جىنايەت ۋە جازا 84-قىسىم
ئۇلار دوختۇرخانىغا كىلەي دىگەندە يىگىت يەنە ئىغىز ئاچتى :
- ھەدە، ئىسمىڭىزنى سورىسام بولامدۇ ؟
- زۇمرەت ! زۇمرەت خانىم قوپاللىق بىلەن شۇنداق دىدى .
- ھە، زۇمرەت، مىنىڭ ئىسمىم شاھيار، سىز بىلەن تونۇشقىنىمدىن خۇشالمەن .
شاھيار ماشىنىنى دوختۇرخانا ئالدىغا كىلىپ توختىتىپ، كەينىدىكى زۇمرەت خانىمغا بۇرۇلۇپ قارىدى، زۇمرەت ئۇنىڭ كۆزلىرىگە قاراپ سەل غەلىتىلىك ھىس قىلىپ :
- ھە، بۈگۈن رەھمەت سىزگە، خوش ! دىگىنىچە سۇس كۈلۈمسىرەپ ماشىنىدىن چۈشۈپ قالدى .
زۇمرەت بۇ شاھيار ئىسىملىك يىگىتنىڭ ئۆزىگە قاراشلىرىدىن تەنلىرى باشقىچە شۈركىنىپ كەتكەن بولغاچقا، ماشىنىدىن چۈشۈپ بالنىسىت بىناسىغا كىرىپ كەتكۈچە پات-پات ئارقىسىغا قاراپ قوياتتى، شاھيارمۇ ئۇنىڭ ھەركىتىنى كۈزىتىۋاتقاندەك قارىسى يۈتكىچە قاراپ تۇردى، ئۇ مىيىقىدا كۈلۈمسىرەپ ئاستا ماشىنىسىنى قوزغاپ بۇ يەردىن ئايرىلدى .
زۇمرەت دوختۇرخانىغا كىرىپ يولدىشى ياتقان ياتاققا كىردى، ئەكبەر ھوشىغا كەلگەن بولۇپ، يىنىدا بىر سىستىرا بىلەن دوختۇر ئۇنىڭغا گەپ قىلىۋاتقان ئىدى، دوختۇر زۇمرەت خانىمنى كۆرۈپ :
- خانىم، بىمارنى ئەمدى يالغۇز تاشلىماڭ، يەنە ئۇنىڭ مىڭە توقۇلمىللىرى بۇ قىتىمقى ئوپراتسىيە جەريانىدا تىخىمۇ نىپىزلەپ كەتتى، مەن بۇرۇنلا دىگەن، ئۇنىڭ مىڭىسىگە تەسىر كۆرسىتىدىغان ئىشلار بولمىسۇن دەپ ، ئەگەر يەنە بىر قىتىم ئۇ مۇشۇنداق ئاچچىقلانسا ياكى مىڭە قىسمى ئىغىر زەربىگە ئۇچىرىسا، مىڭە توقۇلمىللىرى پۈتۈنلەي كاردىن چىقىپ ھاياتىغا خەۋپ يىتىدۇ، بايا ئۇنىڭ بىلەن پاراڭلاشتىم، ئۇنى ھەر قانداق ئىش بولسىمۇ چىچىلماسلىققا دەۋەت قىلدىم، سىلەر ئائىلە تاۋاباتلىرىمۇ بىمارغا ياخشى ھەمراھ بولۇپ، ئۇنىڭغا نىرۋىسىغا تەسىر يەتكۈزىدىغان ئىشنى ھەرگىز قىلماڭلار .
- ماقۇل دوختۇر، بىز دىققەت قىلىمىز . زۇمرەت كارۋاتتا ئۆزىگە بىچارىلەرچە قاراپ تۇرغان ئەكبەرنىڭ ياش يۇقى كۆزلىرىگە قاراپ شۇنداق دىدى .
- ئەمسە بىز چىقىپ كەتتۇق، بىمار بايا ھوشىغا كەلدى، سىز ئۇنىڭغا ئوبدان قاراڭ، بىرەر غەيرى ئەھۋال بولسا بىزنى چاقىرىڭ . دوختۇر بىلەن سىستىرا زۇمرەتكە بەزى ئەھۋاللارنى ئەسكەرتىپ بولۇپ چىقىپ كەتتى .
زۇمرەت ئاستا ئەكبەرنىڭ يىنىغا كىلىپ ئولتۇردى، ئاندىن سۇس كۈلۈمسىرەپ ئەكبەرنىڭ قولىنى ئاستا ئالقىنىغا ئالدى :
- ئەكبەر، سىزنىڭ نىمىشقا تۇيۇقسىز ئۆزگىرىپ قالغانلىقىڭىزنىڭ سەۋەبىنى بىلدىم، خاتىرجەم بولۇڭ، مەن قىزىمىزنى قۇتقۇزۇپ چىقىمەن .
ئەكبەر زۇمرەتنىڭ گەپلىرىنى ئاڭلاپ ئاستا بىشىنى لىڭشىتتى، زۇمرەت يىنىك بىرنى تىنىۋالدى :
- ئەكبەر، ھازىر قىزىمىزنى قۇتقۇزۇشتا بىرلا ئامال بار ، يەنى، تۇتقۇن قىلغۇچى بىزدىن پۇل تەلەپ قىلىۋاتىدۇ، مەن ئۆيدىكى ھەم بانكىدىكى بارلىق ھىساۋاتىمىزنى تەكشۈرۈپ، تۇتقۇن قىلغۇچى ئوتتۇرىغا قويغان پۇل سوممىسىنى غەملىيەلمىدىم، شۇڭا بىز يەنىلا شىركەتنىڭ مالىيىسىدىن …
زۇمرەت ئەكبەرنىڭ ئويچان كۆزلىرىگە تىكىلدى، ئەكبەر كۆزىنى چىڭ يۇمۇپ بىشىنى لىڭشىتىپ قويدى ، زۇمرەت ئۇنىڭ قوشۇلغانلىقىنى بىلىپ چىرايىغا كۈلكە يۈگۈرتتى :
- مەن شىركەت مالىيىسىگە تىلفۇن قىلغان، ئۇلار بىر پارچە ھۆججەت كىسىپ سىزگە قول قويدۇرۇپ، ئاندىن پۇلنى سىزنىڭ ھىساۋاتىڭىزغا يۆتكەيدۇ، سىز شۇ ھۆججەتكە قول قويۇپ بەرسىڭىزلا بولىدۇ . ئەكبەر ئاستا كۆزىنى ئىچىپ پەس، ئەمما ئىغىر بىر نەپەستە :
- ئابىدە، ئابىدە سالامەت قايتىپ كەلسىلا، پۇل ئۇنچە مۇھىم ئەمەس .
- شۇنداق شۇنداق، سىز خاتىرجەم بولۇڭ، قىزىمىزنى چوقۇم سالامەت قايتۇرۇپ ئەكىلىمەن .
ئەكبەر زۇمرەتنىڭ گەپلىرىنى ئاڭلاپ كۆزلىرىدىن مارجاندەك ياشلارنى تۆكتى :
- ئەمسە، سىزمۇ كۆپ ئىھتىيات قىلىڭ .
- ماقۇل . زۇمرەت ئەكبەرنىڭ قوللىرىنى چىڭ سىقىمدىدى :
- سىز كۆپ چىچىلماڭ، بەزى ئىشلارنى كۆپ ئويلىماڭ، بۇ سالامەتلىكىڭىزگە زىيانلىق، بىردەم ئۇخلىۋىلىڭ . ئەكبەر بىشىنى لىڭشىتىپ ئاستا كۆزىنى يۇمدى .
زۇمرەت ياتاقتا ئۇياقتىن-بۇياققا مىڭىپ، مالىيە ئىشخانىسىدىن كىلىدىغان پۇلنىڭ ھۆججىتىنى ساقلىدى . بىر چاغدا ياتاقنىڭ ئىشىكى ئىچىلىپ، رەتلىك كىيىنگەن بىر ئايال كىرىپ كەلدى، ئۇ ئايال كارۋاتتا ياتقان ئەكبەرنى كۆرۈپ زۇمرەت خانىمغا قاراپ :
- ياخشىمۇ سىز خانىم ؟ مەن يىڭى ھايات شىركىتىدىن كەلدىم، ئەكبەر ئەپەندى قانداقراق ؟
- ئەمسە ھۆججەتنى ماڭا بىرىڭ .
ئۇ ئايال سومكىسىدىن ھۆججەتنى ئىلىپ زۇمرەتكە سۇندى، زۇمرەت ھۆججەتنى قولىغا ئىلىپ بىر قاتار قارىۋەتكەندىن كىيىن ئاستا ئەكبەرنىڭ قىشىغا كىلىپ ئۇنى يىنىك نوقىدى :
- ئەكبەر، ئەكبەر كۆزىڭىزنى ئىچىڭ . ئەكبەر ئەپەندى ئاستا كۆزىنى ئاچتى .
- ھىلىقى پۇلنىڭ ھۆججىتىنى ئىلىپ كەپتۇ، قول قويۇپ بىرەمسىز ؟ ئەكبەر شىركەتتىن كەلگەن خىزمەتچى ئايالغا قاراپ سەل تۇرىۋەتكەندىن كىيىن، زۇمرەتكە ۋە قولىدىكى ھۆججەتكە قاراپ :
- قەلەم ؟ دىدى پەس ئاۋازدا .
زۇمرەت سومكىسىدىن قەلەمنى ئىلىپ ئەكبەرگە سۇندى، ئەكبەر قەلەمنى قولىغا ئىلىپ بىر ھازا ئىككىلىنىپ تۇرغاندىن كېيىن ھۆججەتكە قول قويدى ۋە ھۆججەتنى زۇمرەتنىڭ قولىغا تۇتقۇزۇپ :
- بۇ پۇل شىركەتنىڭ جىنى، يەنە مەن خالىغانچە شىركەت مالىيىسىدىن بۇنچە كۆپ مەبلەغنى ئاجىرىتىپ ئىشلەتسەم بولمايدۇ، سىز ئابىدەنى قۇتقۇزۇپ چىققاندىن كىيىن، ئۆيىمىزنى رەنىگە قويۇپ بولسىمۇ، بۇ پۇلنى شىركەتكە قايتۇرىۋىتىڭ، بولمىسا مەن…
ئەكبەر گىپىنىڭ ئاخىرىنى دىيەلمەي سەل قىقىلىپ كەتتى، زۇمرەت ئۇنىڭ مەيدىسىنى سىلاپ :
- خاتىرجەم بولۇڭ، مەن بىلىمەن، ئاۋۋال قىزىمىزنى قۇتقۇزۇپ چىقايلى .
زۇمرەت ھۆججەتنى بايىقى ئايالغا سۇندى، ئۇ ئايال ھۆججەتنى قولىغا ئىلىپ مۇنداقلا قاراپ قويغاندىن كىيىن سومكىسىغا سىلىپ :
- ئەمسە مەن ماڭاي، ئەكبەر ئەپەندى ئۆزىڭىزنى كۆپ ئاسىراڭ . ئۇ ئايال ياتاقتىن چىقىپ كەتتى .
- ئەكبەر، ماڭا بانكا كارتا مەخپىي نۇمۇرىڭىزنى ئىيتىپ بىرىڭ، مەن ھازىرلا پۇلنى ئىلىپ ئابىدەنى قۇتقۇزمىسام بولمايدۇ، سىز بۇ يەردە خەۋىرىمنى ساقلاڭ .
ئەكبەر زۇمرەتكە بانكا ھىساۋات كارتىسىنىڭ مەخپىي نۇمۇرىنى ئىيتىپ بەردى، ئۇ زۇمرەتنىڭ قولىنى چىڭ سىقىمداپ :
- چوقۇم ئابىدەنى قۇتقۇزۇپ چىقىڭ، بىرەر چاتاق چىقىپ قالمىسۇن .
- خاتىرجەم بولۇڭ، ئەمسە مەن كەتتىم .
زۇمرەت ياتاقتىن دوختۇرخانا بىناسى ئالدىغا چىقتى، ئۇ تىلفۇنىغا كىرگۈزىۋالغان ئەكبەرنىڭ بانكا ھىسابات كارتا نۇمۇرىغا قاراپ سۇس كۈلۈمسىرەپ قويدى :
- ئەمدى ئابىدەنى قۇتقۇزالايدىغان بولدۇم، ئەگەر ئەلى ئابىدە بىلەن پۇلنى تەڭ قايتۇرۇپ كىلەلىسە بۇ پۇل ماڭا مەنسۇپ بولىدۇ .
زۇمرەت تىلفۇننى سىقىمداپ ھاياجاندىن كۈلۈپ قويدى، ئۇ تىلفۇن خاتىرىسىدىن ئەلىنىڭ نۇمۇرىنى تىپىپ تىلفۇن ئۇردى، تىلفۇن ھايال قالمايلا ئىلىندى، ۋە ئەلىنىڭ كۈلگەن ئاۋازى ئاڭلاندى :
- زۇمرەت خانىم، بىردەمدە پۇلنى تەق قىلغان ئوخشىمامسىز ؟ زۇمرەت ئۇنىڭ تەنە گەپلىرىدىن بىزار بولۇپ :
- شۇنداق، بىر ئازدىن كىيىنلا پۇل ئەكبەرنىڭ شەخسىي ھىساۋاتىغا كىرىدۇ، مەن پۇلنى يىنىڭىزغا ئاپىرىمەن، بىراق سىز ھەم قىزىمنى ھەم پۇلنى ماڭا بىخەتەر ئەكىلىپ بىرىشكە كاپالەتلىك قىلىشىڭىز كىرەك .
- قارىڭە سىزنى، قىزىڭىز خەتەر ئىچىدە تۇرسا يەنە پۇلنىڭ غىمىدە قاپسىزغۇ ؟ ھەقىقەتەن باغرىڭىز قاتتىقكەن .
- بولدى، ماڭا ئىش ئۆگەتمىسىڭىزمۇ بولىدۇ، سىزگە دەپ قوياي ئەلى، ماڭا ھىيلە ئىشلىتىپ پۇلنى يۈتىۋالغۇچى بولماڭ، يەنە ماڭا ئابىدەنى تۇتقۇن قىلغان ئادەمنىڭ كىملىكىنى ئىنىقلاپ بىرىڭ، مەن ئۇنىڭغا، بىزدەك مۇشۇنداق كاتتا جەمەتكە تەھدىد سىلىپ پۇل ئۈندۈرگەنلىكىنىڭ جازاسىنى تارتقۇزىمەن .
زۇمرەتنىڭ چىرايىدا ئاچچىق بىر ئۆچمەنلىك چىقىپ تۇراتتى، ئەلىنىڭ بۇ گەپنى ئاڭلاپ بايىقى كۈلكە باسقان چىرايى ئۆزگەردى :
- بولىدۇ، سىزگە ئۇنىڭ كىملىكىنى چوقۇم ئۆز ئاغزىم بىلەن ئىيتىپ بىرىمەن . ئەلى گىپىنى دەپ بولۇپلا تىلفۇننى قويىۋەتتى، ئۇنىڭ چىرايى بايىقى زۇمرەت دىگەن ئاچچىق گەپتىن قىزىرىپ كەتكەن ئىدى :
- خەپ زۇمرەت ! سەن ئۆزۈڭنى بۇ شەھەردە بىردىن-بىر كاتتا سەلتەنەت ئىگىسى دەپ قالدىڭما ؟ قاراپ تۇر، سىنى ھەم ئائىلەڭنى ئىگىلىكىڭدىن پۈتۈنلەي مەھرۇم قىلىپ، ئۆزۈمنىڭ كىملىكىنى ساڭا تونۇتۇپ قويىمەن . ئەلى قولىدىكى تىلفۇننى ياندىكى كارۋاتقا كۈچەپ ئىتىۋەتتى .
چۈش بولاي دىگەندە ئابىدە ياتقان ئۆينىڭ ئىشىكى تاراقشىپ ئىچىلىپ، بىر نەچچە ئەر بىر تاغارنى ئۆيگە كۆتۈرۈپ كىردى، ئاڭغىچە يەنە تۆت ئەر كىشى بىر كارۋاتنى ئەكىرىپ ئابىدە ياتقان كارۋاتقا يانداش قىلىپ قويدى، ئابىدە ئۇلارنىڭ نىمىش قىلماقچى ئىكەنلىكىنى بىلەلمەي ئۇلارغا قاراپ جىمجىت ياتاتتى، ئاڭغىچە ئۇلار ھىلىقى تاغارنىڭ ئاغزىنى ئىچىپ، ئىچىدىن بىر ئايالنى تارتىپ ئىلىپ كارۋاتقا ياتقۇزۇپ، خۇددى ئابىدەگە ئوخشاش قىلىپ پۇت-قولىنى باغلىدى .
- بۇ، بۇ زادى نىمىش ؟ بۇ ئەبلەخلەر ئاياللارنى تۇتۇپ نىمىش قىلىدىغاندۇ ؟ ئابىدەنىڭ كاللىسىغا تۈگىمەس قورقۇنۇشلۇق خىياللار كىلىشكە باشلىدى . بايىقى ئەرلەر ئىشىنى پۈتتۈرۈپ چىقىپ كىتىشتى .
بايىقى ئايال ھوشسىز بولۇپ بىشى يانغا قايرىغلىق بولغاچقا، ئابىدە ئۇنىڭ چىرايىنى پەرق ئىتەلمىدى ، ئابىدە ئۇياق-بۇياققا قاراپ قويۇپ ، پۇت-قولىدىكى ئارغامچىنى بوشىتىش ئۈچۈن يەنە تىركىشىشكە باشلىدى، بىراق مىدىرلىغانچە ئارغامچا ئۇنىڭ قول-پۇتىنى تىخىمۇ چىڭ سىقىۋالاتتى . ئابىدە تىركىشىشتىن توختاپ، يانداش قويۇلغان كارۋاتتىكى ئايالغا قاراپ بوشقىنە چاقىردى :
- خانىقىز، خانقىز ئويغىنىڭ ! بىراق ئۇ ئايالدىن ھىچبىر ئىنكاس يوق بولۇپ، يەنىلا بىر خىل جىمجىت ياتاتتى، ئابىدە بىر قانچە قىتىم ئۇنى چاقىرىپ ئاڭلىتالماي ئىغىر ئۇھسىنىپ :
- ئۇ، ئۇ ئۆلۈپ قالمىغاندۇ ؟ ئابىدە ئۇنىڭدىن كۆزىنى ئۈزمەي :
- ياق، ئۇ ئۆلگەن بولسا بۇ يەرگە ئەكىرىپ باغلاپ قويماس ئىدى .
ئابىدە تۇيۇقسىز ئۇنىڭ قولىدىكى ئۈزۈككە قاراپ جىمىپ قالدى، ئۇ ئايالنىڭ ئوتتۇرا بارمىقىغا سىلىنغان ئالتۇن ئۈزۈككە قاراپ، خۇددىي بۇ ئۈزۈكنى بىر يەردە كۆرگەندەك ھىسىياتقا كىلىپ قالدى :
- ئۈزۈك ؟ بۇ ئۈزۈكنى بىر يەردە كۆرگەندەك قىلىمەنغۇ ؟ ئەجەبا بۇ ئايال تونۇش بىرسىمىدۇ ؟
ئابىدە كارۋاتتا چاچلىرى چۇۋۇق ياتقان ئايالغا قاراپ بىر ھازا ئۇنى كۈزەتتى، ئۇنىڭ بوي تۇرىقى، قاپقارا ئۇزۇن چاچلىرى ھەقىقەتەن ئابىدەگە تونۇشتەك بىلىنىۋاتاتتى . بىر چاغدا ئۇ ئايال تۇيۇقسىز بىشىنى يانغا ئۆرىدى ۋە غەلىتە جۆيلىگەندەك :
- مىنى قويىۋىتىڭلار، ماڭا چىقىلماڭلار ! دىدىدە، يەنە چىرايىنى پۈرۈشتۈرۈپ جىمىپ قالدى .
ئابىدە ئۇنىڭ يۈزلىرىنى توسىۋالغان چۇۋۇق چاچلىرى ئارىسىدىن سول يۈزىدىكى تاتۇقنى كۆرۈپ قالدى، ئابىدەنىڭ يۈرىكى جىددىي سوقۇپ :
- ئا ئادىلە ! ئۇ ھەيرانلىقتىن ئاغزىنى ئىتىۋىلىشقا ئامالسىز كۆزلىرىدىن تاراملاپ ياشلار تۆكۈلدى .
ياندىكى كارۋاتتا ياتقىنى ھەقىقەتەن ئادىلە بولۇپ، ئۇ ھوشسىزلاندۇرىۋىتىلگەچكە ھىچنىمنى تۇيماي جىمجىت ياتاتتى، بىراق ئۇنىڭ قانچىلىك ئازاپلانغىنى ھەم قىينالغىنى چۇۋۇلغان چاچلىرى، يىرتىلغان كۆينەكلىرى ۋە نۇرسىز چىرايىدىن چىقىپ تۇراتتى . ئابىدە ھەيرانلىقتا ئادىلەنىڭ ۋەيرانە ھالىتىگە قاراپ، ئۇنى باشقىلارنى تۇتقۇن قىلىپلا قالماي قاتتىق قىينىغانلىقىنىمۇ ھىس قىلىپ يەتتى :
- ئۇ زادى كىمدۇ ؟ نىمىشقا ئادىلە بىلەن مىنى بىرلا ۋاقىتتا تۇتقۇن قىلىۋالىدۇ ؟ ئابىدە سەل ئويلىنىپ :
- ئەجەبا، دىلمۇراتنىڭ سەۋەبىدىنمىدۇ ؟ ئۇ دىلمۇراتنى ئۆلتۈرۈپ، يەنە ئۇنىڭغا مۇناسىۋەتلىك ئادەملەرنىمۇ ئۆلتۈرمەكچىمىدۇ ؟
ئابىدە قاتتىق ئۈمىدسىزلەندى، ھەم غەزەپتىن چىشلىرى كىرىشىپ كەتتى، ئابىدە ئادىلەگە قاراپ :
- ئادىلە، ئادىلە كۆزىڭىزنى ئىچىڭ !
ئابىدە نەچچە رەت چاقىرغاندىن كىيىن ئادىلەنىڭ بىشى سەل لىڭشىپ ئاستا كۆزىنى ئاچتى، ئابىدە ئۇنىڭدىن كۆزىنى ئۈزمەي قاراپ تۇراتتى، ئادىلە ئەتراپقا كۆز يۈگۈرتۈپ، ياندىكى كارۋاتتا ئۆزىگە قاراپ ياتقان ئابىدەنى كۆردى، ئۇنىڭ كۆزلىرى چاچراپ چىقىپ كەتكۈدەك دەرىجىدە ئابىدەگە ھەيرانلىق نەزەردە تىكىلگەن ئىدى، ئابىدەنىڭ كۆزلىرىگە لىق ياش كەلدى :
- ئادىلە، سىز قانداق بولۇپ بۇ يەرگە كىلىپ قالدىڭىز ؟ بۇ سىز… ئابىدەنىڭ تىلى گەپكە كەلمەيۋاتاتتى، ئادىلە ھارغىن ھەم نۇرسىز كۆزلىرىنى ئابىدەگە تىكتى :
- مەن، مەن… ئۇ ئۆزىنى تۇتىۋالالماي كۆز يىشى قىلدى :
- مىنى بىرسى ئالداپ بۇ يەرگە ئەكەلدى، لىكىن ئۇنىڭ كىملىكىنى بىلمەيمەن، شەھەر سىرتىغا ئۇنىڭ بىلەن كۆرۈشكىلى چىققان، بىراق ئويلىمىغان يەردىن بىر ئاق مىنبوس كىلىپ، نەچچە ئەر ماشىنىدىن چۈشۈپ مىنى باغلاپ، بىشىمغا خالتا تىڭىپ ئىلىپ مىڭىشتى، مەن شۇ چاغدا ئۆزۈمنىڭ ئالدانغانلىقىمنى بىلگەن ئىدىم، بىراق كىچىككەن ئىدىم، ئۇلار مىنى تۈنۈگۈن ئادەم ئاياغ باسمايدىغان ناتونۇش بىر تاشلاندۇق بىنانىڭ ئىككىنچى قەۋىتىگە ئاچىقىپ بىر ئۆيگە سولاپ قويۇشتى، مەن يەردىكى ئەينەك پارچىسى بىلەن ئارغامچىنى كىسىپ قاچتىم، بىراق يەنىلا ئۇلارغا تۇتۇلۇپ قالدىم، شۇڭا ئۇ ئەبلەخلەر مىنى قاتتىق ئۇردى . ئادىلە ئۆزىنى تۇتىۋالالماي بۇقۇلداپ يىغلاپ تاشلىدى، ئابىدە ئۇنىڭ ھالىغا ئىچىنىپ :
- بولدى يىغلىماڭ، قارىغاندا ئۇلارنىڭ مەقسىدى بىزنى ئۆلتۈرۈش ئەمەسكەن، بولمىسا ئاللىبۇرۇن قول سالاتتى، بىز ئامال قىلىپ بۇ يەردىن قىچىپ كىتەيلى . ئادىلە بىچارىلەرچە ئابىدەگە تىكىلدى :
- قانداق قاچىمىز ؟ ئۇلار بىزنى مەھكەم باغلىۋەتكەن تۇرسا ؟ ئابىدە ئەتراپقا بىرەر قۇر كۆز يۈگۈرتتى :
- ھازىرچە بىز ھىچنىمە قىلالمايمىز، ئەڭ ياخشىسى پەيت كۈتەيلى، يەنى ئۇلار تاماق ئەكىرگەندە قولىمىزنى بوشىتىدۇ، بىزمۇ شۇ ۋاقىتتىكى پۇرسەتتىن پايدىلىنايلى . ئادىلە بىشىنى لىڭشىتىپ :
- ئابىدە، سىز قانداق بولۇپ بۇ ئەبلەخلەرگە تۇتۇلۇپ قالدىڭىز ؟ ئابىدە يىنىك ئۇھسىنىپ قويدى :
- مەن تۈنۈگۈن كىچە كەيپىياتىم ئانچە ياخشى ئەمەس، شەھەرنىڭ غەربىدىكى سۇ ئامبىرى تەرەپكە ئۆتكەن، ئويلىمىغان يەردىن ھۇجۇمغا ئۇچىرىدىم، سەھەردە ئويغانسام مۇشۇ ئۆيدە مۇشۇ ھالەتتە يىتىپتىمەن . ئابىدە چۇڭقۇر بىرنى تىنىپ قويدى، ئادىلە ئۇنىڭغا نىمە دەپ تەسەللىي بىرىشىنى بىلەلمەي :
- ئابىدە، بەلكىم ئۆيىڭىزدىكىلەر سىزنىڭ يوقاپ كەتكەنلىكىڭىزنى بىلدى، ئۇلار چوقۇم بىزنى قۇتقۇزىۋالىدۇ .
- بەلكىم شۇنداقتۇ ؟ بىراق مەن دادامنىڭ سالامەتلىكىدىن ئەنسىرەپ قالدىم، ئۇ تىخىچە دوختۇرخانىدا ئىدى، ئەگەر ئۇ مىنىڭ بۇنداق پالاكەتكە يولۇققىنىمنى بىلسە، ئۇ چوقۇم…
ئابىدە گىپىنىڭ ئاخىرىنى تەسەۋۋۇر قىلىشقا پىتىنالماي كۆزلىرىنى چىڭ يۇمىۋالدى، ئادىلەمۇ ئۇنىڭ ھەم ئائىلىسىدىكىلەرنىڭ ئەھۋالىغا ئىچىنىپ، كۆزلىرىنى قۇياش نۇرى كىرىپ تۇرغان دىرىزە سىرتىغا تىكتى .
زۇمرەت خانىم بانكىغا بىرىپ ئەكبەر ئەپەندىنىڭ شەخسىي ھىساباتىنى تەكشۈردى، بىراق ھىساۋاتقا تىخى پۇل چۈشمىگەن ئىدى، ئۇ تىت-تىت بولۇپ تۇرىشىغا تىلفۇنى سايرىدى، تىلفۇن دوختۇرخانىدىن كەلگەن ئىدى، زۇمرەت تىلفۇننى ئالدى :
- ۋەي ؟
- زۇمرەت خانىممۇ ؟
- شۇنداق، بىرەر ئىش بولدىما ؟
- ھە، ھىچ ئىش يوق، دوختۇرخانىغا كىلەلەمسىز ؟ دوختۇرخانىدا بىجىرىدىغان ئازراق رەسمىيەتلەر بار ئىدى، كىلىپ بىجىرىۋەتسىڭىز ؟ بۇ ئالدىراشچىلىقتا بۇ گەپ زۇمرەتكە مۇشت ئۇرغاندەك ئاڭلاندى :
- مەن ھازىر سىرتتا مۇھىم ئىش بىجىرىۋاتىمەن، چۈشتىن كىيىن قايتىپ بىرىپلا بىجىرۋىتەي، بولامدۇ ؟
- بىراق خانىم دوختۇرخانىنىڭ بەلگىلىمىسى بار، رەسمىيەت يوق بىمارلارغا داۋالاش قىلالمايمىز .
- نىمە ؟ سىلەر قانداق دوختۇر ؟ ئەگەر ئەكبەرگە بىرەر ئىش بوپ قالسا سىلەرنى بوش قويىۋەتمەيمەن . زۇمرەت ئاچچىقىدا تىلفۇننى قويىۋەتتى، ئۇ تىلفۇننى سىقىمدىغىنىچە :
- ئۆلگۈر ! نىمانداق نەس باسىدۇ ئادەمنى ؟ شىركەتتىكىلەر نىمىشقا تىخىچە كارتىغا پۇلنى ئۇرمايدىغاندۇ ؟
زۇمرەت كارتىنى قايتا تەكشۈردى، بۇ قىتىم ھىساباتقا ئەللىك مىلىيۇن پۇل چۈشكەن ئىدى، زۇمرەتننڭ چىرايى ھاياجاندىن ئىچىلىپ كەتتى .
- ھە، پۇل چۈشۈپتۇ.
ئۇ دەرھال چوڭ بانكىغا بىرىپ كارتىدىكى پۇلنى نەق پۇلغا ئالماشتۇرۇپ، چامىدانغا پۇللارنى قاچىلىدى، ئاندىن چاماداننىڭ ئاغزىنى چىڭ ئىتىپ قۇلۇپ سالدى . زۇمرەت ساندۇقنى كۆتۈرۈپ بانكىدىن چىقتىدە، ئۇدۇل ئەلى بىلەن كىلىشكەن يەرگە، يەنى ئەلىنىڭ شەھەر سىرتىدىكى داچىسىغا قاراپ ماڭدى .
جەۋلان سەھەردە ئادىلەدىن ئەنسىرەپ يەنە ئۇنىڭغا تىلفۇن قىلدى، بىراق تىلفۇن ئىتىك ئىدى:
- زادى نىمىش بولغاندۇ ؟ ئادىلەگە چوقۇم بىر ئىش بولدى .
جەۋلان شىركەتتىكى بىر خىزمەتچى خادىمغا ئادىلەنىڭ ئادىرسىنى ئىيتىپ، ئۇنىڭ ئۆيىدە بار-يوقلىقىنى بىلىپ بىقىشقا ئەۋەتتى . بىر سائەتلەردىن كىيىن ئۇ خىزمەتچىدىن خەۋەر كىلىپ، ئادىلەنىڭ تۈنۈگۈن چۈشتىن بۇرۇن سائەت ئونلەر ئەتراپىدا ئۆيدىن چىقىپ كەتكەنچە قايتىپ كەلمىگەنلىكى ئىنىقلاندى . جەۋلان ئەنسىرەپ ئادىلەنىڭ يىقىنلىرىدىن سۈرۈشتۈردى، بىراق ئادىلەنىڭ ھىچبىر خەۋىرىنى ئالالمىدى . جەۋلان باش-قوللىرى تىڭىق ھالەتتە كارۋاتتىن ئاستا چۈشتى، ئۇ ئۆز-ئۆزىگە :
- ئادىلەگە چوقۇم بىر ئىش بولدى، ئەجەبا، ھىلىقى قاتىل ئۇنى تۇتۇپ كەتكەنمىدۇ ؟
جەۋلاننىڭ بىشى بەكلا قاتقان ئىدى، ئۇ ئىشەنچىلىك ئادەمدىن بىرنى ئادىلەنى ئىزدەشكە ئۇرۇنلاشتۇردى، جەۋلان ئۆزىمۇ چىقىپ ئىزدىمەكچى بولدى، بىراق دوختۇر قەتئىي ئۇنىمىدى، جەۋلان ئامالسىز دوختۇرخانىدا خەۋەر كۈتۈپ تۇردى . چۈش بولاي دىگەندە جەۋلاننىڭ تىلفۇنىغا نامسىز بىر نۇمۇردىن ئۇچۇر كەلدى، جەۋلان دەرھال ئۇچۇرنى كۆرۈپ ئوقىدى :
- ئەگەر قىز دوستۇڭنى ئامال قالسۇن دىسەڭ، دەرھال ئەللىك مىلىيۇن تەييارلاپ، شەھەر سىرتىدىكى كۆل بويىغا كەل، ساقچىغا مەلۇم قىلىدىغان بولساڭ بۇنىڭدىن كېيىن قىز دوستۇڭنى كۆرەلمەيسەن . جەۋلاننىڭ خەتنى ئوقۇپ بىشى پىرقىراشقا باشلىدى :
- بۇ زادى كىم ؟ ئۇنىڭ مەقسىدى پۇل، بىراق ھازىر مەندە نەدىمۇ بۇنچە كۆپ پۇل بولسۇن ؟ شىركەت ھازىر جىددىي ئەھۋالدا، تاغاممۇ ئاغرىپ يىتىپ قالدى، شىركەتتىكى ئاساسى قاتلام خادىملىرى شىركەت مالىيىسىدىن بۇنچە كۆپ پۇل ئىلىشىمغا ھەرگىزمۇ قوشۇلمايدۇ، ئەمدى قانداقمۇ قىلارمەن ؟
پۇلنىڭ غىمىدە جەۋلاننىڭ ئاغرىۋاتقان بىشىغا تىخىمۇ ئاغرىق كىرىپ كەتتى، جەۋلان دەرھال ئادىلەنىڭ ئىز-دىرىكىنى قىلغان ئادەمگە، ئۆزىگە ئۇچۇر ئەۋەتكەن نۇمۇرنى تەكشۈرۈپ، ئادىلەنى شۇ ئارقىلىق يۇشۇرۇن ئىزدەشكە بۇيرىدى . جەۋلان دوختۇرخانىدىن چىقالمىغاچقا بۇ پۇلنى نەدىن غەملەشنى بىلەلمەي گاڭگىراپ قالدى، تۇيۇقسىز ئۇنىڭ تىلفۇنى جىرىڭلىدى، جەۋلان دەرھال قولىدىكى تىلفۇنغا قاراپ :
- تاغام ؟ دىدىدە، تىلفۇننى ئالدى :
- ۋەي تاغا، قانداقراق ئەھۋالىڭىز ؟ ياخشى بوپ قالدىڭىزمۇ ؟
- ياخشى ئەمەس، ئاڭلىسام بۈگۈن شىركەتكە بارماپسەن، بۇ يىقىندا شىركەتتە چوڭ ئىلگىرلەشمۇ بولماپتۇ، سەن زادى نىمىش قىلىۋاتىسەن ؟ قاھارغا تىلفۇن قىلسام ئۇ تىخى تىلفۇننى ئالمايدۇ، مەن سىلەردىن سەل ئەنسىرەپ قالدىم .
- تاغا، شىركەتنىڭ ئەھۋالى ئۇنچە ناچارمۇ ئەمەس، مەن ئازراق پىشكەلچىلىككە ئۇچراپ دوختۇرخانىدا يىتىپ قالدىم، بىراق شىركەتنىڭ ئىشلىرىدىن خاتىرجەم بولۇڭ، ياردەمچىم بىلەن پىلان بۆلىمىدىكى خەمىت ھەممە ئىشنى ماڭا دوكىلات قىلىپ تۇرىۋاتىدۇ .
- نىمە ؟ سەن قانداق پىشكەللىككە يولۇقتۇڭ ؟ قايسى دوختۇرخانىدا ؟ مەن سىنى كۆرگىلى باراي .
- بولدى تاغا، يارام بەك ئىغىر ئەمەس، سىزمۇ ئاران تۇرىسىز، يىقىلىپ قالسىڭىز بولمايدۇ، شۇ بىشىم ئازراق يارلاندى، يەنە ئىككى كۈندىن كىيىن دوختۇرخانىدىن چىقسام بولىدۇ . ئەنقەرنىڭ بۇ گەپنى ئاڭلاپ سەل كۆڭلى تىندى :
- ئەمسە بوپتۇ، ياخشىراق ئارام ئال، ھە راست، قاھارنىڭ نەدىلىكىنى بىلەمسەن ؟ ئۇنىڭغا شۇنچە تىلفۇن قىلساممۇ ئالمايۋاتىدۇ، ئۇنىڭدىن ئەنسىرەپ قالدىم .
- ھە، قاھارنى تۈنۈگۈن كەچ كۆرگەنتىم، ئۇ يەنە ھاراق ئىچىپ بۇرۇنقى ئەسكى خۇيىنى تىپىۋاپتۇ، تاغا ئۇنىڭدىن بەك ئەنسىرەپ كەتمەڭ، مەن ئۇنىڭ ئارقىسىغا ئادەم قويۇپ قويدۇم، بىرەر ئىش چىقمايدۇ .
- قارىمامدىغان بۇ يارىماسىنى ! شىركەتنى ئۇنىڭغا تاپشۇراي دىسەم ئۇ مۇشۇنداق يارىماس تۇرسا ! ئەنقەر ئاچچىق خۇرسىنىپ قويدى .
- بولدى تاغا، سىز ئۇنىڭدىن ئەنسىرىمەڭ، سالامەتلىكىڭىز بەك مۇھىم، شىركەتتە سىز بولمىسىڭىز بولمايدۇ . ئەنقەر ئىغىر ئۇھسىنىپ :
- جەۋلان، مەنمۇ قىرىپ قالدىم، ئەسلىدە شىركەتنى قاھار ئىككىڭلارغا تاپشۇراي دىگەن، بىراق قاھار ئۇ… ئالدىنقى قىتىملىق ئىشتىن كىيىن نادىرە قاھارنى ئىزدىمەس بوپ قاپتۇ، جاھانتاينىڭمۇ ماڭا تۇتقان پوزىتسىيەسى ئانچە ياخشى ئەمەس، قارىغاندا ئۇ ئىككىسىنىڭ توي ئىشىمۇ ئاقمايدىغان ئوخشايدۇ .
جەۋلان تاغىسىنىڭ بۇ ھالىغا ئىچىنسىمۇ، ھازىرقىدەك شارائىتتا ئۇنىڭغا ياردەم بىرەلمەيتى، تەسەللىي بىرەي دىسە، ھازىر ئۇ ئۆزى ئەڭ تەسەللىيگە مۇھتاج ئىدى .
- تاغا، مەن دوختۇرخانىدىن چىقىپ سىزنى يوقلاپ بارىمەن، سىز ياخشى داۋالىنىڭ، قالغان گەپنى بىز كۆرۈشكەندە دىيشەيلى .
- بولىدۇ، ئەمسە سەنمۇ ئۆزۈڭنى كۆپ ئاسىرا ! ئەنقەر تىلفۇننى قويىۋەتتى .
