推荐与审核：丁迪蒙
编辑：王乙其
夜快头，小区业主群里，又闹猛起来了。
原因是，有只猫叫春——噢，勿对，应该是“叫秋”，现在是深秋了。搿位讲：“啥人家个猫啊？叫个勿停。”伊個讲：“是個啊！没完沒了了，勿是扰民嘛？”挨下来，有人讲：“是楼下头个野猫？有人每日天勒喂流浪猫狗唻。”搿句闲话一讲末起蓬头了：“真是吃饱饭没事体做！”“迭个勿是拿安全隐患招得来了么？”……
一个个义愤填膺、义正辞严。拨伊拉一讲，像我搿种难板会得接济小流浪猫个只好勿响，好像做了啥坏事体，常怕拨人家捉牢。
因为担心埃只小猫，伊为了一己私欲、触犯众怒了，还没等看光聊天记录，我就急呴呴下楼，想去寻着伊、劝劝伊。月色真好呀，索性散散步伐。
但是，即使是皓月当空，我最后还是没寻着埃只猫。勒屋里，猫个声音像煞就勒边浪，听得邪氣清爽，一到外头，倒像煞勒天边了。为了平息众怒，让小猫勿至于当天夜里就一命归天，我勒群里回了句：“搿是猫咪发情，用勿着几化辰光就会得好个。”
结果呢，迭个一夜天，软绵绵、凄怨个猫叫声勿绝于耳，如泣如诉。乃末，我睏勿着了。脑补了各种第二天业主群里沸腾个情景，也罪过埃只勿晓得控制欲望个小猫，伊个命大概勿会得长久了，更加担心其他猫咪也会拨牵连。
迭个勿是呒没先例個。之前有只小小個流浪狗出现勒小区里，引起轩然大波，业主群围绕小狗个生死展开了剧烈個爭论，一时头浪分为“主杀派”搭仔“主放派”，各执一词，争论勿休，也曾经牵连到別個狗。差眼上升为“人身攻击”、推板一眼伤了和气。 睏勿着觉，我免勿了胡思乱想。想發想發天亮了。我拿起手机看：群聊更新了！一个讲：“猫叫了一夜天。“另外个讲：“是個啊，就勒阿拉楼浪。”原来是家猫。估计迭句闲话扫了邻居个兴，马上就调频道，切换到早高峰堵车之类个话题了。
亏得是家猫。杨绛先生讲得对：“打猫也要看看主人個面唻！”
我一记头想起，有年熱天上瑜伽课辰光个一桩事体。课程馬上要开始，教室里飞进來一只蹔蝍，我最吓小虫子了，马上逃出去叫店长过来帮忙。店长笃悠悠抽仔两张纸巾进来，勒蹔蝍面前蹲下来，小心个扣牢伊，兩只手捧到窗门前頭、朝天浪轻轻叫一抛。挨下来，伊转过身、笑眯眯个讲：“伊是无意冒犯，勿晓得阿拉个存在。”
是個啊，阿拉又晓得啥個呢？拉开窗帘布，阳光洒进来了。
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
