128.قىسىم
ئەنزەر تېخى ئۇنىڭغا بۇ يەرگە كەلگەندىن كېيىن، مەيلى قانداقلا ئىش بولسۇن،ئەلفىرەنىڭ گېپىنى ئاڭلايدىغانلىقىنى ئېنىق ئېيتتى. تۈر ئاخىرلاشقاندىن كېيىن، ئۇنىڭ ئەلفىرەنىڭ تۆھپىسى ۋە شان-شەرىپىنى تارتىۋېلىشىغا يول قويۇلمايدىغانلىقىنى ئالاھىدە ئەسكەرتتى.
نېمىگە ئاساسەن؟ ئۇ بىر گۇرۇھ لىدىرىنىڭ خانىمى، بۇ يەرگە كېلىپ ئەلفىرەگە ياردەمچى بولامدۇ؟
چىرايلىق گەپ بىلەن ياردەمچى دەپ ئاتالغان بىلەن،ئېچىپ دىگەندە يۈگۈر-يېتىم ئىشلارنى قىلىدۇ دىگەن گەپ.كېچىكىپ قېلىشقا، بالدۇر قايتىشقا بولمايدۇ،ئەلفىرە قاچانغىچە خىزمەت قىلسا، ئۇ شۇ چاغقىچە خىزمەت قىلىشى كىرەك...
گۈزەلنۇر شۇلارنى ئويلىسلا غەزىپى ئىچىگە پاتمايۋاتاتتى.ئۇ غەزەپلەنگەن ھالدا ئۈستەلدىكى نەرسىلەرنى داۋاملىق يەرگە تاشلىدى.
- تېز بۇ نەرسىلىرىڭىزنى ئېلىپ كەتمەمسىز!قارىساملا كۆڭلۈم ئېلىشىدۇ !
ئۇنىڭ ئاچچىقى كەلگەن ھالىتىنى كۆرۈپ،ئەلفىرەنىڭ كەيپىياتى بىردىنلا ياخشى بولۇپ قالدى.ئۇ يېنىك كۈلۈپ زوڭزىيىپ ئولتۇرۇپ،گۈزەلنۇر يەرگە تاشلىغان ھۆججەتنى كۈلۈمسىرىگەن ھالدا تەرگەچ سورىدى.
-ئەنزەر ئەپەندى سىزگە قانداق خىزمەت ئورنى ئورۇنلاشتۇردى؟
گۈزەلنۇر خاپا بولغان ھالدا كۆزىنى ئالايتىپ جاۋاپ بەردى.
-سىزگە ياردەمچى بولىدىغان خىزمەت
-ياردەمچى؟
ئىشىك سىرتىدىكى گۈلنازمۇ ئۆزىنى تۇتۇۋالالماي كىرىپ كەلدى، ئۇ بىر تەرەپتىن ئەلفىرەنىڭ نەرسە-كېرەكلىرىنى يىغىشتۇرۇشىغا ياردەملەشسە، يەنە بىر تەرەپتىن خاپا بولغان ھالدا گۈزەلنۇرنىڭ ئىچىنى قاينىتىپ دىدى.
-مەن تېخى سىزنى ئەڭ كىچىك بولغاندىمۇ بىرەر تۈرنىڭ مەسئۈلى قىلامدىكىن دەپتىمەن،ئەمدى راستىنلا ياردەمچى قىلدىمۇ؟
ئەلفىرە قاپىقىنى ساڭگىلىتىپ داۋاملىق نەرسە-كېرەكلىرىنى يىغىشتۇرغاچ ئۇنىڭغا ئەسكەرتتى.
-ئىككى ئېغىز گەپنى ئاز قىلىڭ.
گۈزەلنۇرنىڭ شىركەتكە كېلىپ خىزمەت قىلىشى، ھەر كۈنلۈك كۆپ قىسىم ۋاقتىنى شىركەتكە سەرپ قىلىشى ئۇنىڭ ئۈچۈن چوڭ خۇش خەۋەر.گۈزەلنۇرنى ئۆزىنىڭ كۆز ئالدىدا تۇرغۇزۇش،گۈزەلنۇرنى ئۆيدە تۇرغۇزغاندىن ياخشى.
-ئەلفىرە باش نازارەتچى، سىزنىڭ مىجەزىڭىزمۇ بەك ياخشىكەن.
گۈلناز بىر تەرەپتىن ئەلفىرەگە ياردەملىشىپ ھۆججەت تىرىشىپ بەرسە، يەنە بىر تەرەپتىن ئۆزىنى تۇتۇۋالالماي غۇدۇراپ قويدى.
-ياردەمچىنىڭ بۇنچە ئوسال مىجەزىنى تۇنجى قېتىم كۆرۈشۈم،تېخى تۈر باش مەسئۇلىنىڭ ھۆججىتىنى يەرگە تاشلىۋەتكىنىنى كۆرۈڭ.
گۈزەلنۇرنىڭ قوشۇمىلىرى تۈرۈلۈپ تىك بولۇپ كەتتى.
-نىمە دەۋاتىسىز!؟
گۈزەلنۇر ئورنىدىن تۇرۇپ، ئاچچىقىدا ئېگىز پاشنىلىق ئاياغىدا دەسسەپ كەلگىنىچە گېپىنى داۋام قىلدى.
-ئۇنتۇپ قالماڭ، مەن ئەنزەرنىڭ خانىمى !مېنىڭ ھازىرقى سالاھىيىتىم ياردەمچى بولسىمۇ، مەن يەنىلا ئەنزەرنىڭ خوتۇنى ! پۈتۈن ئەنزەر گۇرۇھى مەن ۋە ئېرىمنىڭ، مەن سىزنى ئىشتىن بوشىتىمەن دىسەم، بۇ بىر چۈمۈلىنى بېسىپ ئۆلتۈرۈشتىنمۇ ئاسان !
ئۇنىڭ كۆرەڭلىگەن ئاۋازى گۈلنازنىڭ ئىختىيارسىز قاپىقىنى تۈردۈرۋەتتى.گەرچە نارازى بولسىمۇ، لېكىن ئۇ يەنىلا ئۈن-تىنسىز ئاغزىنى يۇمۇپ ھۆججەتلەرنى يىغىشتۇرۇپ بولغاندىن كېيىن، ئالدىراپ چىقىپ كەتتى.
ئەلفىرە ھۆججەتلەرنى رەتلەپ، گۈزەلنۇرغا قاراپ كۈلۈپ سورىدى.
-بۇ ئىشخانىنى ئالامسىز؟سىزگە لازىم بولسا، مەن سىزگە ئۆتۈنۈپ بېرەي، مەن سىرتقا چىقاي.
گۈزەلنۇر ئۇنىڭغا بىر قاراپ قويۇپ، يەنىلا ئورۇندۇقتىن تۇرۇپ،پۇقۇسلاپ سۆزلەپ كەتتى.
-مېنى سىزنىڭ بۇ ئەسكى يېرىڭىزگە خۇشتار ئوخشايدۇ دەپ قالدىڭىزما.
ئۇ شۇنداق دەپ ئورنىدىن تۇرغان شۇ پەيىتتە ئىش ئۈستىلىدىكى بىر پارچە سۈرەتكە كۆزى چۈشتى،بۇ ئەلفىرە بىلەن شاھزادنىڭ خاتىرە سۈرىتى.پەقەت، سۈرەتتىكى شاھزادنىڭ چىرايى خىلىلا تاتىرىپ كەتكەنىدى.ئۇ سەل-پەل كۆزىنى قىسىپ قويۇپ، سۈرەتنى قولىغا ئالغىنىچە ئېغىز ئاچتى.
-بۇ سۈرەتتىكى شاھزاد بەك چىرايىلىقكەن.
ئۇنىڭ رەسىمنى ئالغانلىقىنى كۆرۈپ،ئەلفىرەنىڭ كۆز قارىچۇقى بىردىنلا تارىيىپ ۋاقىردى.
-قويۇپ قويۇڭ!
-نېمىشقا قويۇپ قويىمەن؟
گۈزەلنۇر سوغۇق كۈلۈپ قويۇپ، سۈرەتنى يەرگە ئاتتى،ئاندىن ئۇ ئېگىز پاشنىلىق ئاياغ بىلەن ھېلىقى رەسىمگە دەسسىۋتتى. ئاياغنىڭ ئۆتكۈر ئىگىز پاشىنىسى سۈرەتتىكى ئادەم يۈزىنى تېشىۋەتتى.
بۇلارنى قىلىپ بولۇپ،گۈزەلنۇر ئېغىزىنى تۇتۇپ يالغاندىن چۆچىگەن بولۇپ ئېغىز ئاچتى.
-چاتاق بولدى،مەن ئېھتىياتسىزلىقتىن سىزنىڭ رەسىمىڭىزنى سۇندۇرۇپ بۇزۇپ قويدۇم.
ئەلفىرە ئۇدۇللا ئېتىلىپ بېرىپ،گۈزەلنۇرنى بىر چەتكە غەزەپ بىلەن ئىتتىرگىنىچە پارە پارە بولۇپ كەتكەن سۈرەت رامكىسىغا قاراپ يۈرىكى پىژىدە ئېچىشىپ كەتتى،گۈزەلنۇرنىڭ ئېگىز پاشنىلىق ئايىغى سۈرەتتىكى ئۇنىڭ يۈزىنى تېشىۋەتكەن بولسىمۇ،ئەمما ھېلىمۇ ياخشى، سۈرەتتىكى ئەلزادنىڭ رەسىمى بۇزۇلمىغانىدى.
بۇ ئۇنىڭ ئەلزادتىن ئايرىلىپ ۋەتەنگە قايتىشتىن بۇرۇن ئەلزاد بىلەن چۈشكەن ئەڭ ئاخىرقى بىر پارچە خاتىرە سۈرىتى،ھەر قېتىم ھارغىنلىق ھېس قىلغاندا، بۇ سۈرەت ئۇنىڭغا بەرداشلىق بېرىشكە كۈچ بىغىشلاپ كەلگەنىدى.
بىراق ھازىر...
ئەلفىرە قوشۇمىسىنى تۈرگىنىچە دەسسەپ چېقىلىپ كەتكەن رەسىمنى تېرىۋاتقاندا،رەسىم رامكىسىنىڭ چېقىلىپ كەتكەن پارچىسى ئۇنىڭ قولىنى تىلىۋەتتى،شۇنداق بولسىمۇ ئۇ خۇددى سەزمىگەندەك قان دېغىنى سۈرتىۋېتىپ، سۈرەتنى ئېھتىيات بىلەن يانچۇقىغا سالدى.
-ئەلفىرە باش نازارەتچى
ئىشىك ئالدىدا خىزمەتچىلەر ئۇنىڭدىن ئەنسىرەپ، ئىشىكتىن كىرىش-كىرمەسلىكتە ئىككىلىنىپ تۇرغان پەيىتتە،گۈزەلنۇر يەنىلا ئەس-ھوشىنى يوقاتقان ھالىتى بىلەن ئۆزىنى تۇتۇۋالالماي سوغۇق كۈلگىنىچە ئۇنى مەسخىرە قىلدى.
- شاھزاد بىلەن چۈشكەن بىر پارچە رەسىمغۇ شۇ،شاھزاد كۆك ئاسمان داچىسىدا،سىزنىڭ ئۇنىڭ بىلەن رەسىمگە چۈشكىڭىز بولسا بېرىپ بىرقانچە پارچە كۆپرەك چۈشۋالسىڭىزلا بولىدىغۇ،بۇنداق بىچارىلەرچە قىياپەتكە كىرۋىلىپ كىمگە كۆرسىتىسز؟
گۈزەلنۇرنىڭ بۇ مەسخرىلىك گەپلىرىدىن ئەلفىرە بېشىنى كۆتۈرۈپ،غەزەپ بىلەن قىزىرىپ كەتكەن كۆزلىرى بىلەن ئۇنىڭغا قاراپ ۋاقىردى.
-كۆزۈمدىن يوقال!
-ماڭا مۇشۇنداق گەپ قىلىشقا پېتىندىڭمۇ؟ساڭا دەپ قوياي، مېنىڭ ھازىرقى سالاھىيىتىم بىر ياردەمچى بولسىمۇ، مەن يەنىلا ئەنزەرنىڭ خوتۇنى، مەن...
-سەن ئەنزەرنىڭ خوتۇنى بولساڭمۇ، ھازىر پەقەت بىر ياردەمچى !
ئەلفىرە شۇنداق دەپ ئۇنىڭغا چەكچىيىپ قاراپ، كۆزلىرى يېرىلىپ كەتكۈدەك بولۇپ يەنە بۇيرۇق قىلدى.
-يوقال !
ئەلۋەتتە ئۇنىڭمۇ سەۋر-تاقىتىنىڭ چېكى باردە،بايامنىڭياقىن ئۇ گۈزەلنۇرنىڭ زورلۇق زومبۇلۇقلىرىغا ئىرەن قىلمىدى،چۈنكى ئۇنىڭ تالاشقىنى بىر ئىشخانا خالاس،ھەم بىرنەچچە تاشلىۋىتىلگەن ھۆججەت،پەقەت گۈزەلنۇر شىركەتكە كېلىپ ئىشلەشنى خالىسىلا،كۆك ئاسمان داچىسىدا قېلىپ شاھزاد بىلەن شاھنازنى تەڭلىكتە قويمىسىلا،ئۇ ئۇنىڭ ئۆزىگە قىلغان ھەرقانداق مۇئامىلىسىگە بەرداشلىق بىرەلەيتتى،ئۇنىڭغا يول قويۇشقا رازى ئىدى.
بىراق ھازىر...
-ئەلفىرە،ماڭا مۇشۇنداق گەپ قىلغىنىڭ ئۈچۈن پۇشايمان قىلما!
گۈزەلنۇر زەھەرخەندىلىك بىلەن ئۇنىڭغا ئالىيىپ قوقاق سالدى.
-ئىشىنەمسەن،مەن كۆك ئاسمان داچىسىغا قايىتپلا....
-كۆك ئاسمان داچىسىغا قايتىپ نېمە ئىش قىلغۇڭىز بار؟
تۇيۇقسىز، بىر ئەرنىڭ سوغۇق ئاۋازى ياڭرىدى.
-باش لىدىر !
ئىشىك ئالدىدا ئولىشىۋالغان خىزمەتچىلەر ئىختىيارسىز كەينىگە بۇرۇلۇپ قاراپ ، ئارقا-ئارقىدىن ئىشىك ئالدىدىكى يولنى بوشىتىپ بەردى،ئىگىز قامەتلىك ئەنزەر چوڭ قەدەم بىلەن ئىشخانىغا كىردى. ئۇنىڭ ئاۋازى ئاڭلانغان شۇ پەيىتتە گۈزەلنۇر كۆزنى يۇمۇپ ئاچقۇچە ئالاقزادە بولۇپ كەتتى،بىردەمدىلا ئۇ كۆزلىرىدىن تاراملاپ ياش تۆكۈلۈپ تۇرغان ھالدا ئەنزەرنىڭ قۇچىقىغا ئۆزىنى ئېتىپ ھال ئېيتىشقا باشلىدى.
-ئەنزەر.....ئەنزەر،ئەلفىرە ماڭا قوپاللىق قىلدى، ئۇ مېنى يوقال دېدى ! سىز مېنى ئىشقا كېلىڭ دېدىڭىز، مەن ئەتىگەندىلا كەلدىم، نېمە ئىش قىلىشىمنى بىلەلمەي،ئەلفىرەنىڭ ئىشخانىسىغا كېلىپ ئۇنى ساقلىدىم.نەتىجىدە ئېھتىياتسىزلىقتىن ئەلفىرەنىڭ رەسىم رامكىسى سۇندۇرۇپ قويغانىدىم،ئۇ ماڭا قوپاللىق قىلىپ، مېنى يوقال دېدى.
ئۇ بىر تەرەپتىن سۆزلىگەچ، يەنە بىر تەرەپتىن ئۇۋالچىلىق ئىچىدە كۆز ياشلىرىنى سۈرتتى.
-بىراق بۇ پەقەت ئۇنىڭ شاھزاد بىلەن چۈشكەن بىرپارچە رەسىمىكەن خالاس،ئۇ....
ئەنزەر قوشۇمىسىنى تۈرگىنىچە،ئۇنى قۇچىقىدىن ئاجراتقىنىچە ئېغىز ئاچتى.
-بايام سىلەر نىمە دىيىشتىڭلار مەن ھەممىنى ئاڭلىدىم.
گۈزەلنۇرنىڭ بەدىنى بىردىنلا قېتىپ قالدى.
-ئەنزەر....
ئەنزەر سوغۇقلا ئۇنىڭغا بىرنى كۆز يۈگۈرتىۋىتىپ گېپىنى داۋام قىلدى.
-قەستەن باشقىلارنىڭ ئىشخانىسدىكى نەرسىنى چېقىۋەتتىڭىز،تېخى باش لىدىرنىڭ خانىمىلىق سالاھىيتىڭىزنى كۆز كۆز قىلىپ قوقاق سالىدىڭىز،بۇ ئەتىگەن سىز ئۆيدىن ئايرىلىغان چاغدا ماڭا دىگەن ياخشى خىزمەت قىلىش ئۇسۇلىڭىزمۇ؟
گۈزەلنۇرنىڭ چىرايى كۆزنى يۇمۇپ ئاچقۇچە تاتىرىپ كەتتى.
-ئەنزەر، مەن...
ئىشىك ئالدىدا،ئەركىن ئۇلۇغ كىچىك تىنىغىنىچە ئەسكەرتتى.
-خانىم،بولدى چۈشەندۈرۈش بەرمەڭ،ئەپەندىم سىزنىڭ خىزمىتىڭىزنى ئالاھىدە يوقلاپ كەلگەن، ئۇ سىزنىڭ شىركەتكە تۆھپە قوشۇپ، بۇ يەرگە كېلىپ خىزمەت قىلىشىڭىزنىڭ تەسلىكىنى ئېيتىپ تۇرشىغا،سىزنىڭ ئەلفىرەنىڭ ئىشخانىسىدىكى رەسىمنى بۇزىۋەتكەنلىكىڭىزنى كۆردى.
گۈزەلنۇر ئۆزىنى ئاقلاشنىڭ ئورنى قالمىغانلىقىنى ھىس قىلىپ،لىۋىنى چىشلىگىنىچە تۇرۇپ قالدى،ئۇ... كەلگىلى شۇنچە ئۇزۇن بولدىمۇ؟
-ئەلفىرە
ئەنزەر چوڭ قەدەملەر بىلەن ئەلفىرەنىڭ ئالدىغا كېلىپ، ئۇنىڭغا قاراپ قولىنى سۇنۇپ بۇيرۇدى.
- سۈرەتنى ماڭا بېرىڭ.
ئەلفىرە قوشۇمىسىنى تۈرگىنىچە، ئۈن-تىنسىز كەينىگە بىر قەدەم چېكىندى.ئۇ ئەنزەرنىڭ ئۆزىدىن رەسىم سورىغانلىقىنى بىلىدۇ، ئۇنىڭ سۈرىتىنى ئەسلىگەكەلتۈرۈپ بەرمەكچى بولۇشى مۇمكىن،بىراق ...
بۇ ئۇنىڭ ئەلزاد بىلەن چۈشكەن سۈرىتى،ئىلگىرى ئەنزەر گەرچە بۇ سۈرەتنى كۆرۈپ باققان بولسىمۇ، لېكىن پەقەت يۈزەكىلا دىققەت قىلىپ قويغانىدى،ئەگەر ئەسلىگە كەلتۈرۈش ئۈچۈن تەپسىلىي كۆزەتسە...ئۇ ئۇنىڭ ئىشنىڭ باش-ئايىغىنى كۆرۈپ قېلىشىدىن قورقىدۇ.ئەنزەر ھازىر تېخى ئەلزادنىڭ مەۋجۇتلۇقىنى بىلمەيدۇ.لېكىن ئۇ شاھناز بىلەن شاھزاد ئىككى بالىنىڭ سالاھىيىتىنى بايقىغاندىن كېيىن،ئۆزى بالىلىرىنىڭ يېنىدىن ئايرىلىشقا مەجبۇر بولدى،شۇڭا ئۇ ئەمدى ئەلزادتىن ئايرىلىپ قالسا بولمايدۇ.
-مەن پەقەت سىزگە ياردەم قىلماقچى.
ئەنزەر قوشۇمىسىنى يىنىك تۈرۈپ، يەنە ئالدىغا بىر قەدەم ماڭدى. ئەلفىرە ئىختىيارسىز بېشىنى چايقاپ جاۋاپ بەردى.
-بولدى، ئۆزۈم قىلالايمەن...
-ئەلفىرە! مېنى بېرىپ سىزدىن رەسىم تالاشسۇن دىمەكچىمۇ؟
ئەلفىرە داڭ قېتىپ تۇرۇپ قالدى، بېشىنى كۆتۈرۈپ ئۇنىڭغا قارىغان شۇ پەيىتتە ئەنزەرنىڭ تېگى كۆرۈنمەيدىغان كۆزلىرى مۇرەككەپ كەيپىياتلار بىلەن تولغان ئىدى.ئۇ لېۋىنى چىشلەپ، بىر ھازاغىچە سۈكۈتتە تۇرغاندىن كېيىن، يەنىلا ھېلىقى سۈرەتنى ئېلىپ ئۇنىڭغا سۇندى.
رەسىمگە ئۇنىڭ قولىدىن ئاققان قان دېغى يۇقۇپ قالغان بولۇپ،قان ئاللىقاچان پۈتۈن رەسىمنى قىزىلغا بويىۋەتكەنىدى،سۈرەتتىكىسى ئەلفىرە بىلەن شاھزادنىڭ بىللە چۈشكەن سۈرىتى،سۈرەتتىكى ئەلفىرەنىڭ يۈزى ئېگىز پاشنىلىق ئاياغنىڭ پاشنىسى تەرىپىدىن دەسسىلىپ بىر تۆشۈك ئېچىپ قويۇلغاندىن باشقا،يەنەبىر چەتتىكى شاھزادمۇ ئادەتتە ئۆزى بىلىدىغان شاھزادنىڭ چىراي ئىپادىسىگە ئوخشىمايتتى.بۇ ئەنزەر ئاققۇ كۆلىدىكى ياتاق بىناسىدا كۆرگەن سۈرەتكە ئوخشاش، سۈرەتتىكى شاھزادنىڭ چىرايى تاتىرىپ كەتكەنىدى،ھەتتا كۆزلىرىدىن چىققان نۇرمۇ ئادەمگە شاھزادنىڭكىدىنمۇ بەكراق پىشىلىپ يىتىلىگەندەك تۇيغۇ بىرەتتى.
ئەنزەرنىڭ كۆزلىرى قىسىلدى،ئۇ ئۆزىدىكى بۇ تۇيغۇنىڭ خاتا تۇيغۇ ياكى ئەمەسلىكىنى بىلمەيتتى،پەقەت يۈرىكى ئۇنىڭغا سۈرەتتىكى ئوغۇل بالىنىڭ شاھزاد ئەمەس، بەلكى باشقا بىر بالا ئىكەنلىكىنى ھېس قىلدۇرۋاتاتتى،بىراق بۇ خىيال كىلىشىگىلا،ئۇ يەنىلا خىيالىنى ئىنكار قىلىۋەتتى،چۈنكى ئۇنىڭ باشقا ئادەم بولىشى قانداقمۇ مۇمكىن بولسۇن؟شاھزاد بىلەن شاھناز قوشكېزەك تۇرسا،قانداقسىگە يەنە ئۇنىڭغا ئوخشاش يەنە بىر بالا بولىدۇ؟
ئەنزەر شۇنداق ئويلاپ،ئۆزىنىڭ خىيالىنى ئىنكار قىلىپ ئۇلۇغ كىچىك تىنىپ قويۇپ، سۈرەتنى يىغىشتۇرغاچ ئېغىز ئاچتى.
-ئەگەر بۇ سۈرەت سىز ئۈچۈن شۇنچە مۇھىم بولسا، مەن ئادەم تېپىپ سىزگە ئوڭشاپ بېرىمەن.
ئۇ گېپىنى تۈگىتىپ،ئەلفىرەنىڭ يارىلانغان بارمىقىغا قاراپ سورىدى.
-بىرەر ئىش بولمىغاندۇ؟
ئەلفىرە بىردەم تۇرۇۋالغاندىن كېيىن، دەرھال قان ئېقىۋاتقان قولىنى يۇشۇرۇپ،جاۋاپ قىلدى.
-ھىچ ئىش يوق.
ئەنزەر ئۇنىڭغا چوڭقۇر تىكىلىپ قارىغىنىچە،بىرنىمىلەرنى دىمەكچى بولدىيۇ،بىراق يەنىلا ھىچنىمە دىيەلمەي،قەدەملىرىنى كۆتىرىپ بۇ يەردىن ئايرىلماقچى بولۇپ،بىرنەچچە قەدەم ماڭمايلا يەنە توختاپ ئېغىز ئاچتى.
-ئەركىن
-ئەپەندىم
ئەركىن ئىززەت-ئىكرام بىلەن ئېغىز ئاچتى.
-دورا ساندۇقى تېپىپ،ئەلفىرەنىڭ بارمىقىدىكى يارا ئېغىزىنى بىر تەرەپ قىلىشىپ بەر،ئاندىن سۈرەتنى ئەسلىگە كەلتۈرۈشنى بىلىدىغان ئادەم تېپىپ كەل.
-ماقۇل
ھەممىنى ئورۇنلاشتۇرۇپ بولغاندىن كېيىن،ئەنزەر كۆزلىرىنى بۇراپ گۈزەلنۇرغا قاراپ بۇيرۇق قىلدى.
-ئىشخانامغا كىرىڭ.
شۇ گەپ بىلەن گۈزەلنۇرنىڭ قوللىرى بەدىنىگە چىڭڭىدە چاپلاشقىنىچە، جىمجىت ھالدا ئۇنىڭ كەينىدىن ئەگىشىپ ماڭدى.
ئۇ ئەنزەرنىڭ ئەتىگەندىلا ئىشخانىسىدا ئىشلىمەي، لايىھىلەش بۆلۈمىگە كېلىپ، بۈگۈنكى ئىپادىسىنى كۆرۈپ بېقىشىنى قانداقمۇ خىيالىغا كەلتۈرسۇن !ئەگەر ئۇ ئەنزەرنىڭ كېلىدىغانلىقىنى بىلگەن بولسا،ئۆلسىمۇ ئەلفىرەنىڭ ئالدىدا ئۆزىنى كۆرسەتمەيتتى !
ئىككىيلەن بىرلىكتە ئەنزەرنىڭ ئىشخانىسىغا كىرگەندىن كىيىن،ئەنزەر ئورۇندۇقىدا ئولتۇرۇپلا،سوغۇق نەزىرى بىلەن گۈزەلنۇرغا تىكىلىپ ئېغىز ئاچتى.
-ئەتىگەندىلا ئەلفىرەنى تەڭلىكتە قويغىنىڭىز مېنىڭ سىزنى شىركەتكە كېلىپ ئىشلەڭ دىگەن قارارىمدىن نارازى بولغانلىقىڭىزمۇ؟
-ياق... ئۇنداق ئەمەس
گۈزەلنۇر كالپۇكىنى چىڭ چىشلەپ، بىر جۈپ كۆزى ئۇۋالچىلىق ئىچىدە ئەنزەرنىڭ يۈزىگە قاراپ چۈشەندۈرشكە باشلىدى.
-مەن سىزنىڭ ئورۇنلاشتۇرۇشىڭىزدىن نارازى بولمىدىم...مەن ئەمەلىيەتتە شىركەتكە كېلىپ ئىشلەشنى خالايمەن.مەن بىلىمەن، سىز مېنى شىركەتكە كېلىپ خىزمەت قىلدۇرماقچى بولشىڭىز بىر تەرەپتىن ئۆيدە يالغۇز زېرىكىپ قېلىشىمدىن ئەنسىردىڭىز، يەنە بىر تەرەپتىن مېنى شىركەتنىڭ مۇھىتى بىلەن تونۇشتۇرۇپ، بۇنىڭدىن كېيىن ئەر-خوتۇن ئىككىمىز بىللە خىزمەت قىلساق دىگەن مەنانى بىلدۈرمەكچى ئىدىڭىز...پەقەت...
ئەنزەر كۆزلىرىنى قىسىقىنىچە سورىدى.
-پەقەت نىمە؟
-پەقەت.
گۈزەلنۇر چوڭقۇر بىر تىنىۋالغاندىن كېيىن،ئەنزەرنىڭ چىرايىغا قاراپ كۆڭلىدىكىنى يۈرەكلىك ھالدا ئىپادىلىدى.
-مەن ئىشنى ئەڭ تۆۋەن قاتلامدىن باشلىسام، ئۇلارنىڭ مېنى كۆزگە ئىلماسلىقىدىن ئەنسىرەيمەن.خۇددى ئېنىقلا باش لىدىرنىڭ خانىمى تۇرۇقلۇق،ئىشنى ياردەمچىلىكتىن باشلاپتۇ دەپ قىلشىمدىن قورۇقتۇم،ئەنزەر، سىزمۇ بىلىسىز،مەن ئادەتتىكى ئائىلىدىن كىلىپ چىققان،ئاتا ئانامنىڭ ھىچقانچىلىق ئىقتىدارى يوق،شۇڭا مەن ئۆزۈمنى ئىزچىل كەمسىتىپ كەلگەنىدىم...
گۈزەلنۇرنىڭ بۇ يىغلاپ تۇرۇپ دىگەن گەپلىرىدىن ئەنزەر قوشمىسىنى تۈرگىنىچە،ئۇنىڭ يىغلاپ قىپقىزىل بولۇپ كەتكەن كۆزلىرىگە قاراپ، ئەڭ ئاخىرىدا ئېغىر ئۇھ تارتقىنىچە،تەسەللىي بەرگەچ چۈشەندۈردى.
-ئەلفىرەگە ئوخشاش ئىقتىدارى كۈچلۈك ئادەم بىلەن بىللە خىزمەت قىلىش، سىزگە نىسبەتەن ھەقىقەتەن بەك شەپقەتسىزلىك بولۇشى مۇمكىن.بىراق مەن ئۇنىڭغا سىزگە قىيىن خىزمەتلەرنى ئاز ئورۇنلاشتۇرۇپ بېرىشنى ئېيتىمەن.
ئەنزەر شۇنداق دەپ،ئۇنىڭغا قاراپ بىردەم تۇرۋەتكەندىن كيىن گېپىنى داۋام قىلدى.
-مەن سىزنىڭ بايام ئەلفىرەگە قىلغان قىلمىشىڭىزنى چۈشەنسەم بولىدۇ، چۈنكى سىز ئۆزىڭىزنىڭ ئابرويىنى تىكلەپ، يۈزىڭىزنى تاپماقچى. لېكىن سۈرەتنىڭ ئىشى...راستىنلا تاسادىپىيلىقمۇ؟
ئەلفىرەنىڭ ئۈستىلىدىكى شۇنچە كۆپ نەرسە تۇرسا، نېمىشقا قېرىشقاندەك ئېھتىياتسىزلىقتىن رەسىم رامكىسىنى چېقىپ سالىدۇ؟ يەنە ئېھتىياتسىزلىقتىن رەسىمدىكى ئەلفىرەنىڭ يۈزىنى دەسسەپ بىر تۆشۈك ئېچىپ قويۇلغىنى نىمىسى؟ئەگەر گۈزەلنۇر باشقا باھانىلەر بىلەن بۇلارنى چۈشەندۈرمەكچى بولسا،ئەنزەرمۇ ئەخمەق ئەمەستە،گۈزەلنۇر بۇ نۇقتىنى چوڭقۇر بىلىدۇ.
- مەن قەستەن قىلدىم.
ئەنزەرنىڭ قوشۇمىلىرى تۈرۈلۈپ كەتتى.
-مەن ئەلفىرەبىلەن شاھزادنىڭ شۇنچە كۆپ ئۆتمۈشىنىڭ بارلىقىغا ھەسەت قىلىمەن،چۈنكى شاھزاد ئىككىمىزنىڭ ھىچنىمىمىز يوق. ئەلفىرە ئوغلۇم بىلەن چۈشكەن سۈرىتىنى ئۈستەلگە تىزىپ قويسا بولىدۇ،لېكىن مەنچۇ؟ مېنىڭ ھېچنېمەم يوق،شاھزاد ھازىرغىچە مېنى ئاپا دەپ چاقىرىشنى خالىمايدۇ، مەن بىلەن خاتىرە سۈرەتكە چۈشۈشنىمۇ خالىمايدۇ.
ئۇ گېپىنى تۈگىتىپ، مەردانىلىك بىلەن بېشىنى كۆتۈرۈپ گېپىنى داۋام قىلدى.
-مەن بۇنداق قىلىشنىڭ خاتا ئىكەنلىكىنى بىلىمەن، لېكىن مەن چىداپ تۇرالمىدىم.شاھزاد مېنىڭ ئوغلۇم، مەن ئەلفىرەنىڭ ئۇنىڭ بىلەن بۇنداق يېقىن ئۆتۈشىگە چىدىيالمايمەن.
-لېكىن بىلىشىڭىز كېرەك،سىز شاھزادنىڭ ئالدىنقى ئالتە يىللىق ھاياتىدا مەۋجۇت بولۇپ باقمىغان.
ئەنزەر ئۇزۇن بارمىقىلىرى بىلەن ئىش ئۈستىلىنى چەككەچ ئۇنىڭ گېپىنى بۆلىۋەتتى.
-ئۇنىڭ ئۈستىگە شاھزاد سىزنىڭ يېنىڭىزغا قايتىپ كەلگەن تەقدىردىمۇ، سىز ئۇنىڭ ئالدىدا ئانىلىق مەسئۇلىيىتىڭىزنى ئادا قىلمىدىڭىز.
گۈزەلنۇر لىۋىنى چىشلىگىنىچە،ئۆزىنى ئاقلاش ئۈچۈن باھانە تاپتى.
-ماڭا پۇرسەت بولمىدى،مەن...
ئۇ يەنە داۋاملىق سۆزلىمەكچى بولغاندا، ئىشخانىنىڭ ئىشىكى باشقىلار تەرىپىدىن چېلىندى.
ئىشىك سىرتىدىن ئەركىننىڭ «باش لىدىر، سۈرەتنى ئەسلىگە كەلتۈرىدىغان مۇتەخەسسىس كەلدى» دېگەن ئاۋازى ئاڭلاندى.
ئەنزەر سۇسلا جاۋاب بېرىپ، ئاندىن بۇرۇلۇپ گۈزەلنۇرغا قاراپ بۇيرۇق قىلدى.
-سىز قايىتىپ خىزمەت قىلغاچ تۇرۇڭ،لېكىن ئېسىڭىزدە بولسۇن،شاھزاد سىز بىلەن يېقىن ئەمەس، بۇ سىزنىڭ مەسىلىڭىز، ئەلفىرەنىڭ مەسىلىسى ئەمەس.بۇنىڭدىن كېيىن شەخسىي كەيپىياتىڭىزنى خىزمەتكە ئېلىپ كىرىشكە بولمايدۇ.
گۈزەلنۇر كالپۇكىنى چىشلەپ، ئۇۋالچىلىق ئىچىدە ماقۇل دىگىنىچە، بۇرۇلۇپلا كېتىپ قالدى.ئۇ كەينىگە بۇرۇلۇپ ئىككى قەدەم مېڭىشىغا، ئەنزەر تۇيۇقسىز بىر نەرسىنى ئېسىگە ئالغاندەك سورىدى.
-ئەينى چاغدا سىز شاھزاد بىلەن شاھنازدىن ئىبارەت ئىككى بالىنىلا تۇغقانلىقىڭىزنى جەزىملەشتۈرەلەمسىز؟
گۈزەلنۇر يۈرىكى جىغغىدە قىپ قالدى.
