噜个声音；外婆呢？伊欢喜关起门来细细叫吃碗泡饭，一块乳腐要分成两顿吃。
姥姥个老棉祆邪气臃肿，但是好像着勒海邪气自在，也老适意个；外婆歡喜着个旗袍是邪气修身个，虽然好像勿够适意，但是功架是老好个。
姥姥会得扎鞋底，葛个针脚真叫是密密麻麻，来得个结实唻；外婆呢，只会得结结绒线衫，不过花头儕蛮好看个，据说是阿尔巴尼亚花，著勒身浪邪氣得體。
姥姥屋里向养仔交關鸡，大大小小，雌个雄个侪有；外婆呢？伊每日天要出去溜溜狗，看到小区里個流浪猫，就喂伊点猫粮，实在欢喜末就领轉去了。
姥姥个衣裳着坏脱了，就自家拿伊补补好，一件衣裳要着好几年唻；外婆个衣裳呢？还蠻好勒海，伊就嫌比过时了，压压箱底打入冷宫，最後末，要末送人，要末捐撥勒贫困地区。
姥姥最欢喜吃个是大麦茶，一泡一大壶，从早浪吃到夜裏，咕噜咕噜邪气解渇呀；外婆最欢喜吃啥個呢？伊要吃咖啡個，最好还是自家现磨個，一股香味道飘到邻居屋里，香得来！
姥姥勿大欢喜读闲书，嘸没空，即使空下来，也欢喜听无线电里讲講故事；外婆呢，歡喜讀古詩、讀散文，還会講两句英格里希、萨约喔娜拉，外婆是琼瑶、三毛、张爱玲個粉丝呀！
姥姥假使开心了，欢喜唱两句梆子戏；外婆一激动末，就要来一段《桑塔露奇亚》《我爱你中国》。
姥姥欢喜外甥、外甥囡，常常塞个只熟鸡蛋拨伊拉吃；外婆欢喜外甥、外甥囡呢？爽气！进学堂了，所有費用我包脫。
姥姥出门靠走路，十一路電車慢悠悠个走，看到熟人还要讲脱兩句；外婆出门呢，叫滴滴叫差頭，地铁也便當個，路短個闲话末，看到公交车跳上去乘伊两站。
姥姥勿大生毛病，就算有毛病了也勿响，捱捱过去算了；外婆呢？伊常莊搿搭痛了，伊面勿适意了，弄得全世界儕曉得，还经常怀疑自家有眼忧郁症。
姥姥假使拨姥爷打了骂了，伊是一句閑话也勿敢讲，偷偷叫个揩揩眼泪水；外婆假使动气了，就伸出拳头去敲外公，当然手里向是晓得轻重個。
姥姥勒屋里向是勿管钞票个，要钞票了就问姥爷去拿；外婆勒屋里向只曉得用钞票，外公是勿敢囥啥個私房铜钿个。
姥姥屋里来了亲眷就要留饭，杀鸡宰白烏龜忙來半半六十天，烧仔一台子菜，还讲嘸啥好菜。外婆屋里来亲眷了，先吃茶吃水果，讲讲闲话，挨下去到附近饭店去吃饭，点兩只特色菜，吃勿脫要打包個，买单辰光要优惠價。
姥姥看到一眼眼大個官也是毕恭毕敬，诚惶诚恐，称伊拉是父母官、包青天；外婆晓得眼门前个官是啥级别個，科级、处级、局级，刷刷清，称伊拉是人民公仆，侬为人民服务，我就尊重侬，侬要是拆烂污，我就投诉侬。
姥姥看上去，像煞是外婆个姆妈；外婆看上去呢？就好像是外婆个囡儿。
姥姥搭外婆还有啥地方勿一样，请大家来接龙。但是既勿要去丑化姥姥，也勿要去丑化外婆，伊拉侪是阿拉最爱个母亲大人呀。
作者：沈嘉禄
朗读：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
