作者：沈嘉禄
沪语改写、诵读：李群
文字、语音审核：丁迪蒙
编辑：王乙其
往期回顾：过年也有尴尬个事体（上）
前头讲过，埃個辰光过年一般勒屋里向請客個，所以有種人家会得备一只圆台面，往八仙桌浪一搁，軋一軋好坐十二个人。阿拉屋里也有只圆台面，节假日里派派用场，也欢迎邻居来借，平常辰光对折，成為半月形贴墙璧挂勒走廊里，勿占啥地方、勿影响人個出入。
有一年，发现箍牢圆台面个竹爿有得一段烂脱了，我就从建筑工地拾来了一根搭脚手架个毛竹，劈开之后削削薄，再借锯子来，准备锯出两只斜角好对接起来，看上去有点“匠心精神”，勿晓得竹头石骨挺硬，锯子跳脱，一记头拿我個手背锯出一道老深個伤口，血翁出來了噢。快點到曙光医院去，偏偏急诊大厅勒勒扩建，没人接诊，再血淋溚滴赶到西藏中路浪个红光医院，缝仔两针。搿年過年，我用一只手炒了三桌小菜，姆妈甘当下手，汏、切、端盘子，儕听我指挥。
到现在，左手個手背浪搿条有點隆起來個疤痕还像地图浪个喜马拉雅山脉，有东西走向个清晰提示。
再讲桩事体。1973年大年夜个下半天，外头有得稀稀拉拉个鞭炮声响起来，我搨好蛋饺、舂好芝麻，拿水磨粉也装到布袋袋里挂到阳台浪去沥水。然后就来煞勿及拿出了《宋诗一百首》。迭個是《唐诗一百首》个姐妹书，大小厚薄搭后来常见个五角丛书类似，我是从好兄弟手里夺過来个，讲定初二一清早还拨伊，后头还有好几个同学等勒海。到手之后，摇头晃脑读仔一遍，就开始拿伊抄到笔记簿浪了。呒没想到抄到大年夜个夜快头，笔记簿就满了，还剩下來十几首没着落，我快點跑到外头去买簿子。
附近个几家文具店侪关门大吉，贴了封条了，只好到老西门一带去瞎撞撞，真巧，青莲街浪有一爿半开间门面个文具店，严格来講是烟纸店，柜台浪有装敲扁橄榄搭桃板個玻璃瓶，伊还没上排门板。
像煞是家个体户，前頭是店、后頭是居室，临街面有只玻璃柜台，最下頭一格剛好有得我急需个黑顏色硬面抄。店主是个五十岁左右个男人，伊勒煎带鱼，腥氣味道个老老小个油泡泡勒空气裏飞舞，伊拿镬铲举起來晃了晃：“打烊唻，阿拉也要过年个呀”。
我挜求伊：“侬就帮我拿拿好唻，就勒勒最下头一层呀，举手之劳嘛。”
“好好好，”店主用油滋滋个手拿硬面抄拿出來往柜台浪一厾，老老厚個灰尘一记头扬起来，我差点呛着，再细细叫看簿子，内芯个纸头也泛黄了。但是，搿是最后一本，我沒辦法挑三拣四個，拨了伊三角七分拿仔就跑，埃個辰光个開心啊，現在回忆起来，还是让人觉着老感动、老兴奋个。
“爆竹声中一岁除，春风送暖入屠苏。千门万户曈曈日，总把新桃换旧符。”再讲，勒万家灯火个背景里，我汗涔涔个回到了屋里向。啊呀，姆妈急得來头头转：“侬到阿里搭去白相啦，熏鱼还没汆，已经拨野猫叼脫一块肚当肉唻！”
过年碰着个尴尬事，是一杯杯苦涩个酒，但是，经过半个世纪个陈化，越来越清冽香甜，让我品出了岁月本真个味道。勒物质匮乏里寻求卑微个满足，勒形而下個层面，可以演绎为对体面生活个修复；勒形而上個层面，则有得更加丰富个内涵，其中包括对美好事物搭温馨场景个怀念。
現在，物资过于便捷、任性、草率个获得搭仔消耗，勿仅会得影响阿拉对生活个体验深度，还将會钝化阿拉对更高层面个审美敏锐，包括人情味——勿晓得年轻個朋友也有得搿种感觉伐？
作者：沈嘉禄
诵读：李群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
