來源：上海老年報
作者、滬語改寫及講述：孔曦
文字、語音審核：丁迪蒙
編輯：王乙其
毛巾是只猫，是“猫精”個谐音。伊其实戆来西个。2006年，囡兒中考结束搿日天，阿拉勒马路边浪拾著个。
搿辰光，屋里向有只养仔六年个京巴狗“撸撸”。撸撸闻着猫个气味，想盡辦法要咬煞伊。小猫一眼一眼长大，三个号头一过，就长得老漂亮了。伊跳上跳下，啃吊兰，抢狗窟，从此，阿拉就叫伊“毛巾”了。
毛巾八个号头大，開始发情，勒牛皮包浪惹仔泡老臭个尿，拨我送到宠物医院驐脱了。
后首来，屋里向陆陆续续來了马小凡、三顺，還有七七八八中转救助個流浪猫。
第一趟看到新来个马小凡搭仔橘猫“发财”，毛巾气得唻钻勒被头下頭睏仔两日两夜。挨下来，伊开始追牢仔新来个猫打伊拉，當仔老大。
马小凡、三顺侪会得拍马屁，毛巾老犟个。伊小辰光只要觉着冤枉了，定规要扑上来，抱牢我個脚，一本個咬一口，再肯放过我。其他猫来了之后，伊勿咬我了，但是勒伊个眼神里向多了委屈。
毛巾搭我最亲，马小凡、三顺搭囡兒亲。有趟，囡兒出门几日天，马小凡马上跑过来拍我马屁。我讲拨囡兒听，伊讲：“呒没良心个！”我穷笑八笑：“猫咪勿侪是迭能个嘛？”囡兒讲：“侬勿勒屋里，毛巾呒没来讨好過。”
2016年，毛巾生了口炎，馋唾水嗒嗒滴，瘦得来邪氣难看，一家头蹲勒三层个笼子里。屋里猫咪多，我曾经想算了。网名叫“白丁”个猫友是毛巾个粉丝，常庄问起伊，促使我下决心带伊到宠物医院去。院长讲要全口拔牙，有80% 看好个希望。
手术做好之后，毛巾一只前脚插仔留置针，24个钟头吊盐水。整整要吊一個禮拜。我去看伊，伊住勒50公分见方个笼子里，笼子叠仔三层，伊勒最下头。一走进病房，我就听到伊哑壳壳朝牢我叫。搿个辰光我觉着，出介許多钞票搭精力帮伊看毛病，是值得个。
出院以后，毛巾個口炎好仔勿少，但是还嘸没好透。囡兒天天背伊到医院去打针吊盐水。后首来，伊又吃仔几个号头个药。
有一年，因为一桩影响后首来好几年个大事体，我扑勒枕头浪穷哭，只有毛巾跳到床浪向，轻轻叫舔我个面孔。
介许多年数了，毛巾每日天夜里侪睏勒我个枕头边浪。前年仔小白龙来了，一眼一眼個抢伊个地盘。勒猫个世界里，呒没尊重长辈个讲法。
2024年春天开始，我醒勒海个辰光，伊常庄过来扑勒我个胸口，两只脚搭勒我個肩胛浪。我隐隐叫觉着，伊勒搭我告别。
屋里向猫咪一多，阿里一只吃得多，阿里一只吃得少，勿大容易发觉。毛巾连得罐头也勿大吃，我當是伊是嘴巴刁，直到看见伊一直扑勒阳台花架浪向晒太阳，还常庄拿背脊骨对牢我，一天比一天瘦，再发觉要坏事体了。再一想，伊18岁了，就让伊静静叫离开伐。就迭能过仔十几日，到最后，伊已经呒没力气跳到床搭仔沙发浪了。想想还是勿舍得，再到医院去，验血、做B超，医生讲肝有眼问题，决定插管子鼻饲，留置针吊盐水。前头两天還蛮好，第二日下半天伊还有力气打人。
第三天早浪向，就勒我搭医生侪认为伊好挺过来个辰光，手机屏幕浪跳出条微信，讲伊心力衰竭，呼吸微弱。等我赶到宠物医院，伊已经走脫了。
回想前头一天個夜快头，我去看伊，伊勒勒发脾气。看见人就哈，看见要喂伊个调羹就打。抱出笼子灌食灌水也勒哈人，尾巴穷摇八摇——毛巾是勒勒告诉我，覅再折腾伊了，伊要静静叫个走……搿个一刻，我真個是老理解伊眼求医生勿惜代价救亲人个家属，理解伊拉个纠结搭仔悔恨。
毛巾，谢谢侬陪仔我18年零3个号头，但願侬早一眼到喵星浪去。假使讲真个有下一世，阿拉仍旧做娘搭儿子。
作者及講述：孔曦
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
