作者：郑自华
沪语改写：周红缨
推荐与审核：丁迪蒙
编辑：王乙其
1997年，我第一趟搬场，虽然面积勿大大，五十多平方，但也让我心满意足了。饱暖思淫欲，干脆养只宠物伐。于是，用1块洋钿买了兩隻硬币大小个巴西彩龟。
彩龟一天天大起来了,啥人晓得，烦恼也多起来了，屋里风波勿断。
先是太太搭仔囡儿联合起来对我有意见。乌龟日长夜大，胃口大勒吓人，两只乌龟勒整个进食期（5月到9月），每日天要吃脫手节头大小个鱼8—10条。吃好要排泄个呀，乌龟又勿像猫狗好训练定时、定点排泄，拆尿拆污侪勒鱼缸里，搿还勿算，尿、污拆好，伊还要勒鱼缸里折腾，鱼缸变成功粪缸，臭得勿得了，大热天假使没及时调水，搿味道真个难闻。两位女同胞嫌比龌龊，调水搭仔汏鱼缸个光荣任务只好我来承担了。
搿兩隻乌龟还勿晓得好坏，我刚刚拿清爽水调好，还没来得及转身，又拆了。只好再调水。太太拉勿开心了，牵我头皮，讲我囡儿小辰光汏尿布也没介卖力，讲我待乌龟比待伊拉要好。
勒老房子个辰光，我拿乌龟个房间擺勒只角落里，可以讲是“暗无天日”，舊年搬场，彩龟住到大阳台去了，变成解放区个天，伊拉交关活跃，日日“翻身道情”。竟然拿鱼缸当作军事操练场，厚厚叫个甲殼像煞装甲坦克，移动方步，轰隆隆、轰隆隆，沉甸甸个。
练兵也就算了，还要搞爬坡动作，只看见伊拉前肢努力攀牢鱼缸顶端，后肢拼命个撑勒海，并歇勿歇试探越过“山头”，想想伊拉真笨，迭能翻下去，勿是要掼个半死？小东西一点也勿顾自家风险，常庒“哐啷”一声，仰面倒下来，虽然笨重，倒也灵活，只看见后脚用力顶牢鱼缸，头借力，再加上前脚帮忙，老快就翻过身来了。没多少辰光，好仔伤疤忘記痛，又当敢死队了。
囡儿提强烈抗议了。原来，乌龟个鱼缸离囡儿个闺房只有几步之遥，乌龟勿识辰光又勿看山水，每日天天一亮就大搞军事演习，拿我个宝贝囡儿個美梦吵醒。囡儿搭我发通牒，让我勒伊搭仔乌龟之间做选择，我只好再次拿乌龟搬迁，搬到书房搭我作伴。
搿记更加闹猛了，书房里整天听见乌龟个声音。我呢，有声音偏偏是写勿出物事个，现在拿自家套牢了。送人伐，毕竟养仔七八年了，留下来伐，添了介许多個烦恼。
唉，烦人个乌龟啊!
作者：郑自华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
