بۇزۇقچىلىق ۋە بەدەل
(رومان)
ئاپتورى: مۇ رېن
ئالدىنقى قىسىم: بۇزۇقچىلىق (274): ئۇنىڭدىن ئۆچ ئالامسىز؟
3-بۆلۈم 117-باب: ئۇ سىزنى ئاسانلىقچە بوش قويۇۋەتمەيدۇ
چياۋ لى خاتا ھالدا ساۋ مىڭيىنىڭ ئۇنىڭغا 500 مىڭ يۈەن بېرىشنى چاقچاق دەپ بىلىپ، ئۇنىڭ بىلەن بەك جىق پاراڭلىشىشنى خالىمىدى. ئەسلىدە ئۇ ساۋ مىڭيىنى تېزدىن تۈرمىگە تاشلاپ، ئۆزىنىڭ قىساسىنى ئېلىپ، كۆڭلىدىكى نەپرىتىنى تۈگەتمەكچى بولغان.
شۇڭا ئۇ بايا ئۆزىنى بىخەتەرلىك قاپچۇقى ئالغىلى چىقىمەن دەپ يالغان ئېيتىپ، ئەمەلىيەتتە سىرتقا چىقىپ ساقچىغا تېلېفون قىلىپ، ئاندىن ئايرىمخانىغا قايتىپ كىرىپ ئۇنىڭ بىلەن يېقىنچىلىق قىلىپ، ساقچىلار كىرىپ ئۇلارنى تۇتماقچى بولغاندا، ئۆزى پۇرسەتتىن پايدىلىنىپ ساۋ مىڭيىغا قارا چاپلاپ، ساقچىلارنىڭ ئۇنى تۇتۇپ كېتىشىنى ئېيتماقچى بولغان.
ئويلىمىغان يەردىن، ئۇ ئىشىكتىن چىقىپلا چېن بىڭغا سوقۇلۇپ كېتىپ، زىيانكەشلىككە ئۇچرىغان بۇ ئىككى ئايال ئىشنىڭ جەريانىنى بىر-بىرىگە سۆزلەپ بەرگەندىن كېيىن، ئىككىيلەن ھەمكارلاشماقچى بولدى. چېن بىڭنىڭ ئاغزىدىن ساۋ مىڭيىنىڭ قۇرۇلۇش نازارىتىنىڭ مۇئاۋىن نازىرى ئىكەنلىكىنى بىلگەندىن كېيىن، چياۋ لى دەرھال قارارىنى ئۆزگەرتتى.
ئۇ ساۋ مىڭيىدىن ئىبارەت بۇ قېرىنىڭ يالغان سۆزلىمىگەنلىكىنى، ئۇنىڭغا پۇل تېپىپ بېرەلەيدىغانلىقىنى ھېس قىلىپ، ئۇنىڭ بىلەن داۋاملىق ئالاقە قىلىپ، ئۇنىڭدىن مەلۇم مىقداردا پۇل ئۈندۈرۈۋالغاندىن كېيىن، ئاندىن پۇرسەت تېپىپ ئۇنىڭدىن ئۆچ ئېلىشنى قارار قىلدى.
شۇڭا، ئۇ چېن بىڭغا ئۆزىنىڭ ئالاقىلىشىش ئۇسۇلىنى قالدۇرۇپ قويۇپ، چېن بىڭنى ئۇزىتىپ قويغاندىن كېيىن، KTV ئايرىمخانىسىنىڭ 406-نومۇرلۇق ئۆيىگە قايتىپ كەلدى.
چياۋ لىنىڭ ئايرىمخانىغا كىرگەنلىكىنى كۆرگەن ساۋ مىڭيى تاقەتسىزلىك بىلەن ئۇنىڭدىن سورىدى.
-سۆيۈملۈكۈم، سىز چىقىپ بىخەتەرلىك قاپچۇقى ئەكىرىمەن دېگەنتىڭىزغۇ؟ قاپچۇقچۇ؟
چياۋ لى ئۇنىڭ يېنىغا كېلىپ ئولتۇردى ۋە پەس ئاۋازدا ئېيتتى:
-مەن سىرتقا چىققاندىن كېيىن، تۇيۇقسىز بىر ئىش ئېسىمگە كەلدى، بىز ئىلگىرى بىللە بولغان چاغدا، سىز ئۇنى ئىشلەتسىڭىز بىئارام بولىدىغانلىقىڭىزنى ئېيتقانتىڭىز، شۇڭا ئەكەلمىدىم...
-يەنىلا سىز مېنى چۈشىنىسىز!
ساۋ مىڭيى شۇنداق دېگىنىچە قولىنى سوزۇپ ئۇنى قۇچاقلىدى.
-ئالدىرىماڭ، بۈگۈن كەچ مەن پۈتۈنلەي سىزگە تەئەللۇق، ھازىر ۋاقىت تېخى بالدۇر، بىز ئاۋۋال ھاراق ئىچىپ، ناخشا ئېيتىپ، كەيپىياتىمىزنى تەڭشىۋالايلى!-دېدى چياۋ لى ئەركىلەپ تۇرۇپ.
ئۇ سۆزلەپ بولغاندىن كېيىن، قىزىل ھاراق قاچىلانغان بىر رومكىنى كۆتۈرۈپ، ساۋ مىڭيىغا تۇتتى.
-قېنى، بىزنىڭ قايتا جەم بولغىنىمىز ئۈچۈن كۆتۈرەيلى!
ساۋ مىڭيىمۇ چاي ئۈستىلىدىكى بىر رومكىنى كۆتۈرۈپ، چياۋ لىنىڭ قولىدىكى رومكىغا تەگكۈزدى، ئاندىن رومكىدىكى ھاراقنى بىر تىنىقتىلا ئىچىۋەتتى. چياۋ لىمۇ ناھايىتى ئوچۇق ھالدا رومكىدىكى ھاراقنى ئىچىۋەتتى. ئاندىن ھاراق ئارىلاشتۇرۇلغان ئەينەك قاچىنى ئېلىپ، ئايرىم-ئايرىم ھالدا ئىككى رومكىنى تولدۇرۇپ، ساۋ مىڭيىگە يەنە ئىككى رومكا ھاراق تۇتتى.
ئۈچ رومكا ھاراقتىن كېيىن، ساۋ مىڭيى قىزىرىپ كەتتى. چياۋ لى ساۋ مىڭيىنىڭ خېلى مەست بولۇپ قالغانلىقىنى كۆرۈپ، ئۇنىڭغا قاراپ ئېغىز ئاچتى:
-لاۋ ساۋ، كۆرۈشمىگىلى ئىككى يىلدىن ئاشتى، لېكىن سىز ئازراقمۇ سەمىمىي ئەمەس بولۇپ قاپسىز!
-مەن قانداق سەمىمىي ئەمەس بولۇپ قاپتىمەن؟-دەپ سورىدى ساۋ مىڭيى چۈشەنمىگەن ھالدا.
-سىز ئېنىقلا ئۆلكە مەركىزىگە قايتىپ قۇرۇلۇش نازارىتىنىڭ مۇئاۋىن نازىرى بولغان تۇرۇقلۇق، قانداقسىگە پېنسىيەگە چىققان بولىسىز؟-دەپ سورىدى چياۋ لى كۈلۈپ تۇرۇپ.
-ھە؟ بۇ ئىشنى سىز قانداق بىلدىڭىز؟-دەپ سورىدى ساۋ مىڭيى ھەيران بولغان ھالدا.
-مېنىڭ كىمدىن ئاڭلىغىنىم بىلەن كارىڭىز بولمىسۇن، سىزدىن سوراپ باقاي، زادى مۇشۇنداق ئىش بارمۇ؟
چياۋ لى ئۆزىنىڭ بايا چېن بىڭ بىلەن ئۇچرىشىپ قالغانلىقىنى ئېيتقۇسى كەلمەي، ئۇنى ئاشكارلىمىدى.
-مۇشۇنداق ئىش بار، شۇ يىلى مەن ئىنتىزام تەكشۈرۈش كومىتېتىنىڭ جازالىشىغا ئۇچرىغاندىن كېيىن، ھەقىقەتەن ئىدارىدىن ئىش ھەققىمنى توختىتىپ، ئۆيدە ئىش كۈتۈپ، مۇددەتتىن بۇرۇن پېنسىيىگە چىقىشقا تەييارلىق قىلدىم، ئالدىنقى بىر مەزگىلدە، يۇقىرى دەرىجىلىك رەھبەرلەر مېنىڭ ئىدارىگە قايتىپ خىزمەت قىلىشىمنى ئۇقتۇرۇپ، مېنى قۇرۇلۇش نازارىتىنىڭ مۇئاۋىن نازىرلىقىغا تەيىنلىدى،-دېدى ساۋ مىڭيى بېشىنى لىڭشىتىپ.
-ئۇنداقتا سىز نېمىشقا ئۆزىڭىزنى پېنسىيىگە چىققان دەپ، مېنى ئالدايسىز؟-دەپ سورىدى چياۋ لى.
-مەن...
ساۋ مىڭيى ئىككىلىنىپ تۇرۇپ قالدى. چياۋ لى ساۋ مىڭيىنىڭ تەڭقىسلىقتا قالغانلىقىنى كۆرۈپ، كۈلۈپ تۇرۇپ سورىدى.
-سىز مېنىڭ سىزنى يەنە بىر قېتىم پاش قىلىپ قويۇپ، بېشىڭىزدىكى بۇ قارا قالپاقنى تاشلىۋېتىشىمدىن قورقتىڭىزمۇ؟
چياۋ لى ساۋ مىڭيىنىڭ ئويىنى سۆزلىگەندىن كېيىن، ساۋ مىڭيىنىڭ يۈزلىرى بىردىنلا قىزىرىپ كەتتى.
-ئالدىنقى قېتىم سىزنى پاش قىلغىنىم ئۈچۈن، مەن تېگىشلىك بەدەل تۆلىدىم، خاتىرجەم بولۇڭ، مەن ئەمدى ئۇنداق ئەخمىقانە ئىش قىلمايمەن، پەقەت سىز ماڭا ياخشى مۇئامىلە قىلسىڭىزلا، مەن يەنىلا بۇرۇنقىدەك سىزنى ياخشى كۆرىمەن...-دېدى چياۋ لى ئىرادىسىگە خىلاپ ھالدا.
چياۋ لى ئۈچ رومكا قىزىل ھاراق ئىچكەندىن كېيىن، يۈزى قىزىرىپ كەتكەندىن باشقا، ھېچقانداق مەست بولۇش ئالامىتى كۆرۈلمىدى.
ئۇ چاي ئۈستىلىدىن بىر پارچە قەغەزنى ئېلىپ ئاغزى ۋە قولىنى سۈرتكەندىن كېيىن، ئورنىدىن تۇرۇپ ناخشا بۇيرۇتۇش ئۈسكۈنىسىنىڭ يېنىغا بېرىپ، «ھاماقەتلەرچە مۇھەببەت» دېگەن ناخشىنى قويۇپ، ساۋ مىڭيىنىڭ يېنىغا كېلىپ ئولتۇرۇپ، چاي ئۈستىلىدىكى ئىككى مىكروفوننىڭ بىرىنى ئۇنىڭ قولىغا تاپشۇرۇپ، يەنە بىرىنى ئۆزى ئېلىپ ئۇنىڭ بىلەن بىللە ناخشا ئېيتتى.
بىر كۇبلېت ناخشا ئېيتىپ بولغاندىن كېيىن، ساۋ مىڭيى تۇيۇقسىز يوتىسىدا بىر ئىسسىقلىقنىڭ پەيدا بولۇۋاتقانلىقىنى ھېس قىلدى. ئۇ بېشىنى تۆۋەن سېلىپ پەسكە قارىغىنىدا، ئۇ چياۋ لىنىڭ قولى ئىدى. بۇ چاغدا چياۋ لىنىڭ لەۋلىرىمۇ قىزغىنلىق بىلەن سوزۇلۇپ، ساۋ مىڭيىنىڭ ھەيرانلىقتىن ئېچىلىپ قالغان ئاغزىغا سۆيۈپ قويدى.
ساۋ مىڭيى ئېسىنى يىغىپ، ئۇنى ئاستا قۇچاقلاپ، ئۆزىنى تۇتۇۋالالماي ئۇنى سافاغا بېسىۋالدى. ساۋ مىڭيى ئەمدىلا جەڭگە ئاتلىناي دەپ تۇرغاندا، ئايرىمخانىنىڭ ئىشىكىنى باشقىلار سىرتتىن ئېچىپ كىرىپ، ئىككىيلەن تەڭلا چۆچۈپ، بەدىنىنى توك سوقۇۋەتكەندەك بىر-بىرىدىن ئاجراتتى.
ئىككىيلەن سافادىن قوپۇپ، بىرلىكتە نەزىرىنى ئۆينىڭ ئىشىكىگە تىككەندە، بىردىنلا ۋۇ بو بىلەن شياۋ لەننىڭ ھەيرانلىق نەزىرى بىلەن ئۇلارغا قاراۋاتقانلىقىنى كۆردى.
ۋۇ بو مەزمۇت قەدەملەر بىلەن ئۇلارنىڭ قېشىغا كېلىپ، چىرايىدىن ئويۇنچۇق نەزىرى چىقىپ تۇرغان ھالدا ساۋ مىڭيىگە قاراپ ئېغىز ئاچتى:
-يېزنە، سىزنىڭ ھاۋايى-ھەۋىسىڭىزنىڭ بۇنچە كۈچلۈك ئىكەنلىكىنى ئويلىماپتىمەن، سىز گۈل-گىياھلار ئاستىدا ئۆلۈشكە رازى ئىكەنسىزكى، ئۆتكەن كۈنلىرىڭىزدىن ساۋاق ئېلىشنى بىلمەيدىكەنسىز!
ساۋ مىڭيى بايا چېن بىڭنى سافاغا بېسىپ، ئۇنىڭغا باسقۇنچىلىق قىلماقچى بولغاندا، ۋۇ بونىڭ بىر تېپىك بىلەن ئىشىكنى ئېچىپ، ئۇنىڭ ياخشى ئىشىنى بۇزغانلىقىنى ئېسىگە ئالدى، ھازىر ئۇ يەنە چياۋ لى بىلەن ئۇ ئىشنى قىلىشقا تەييارلىق قىلىۋاتقاندا، ۋۇ بو يەنە بىر قېتىم بۆسۈپ كىرگەچكە، بۇ ئۇنىڭ كۆڭلىنى ئىنتايىن بىئارام قىلدى. شۇنىڭ بىلەن، ئۇ خاپا بولغان ھالدا ۋۇ بودىن سورىدى.
-بۇ نېمە دېگىنىڭىز؟
ۋۇ بو ئۇنىڭ يېنىدا ئولتۇرۇپ، بېشىنى تۆۋەن قىلىپ چاچلىرىنى ۋە كىيىملىرىنى تۈزەشتۈرۈۋاتقان چياۋ لىغا بىر قاراپ قويۇپ، چاندۇرماستىن ساۋ مىڭيىگە قاراپ سۆزىنى داۋاملاشتۇردى.
-مەن بۇ يەرگە سىزنىڭ ئىلگىرى ميەنچېڭ شەھەرلىك قۇرۇلۇش ئىدارىسىنىڭ باشلىقلىق ۋەزىپىسىدىن قانداق مەھرۇم قالغانلىقىڭىزنى ئەسكەرتىپ قويۇش ئۈچۈن كەلدىم، شۇنىڭ بىلەن بىرگە ئۆزىڭىزنىڭ ئاستىنقى بەدىنىڭىزنى ياخشى باشقۇرۇشىڭىزنى، ئەسلىدىكى كونا يولدا داۋاملىق ماڭماسلىقىڭىزنى ئۈمىد قىلىمەن، ۋاقتى كەلگەندە، مېنى ئەسكەرتمىدى دەپ ئاغرىنماڭ...
ساۋ مىڭيى بۇنى ئاڭلاپ، كۆڭلى ناھايىتى بىئارام بولدى. ئەمما ئۆزى بايا ۋۇ بوغا قۇيرۇقىنى تۇتقۇزۇپ قويغاچقا، ۋۇ بودىن يۈز ئۆرۈشتىن خىجىل بولۇپ، ئامالسىز سافادىن تۇرۇپ ۋۇ بونى بىر چەتكە تارتىپ، چۈشەنمىگەن ھالدا سورىدى.
-بايا سىز چياۋ لىنى ماڭا ئوبدان ھەمراھ بولۇشقا ئورۇنلاشتۇرمىدىڭىزمۇ؟ نېمىشقا يەنە بۇنداق گەپ قىلىسىز؟
ئايرىمخانىدىكى مۇزىكىنىڭ ئاۋازى بەك يۇقىرى بولغاچقا، ۋۇ بو ئۇنىڭ گېپىنى چياۋ لىنىڭ ئاڭلاپ قېلىشىدىن قورقمىدى، شۇنىڭ بىلەن ئۇ ئوچۇق قىلىپ جاۋاب بەردى.
-مەن ئۇنى سىزگە ھەمراھ بولۇشقا ئورۇنلاشتۇردۇم، لېكىن سىزنىڭ بۇ يەردە ئۇنىڭغا بىر ئىش قىلىشىڭىزنى ئېيتمىدىم، ناۋادا سىلەر ئۇ ئىشنى قىلىۋاتقاندا ساقچىلار بۆسۈپ كىرسە، ئۇ سىزنى ئۇنىڭغا باسقۇنچىلىق قىلغان دېسە قانداق قىلىسىز؟
ساۋ مىڭيى ۋۇ بونىڭ تەھلىلىنىڭ ئورۇنلۇق ئىكەنلىكىنى ھېس قىلىپ، ئۇنىڭغا رەھمەت ئېيتتى.
-سىزنىڭ كېلىپ مېنى ئەسكەرتىپ قويغىنىڭىزغا رەھمەت، بولمىسا، ھەقىقەتەن چوڭ خاتالىق كېلىپ چىقىشى مۇمكىن ئىكەن!
ۋۇ بو ئۇنىڭغا داۋاملىق ئەسكەرتتى.
-چياۋ لىدىن ئېھتىيات قىلىڭ، ئۇ ئىلگىرى سىزنىڭ سەۋەبىڭىزدىن تۈرمىدە ياتتى، سىزنى ئاسانلىقچە بوش قويۇۋەتمەيدۇ.
-سىز ئۇنىڭ مېنى بوش قويۇۋەتمەيدىغانلىقىنى قانداق بىلىسىز؟-دەپ سورىدى ساۋ مىڭيى گۇمانلانغان ھالدا.
-بايا چياۋ لى سىرتقا چىققاندا، خوتۇنۇم چېن بىڭنى ئۇچرىتىپ قالدى، ئۇلار سىلەرنىڭ ئىلگىرى تاڭچېڭ مېھمانسارىيىدا ئۆتكۈزگەن ھېلىقى ئەر-خوتۇن ئالماشتۇرۇش ئويۇنىڭلارنى سۆزلىشىپ بولغاندىن كېيىن، يارىشىپ قېلىپ سىزدىن ئۆچ ئېلىش ئۈچۈن تەييارلىق قىلدى، بىزنىڭ كېلىشتىكى مەقسىتىمىز سىزنى ئەسكەرتىپ قويۇش ئۈچۈن، بىراق ئويلىمىغان يەردىن سىز چياۋ لى بىلەن...
ساۋ مىڭيى بۇ گەپنى ئاڭلاپ، مەسىلىنىڭ ئېغىرلىقىنى ھېس قىلىپ، بىردىنلا سوغۇق تەرگە چۆمۈپ كەتتى.
بۇ يەرنى بېسىپ داۋامىنى ئوقۇڭ: 276-قىسىم
