来源：新民晚报
作者：吴翼民
沪语改写、讲述：知足常乐
审核、指导：丁迪蒙
编辑：王乙其
毽子，勒江南叫“绢踢”，大概老里八早个毽子是用绢来做底砣个，上头呢插彩色个鸡毛，乃么形态轻盈漂亮，踢起来，蹲勒空中翻飞，哪能会得勿好看呢？
从前，店里向有得卖娟踢个，不过一眼也勿吸引人，因为伊拉卖个绢踢勿灵，底砣衬个是铁板垫圈，鸡毛个颜色是染出来个，根本勿及自家做个活泼，漂亮。自家做个绢踢，底砣用个是“铜板”，上头插个是大公鸡个鸡毛，挺拔有弹力，威风凛凛弹眼落睛。侬好试试看，拿自家做个绢踢倒摆勒地浪，伊马上会得弹起来笔笃直立勒海，阿拉小辰光试一趟灵一趟，还要妗夹夹报出自家绢踢个鸡毛是从啥人家个大公鸡身浪拔下来个。
拔鸡毛侪要等到过年杀鸡个辰光。大家侪拎得清，弄堂里向阿里几家人家是养公鸡个，因为伊歇辰光养公鸡个人家少呀，公鸡末只吃食勿生蛋，老清老早还要哇啦哇啦，拿大家吵醒，伊歇辰光家家人家侪有闹钟，啥人还稀奇公鸡报晓啦？养公鸡只有三种用场，一是过年辰光祭祖，板要用“元宝鸡”个；二是用来留种，搿就要用特别结棍个公鸡；三是用公鸡来保护小鸡——有种人家每年侪要自家孵小鸡个，公鸡就要担负起“爷”个职责，防止“子女”拨狗啊猫啊或者黄鼠狼咾啥个侵害，更加要防备天浪向个老鹰，突然飞下来叼脱小鸡。阿拉屋里对过开黄包车行个袁家，伊拉屋里搿只公鸡就告一只突然飞下来个老鹰搏斗过个，小鸡倒真个是毫发未损，乃么“爷”受伤了，翅膀浪，脚浪侪拨老鹰啄伤脱了，走起路来一翘一翘，罪过八蜡个。葛咾伊也就拨阿拉搿排小鬼头盯牢了，长得介海威，又斗败过老鹰，估计伊个主人会得勒过年个辰光拿伊来祭祖个。
终于到了埃年脚跟，邻居单身汉阿大忙煞了，平常辰光伊从大饼店批发眼大饼油条咾啥，穿弄堂小本经营，到了年夜脚跟，伊就一家一家帮人家杀鸡，伊勿收钞票，只要主人屋里拿血、头、屁股搭仔肚肠咾啥送拨伊就好了。我看见伊个灶披间里挂仔老大一串鸡头告鸡屁股，过年个辰光伊就好咪咪小老酒了。阿拉搿帮小鬼头就跟牢仔阿大，去拔最漂亮个鸡毛。阿大也交关自豪，让阿拉跟牢伊寻公鸡开刀。真个呶，车行老板屋里请阿大去杀伊拉搿只拨老鹰啄伤脱个“伟丈夫”大公鸡了，阿拉迓勒门板后头看勒海。伊刚刚解脱鸡头颈，一只口哨，阿拉就从暗角落里翁出来，拿搿只鸡团团转转围牢，七手八脚去拔伊头颈浪搭仔和尾巴浪个羽毛，搿羽毛真个是又漂亮又威风，侬想，百分之百是活杀个公鸡羽毛噢！
埃趟拔个鸡毛真个海威，做出来个绢踢只只精神抖擞，再加上过年了，每个小囡侪着仔新个蚌壳棉鞋，搿种棉鞋搭绢踢是好搭仔哎，踢个辰光“咚”、“咚”个声音覅忒好听哦！
伊歇辰光，家家人家准备过年了，屋里向侪飘出来香香浓浓个年夜饭味道，弄堂里个小鬼头侪勒白相绢踢，有单踢个，有对踢个，也有群踢个；有平踢个，也有跳起来飞踢个，拿绢踢踢得五彩缤纷，还要唱踢绢踢个歌谣唻——磨刀，合盘，摇堂鼓，划龙船，绢踢踢得高，家家蒸年糕，绢踢踢得低，人人穿新衣，绢踢踢到彩云里，家家迎来好福气。
勒勒踢绢踢个歌谣里，新年个脚步就迭能来了，来了……
作者：吴翼民
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
