作者：吴翼民
沪语改写：叶红
讲述：金福才
文字、语音审核：丁迪蒙
编辑：王乙其
勒勒记忆里，老底子个路灯侪是昏昏黄黄个，像煞是打瞌冲个人个眼睛。随牢仔时代个进步，路灯也勒勒勿断个变化，直到今朝，城市里向个路灯真个是亮丽多彩，勿但光照亮丽，而且形态也是婀娜多姿个。
但是，我仍旧常庄会得想念老底子个路灯。
老底子路灯个式样侪是邪气老式个，挂勒木头电线杆浪，就像树藤浪向结个扁南瓜，搪瓷个灯罩加上圆灯泡，又好像是戴勒凉帽个小人，十五或者是二十五支光，暗黜黜个，只好照牢仔马路，人走勒路浪，灯光拿人个影子一歇歇拉长一歇歇缩短；灯昏昏，人昏昏，弄堂口卖柴爿绉纱馄饨或者糖粥个骆驼担个竹梆声也是昏昏个，迭个是冬天夜里个城市个夜色。
假使到了夏天，夜里向个路灯下头则是交关闹猛。虽然光线邪气暗，但灯光下头到处勒勒涌动活力。先是唱小热昏，卖梨膏糖个艺人跟牢仔刚刚亮起来个路灯摆开场子了，一盏汽油灯“刷”一记个亮，拿路灯镀得雪亮，小锣勒“当当”，绰板是“嚓嚓”，就有了一大批小囡围上来了。小热昏艺人登台表演，无非是俚语俗谈，滑稽段子，打“擦边球”个荤段子时勿时抛出，当然，也不乏有时新个曲子，挨下来卖关子，兜售梨膏糖。兜售过后再来几段，再卖关子再兜售，搿能样子周而复始，直到汽油灯熄灭，昏黄个路灯仍旧影影绰绰。伊拉撤摊走人，散场个人群勒路灯下头打呵欠回屋里去。
迭个辰光再发现，有些老人勒路灯下头着棋，真个是兵来将挡，着得邪气激烈，灯昏黄，照明着棋足够了。假使入秋了，依伊拉个棋盘浪一番杀伐，棋子未损，竟然满盘侪是小青虫个尸体。
昏黄个路灯更加是小囡个世界，集中展示勒木拖板个喧闹声里。迭个辰光，大人小囡着了木拖板，简单凉爽，走勒弹格路浪邪气热烈，假使聚起来，可以讲是威武雄壮。迭个辰光只要某个小囡王一声号令，就有十几个小囡聚集到伊个旁边，好像组合了一支骑兵，“马蹄声”大作，行进勒勒大街小巷，声势真是大呀！小囡王有各种口令，遵照口令，小囡就拿木拖板走出各种姿态，发出各种声音。勿要小看搿区区一双木拖板，假使聚合起来，就是一支骑兵队伍个气场。木拖板队伍穿街走巷，到啥地方侪是威猛壮烈，昏黄个路灯好像也为之一振。
阿拉通常从城北跨塘桥出发，走到齐门大街。齐门大街向来冷冷清清，只要木拖板队伍卷来，街道为之震动，连路灯也闪起吃惊个目光，目送阿拉到齐门城墙之下，阿拉就沿牢城墙改道齐门下塘回来。下塘也是弹格路，木拖板踏勒海一样个威武。搿搭个电线杆要矮眼，路灯也矮了交关，相对显得明亮。但是，当阿拉个木拖板走到一个河边浪，侪勿由自主个放轻脚步了，为啥？因为搿搭个一根电线木头下头经常好看到一个小姐姐勒路灯下头看书，写字。头一趟看到伊，小囡王就作了个“嘘”个噤声动作，阿拉侪放轻脚步，木拖班贴牢仔鞋底勿再放肆，轻手轻脚走过伊个身边。后来好几次路过，伊偶尔会得朝牢仔阿拉微微一笑。
交关年数之后，我仍旧会得想起齐门下塘河边路灯下头写作业个小姐姐。
作者：吴翼民
讲述：金福才
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
