- ئەسلىدە شەۋكەت ئاكام ئاغرىپ قاپتىكەندە ، ئۇنى دوختۇرخانىغا يوقلاپ بىرىشىم كىرەكمۇ قانداق ؟
ئىشىك تەرەپتىن كىرگەن بەختىيار زالدىكى مۇلازىمەت ساقلاش سۇپىسىدا خىيالچان ئولتۇرغان ئادىلەنى كۆرۈپ چىرايىغا سۇس كۈلكە يۈگۈرتتى، ئۇ چاندۇرماستىن ئادىلەنىڭ يىنىغا كەلدى :
- خەيىرلىك سەھەر ! ئادىلە بىشىنى كۆتۈرۈپ ئۆزىگە كۈلۈمسىرەپ تۇرغان بەختىيارنى كۆردى :
- بەختىيار ئاكا، بۈگۈن ئىشقا سەل كىچىكتىڭىزغۇ ؟
- نىمە ؟ ساقلىتىۋەتتىمما ؟ يۈرۈڭ ئىشخانامغا چىقايلى !
بەختىيار ئادىلەنىڭ قولىدىن تارتىپ لىفىت تەرەپكە ماڭدى .
- بەختىيار ئەپەندى، خەيىرلىك سەھەر !
- بەختىيار ئەپەندى، خەيىرلىك سەھەر !
ھەر بىر خادىم بەختىيارغا خەيىرلىك سالام يوللىغان بولسىمۇ، ئادىلە ئۇنىڭ يىنىدا سەل بىمالال ماڭالمايۋاتقاندەك، كۆزلىرى باشقا خادىملارنىڭ غەلىتە پىچىرلاشلىرىغا كىتىپ قالاتتى، ئۇلار لىفىت ئارقىلىق ئىككىنچى قەۋەتكە چىقىپ بەختىيارنىڭ ئىشخانىسىغا كىردى، بەختىيار ئۈستىدىكى چاپىنىنى سىلىپ ئاسقۇچقا ئاستى .
- قىنى ئولتۇرۇڭ ! ئۇ ئادىلەنى ئولتۇرۇشقا تەكلىپ قىلغاچ ئۆزىنىڭ ئىش ئۈستىلىگە كىلىپ ئولتۇردى .
- قارىغاندا خىلى سەھەر كەلگەندەك تۇرىسىز، ناشتا قىلدىڭىزمۇ ؟
- ياق، تۇنجى قىتىمدىلا ئىشقا كىچىكىپ باشقىلارغا يامان تەسىر بەرمەي دىدىم، بىراق، شۇنداقتىمۇ ھىچكىم مىنى ياقتۇرمىغاندەك قىلىدۇ . ئادىلەنىڭ سۇلغۇن چىرايىغا قاراپ بەختىيار سۇس كۈلدى :
- بولدى، كۆڭلىڭىزنى يىرىم قىلماڭ، بۇ يەردىكى خادىملارنىڭ كۆپىنچىسى ئۆز كۈچىگە تايىنىپ ئىشقا ئورۇنلاشقان، ئىلگىرىكى شىركەت ئەھۋالىمنى بىلىسىز، ئورنى كىچىك، خادىملىرىممۇ ئىقتىدارسىز ئىدى، ھازىر سىستىمىلاشقان شىركەت بىناسى قۇرۇلدى، خىزمەت شەكلىمۇ ئىلگىرىكىگە ئوخشىمايدۇ، ھەممىسى سەر خىل خادىملاردىن تەشكىل تاپقان، ئۇنىڭ ئۈستىگە مۇنتىزىم مودىل تەھرىرات بۆلىمى بار، يەنە ھەر قايسى تۈرلەرنىمۇ يىڭىدىن يولغا قويدۇق، ئىلگىرىكى خادىملاردىن بىر نەچچىسىلا قالدى، قالغانلىرى يىڭى خادىملار ، ئۇلارنىڭ سىزنى مۇناسىۋەتكە تايىنىپ كىرگەن دەپ ئارقىڭىزدىن بولمىغۇر گەپلەرنى قىلىشى ئىنىق ، مەن سىزگە ئىشىنىمەن، سىز مودىل ساھەسىدە داڭلىق ئوبراز يارىتالايسىز، شۇڭا سىزنى بۇرۇنلا شىركىتىمگە تەكلىپ قىلىشتىكى مۇددىئايىم شۇ ئىدى .
- بىراق ھازىر شىركىتىڭلاردا ئالاھىدە تەكلىپ قىلغان مودىل قىز بار تۇرۇپ، سىز يەنە نىمىشقا مىنى تەكلىپ قىلىسىز ؟ ياكى مەن بىلەن مۇناسىۋەتنى يىقىنلاشتۇرۇش ئۈچۈن مۇشۇنداق قىلدىڭىزمۇ ؟ بەختىيار ئادىلەگە قاراپ ھەييارلىق بىلەن كۈلدى :
- قارىڭە سىزنى، بۇ ئىككىسى ئىككى ئىش، سىزنى تاللىشىم شەخسىي مەنپەئەت ئۈچۈن ئەمەس، بەلكى سىز راستىنلا مىنىڭ نەزىرىمدە ياخشى بىر مودىل، ئىشىنىمەنكى، ئاز ۋاقىت ئۆتمەيلا سىز شىركەتتىكىلەرنىڭ ئىتىراپ قىلىشىغا ئىرىشەلەيسىز، ئەمدى كۆپ ئىشلارنى ئويلىماي ياخشى ئىشلەڭ .
- ماقۇل، بىراق سىزدىن يەنە بىر ئىشنى سوراي، شەۋكەت ئاكام ئاغرىپ قالدىما ؟ بەختىيار ھەيران بولغاندەك ئادىلەگە تىكىلدى :
- بۇنى قانداق بىلدىڭىز ؟ ئۇ دوختۇرخانىدا داۋالىنىۋاتىدۇ .
- بۇ شىركەتتە ئۇنىڭدىن باشقىسىنى تونۇمايدىكەنمەن، شۇڭا ئۇنى سوراپ باققۇم كەلدى، ئەپسۇس، ئۇ ئاغرىپ قاپتۇ .
- بولدى، ھازىر باشقىلارغا كۆڭۈل بۆلىدىغان چاغ ئەمەس، سىزمۇ ئاغرىپ قالغاندا كىم سىزگە كۆڭۈل بۆلگەن، شۇڭا بەك ئاقكۆڭۈل بوپ كەتمەڭ . بەختىيار ئىشخانىسىدىكى تىلفۇندا بىرسىگە تىلفۇن قىلدى :
- ۋەي، يىڭى مودىلنىڭ خىزمەتلىرىنى ئورۇنلاشتۇرۇپ بولدىڭىزمۇ ؟
ھە ھە، ئەمسە ئۇنى سەل تۇرۇپ يىنىڭىزغا ئاچىقىمەن،
ھە شۇنداق بولسۇن .
بەختىيار تىلفۇننى قويۇپ ئادىلەگە مەنىلىك كۈلۈمسىرەپ قويدى :
- خىزمەت ئىشىڭىز ھەل بولدى، ھە راست، مەن بىرسىدىن كىلەر ئاينىڭ بىشىدا توي مۇراسىمى ئۆتكۈزسە ئامەت كىلىدۇ دەپ ئاڭلىدىم، بىز تەييارلىقنى بۈگۈنلا باشلىساق بولىدىغان ئوخشايدۇ .
- نىمە ؟ كىلەر ئايغا نەچچە كۈنلا قالغان تۇرسا ؟ مەن تىخى يىڭى ئىشقا چىقتىم، سىزمۇ شىركەتتە ئالدىراش، بۇنداق مۇھىم ۋاقىتتا بىز توي تەييارلىقىغا چۈشسەك باشقىلار خاتا چۈشىنىپ قالارمىكىن .
- ھەي ئەنسىرىمەڭ ، ھەممە ئىشلار ئۆز يولىدا ماڭىدۇ ، توي تەييارلىق ئىشلىرىنى ئۆزۈم ئورۇنلاشتۇرىمەن، سىز پەقەت ۋاقتى كەلسە گۈزەل كىلىنچەك بوپ بەرسىڭىزلا بولىدۇ .
ئادىلە ئارتۇق ئۈندىمىدى ، ئۇ ئىشلارنىڭ ئۆزى كۈتكەندەك چىقىشىنى ئۈمىد قىلسىمۇ، بىراق دوختۇرنىڭ مەدىنەنىڭ كىسىلى توغرىسىدا ئىيتقانلىرى ئۇنى سەل گاڭگىرىتىپ قويىۋاتاتتى . چۈشتىن كىيىنلىك ۋاقىت ئادىلەنىڭ خىزمەت ئەھۋالى ۋە خىزمەتچىلەر بىلەن تونۇشۇپ پىكىر ئالماشتۇرىشى بىلەن ئۆتۈپ كەتتى .
ئىككى كۈن ئۆتكەندىن كىيىن بەختىيار ئادىلەنى توي كۆينەك ۋە باشقا مۇراسىم كىيىملىرىنى كۆرۈشكە ئىلىپ كەلدى، بۇ بىر چوڭ زەنجىرسىمان مۇراسىم كىيىملىرى دۇكىنى بولۇپ، دۇكان ئىچى ئاجايىپ ئىسىل بىزەلگەن، ھەر خىل مۇراسىم كىيىملىرى ۋە توي كۆينەكلەر بىلەن لىق تولغان ئىدى ، دۇكان خادىمى ئۇلارنى قىزغىن كۈتىۋىلىپ دۇكان ئىچىدىكى ئازادە ئورۇنغا تەكلىپ قىلدى .
- ئەپەندى ، خانقىز، مۇراسىم كۆينىكى كۆرەمسىلەر ؟ دۇكىنىمىزدا ھەر خىل مۇراسىم كۆينەكلىرى بار، ھەممىسى يىڭى پاسۇن، قىزىڭىزغا چوقۇم يارايدۇ . بۇ گەپنى ئاڭلاپ بەختىيارنىڭ چىرايى سەل ئۆزگىرىپ :
- خانقىز، بىز توي كۆينىكى كۆرگىلى كەلگەن ، بۇياق مىنىڭ بولغۇسى رەپىقەم بولىدۇ . مۇلازىمەتچى بايا قىلغان گىپىدىن خىجىل بولۇپ بىشىنى تۆۋەن سالدى :
- كە كەچۈرۈڭ ، بايا ئۇقۇشماي خاتا سۆزلەپ ساپتىمەن، ئەيىپكە بۇيرىماڭ ئەپەندى . دۇكان خادىمى دەرھال ئۇلارغا چاي دەملىگەچ بىر ماتىريالنى ئەكىلىپ بەختىيارغا سۇندى :
- ئەپەندى، بۇ بىزنىڭ ئىتىبار تۈرلىمىز، يەنە ھەر خىل مۇراسىم كۆينەكلىرىنى ئەرزان باھادا ئىجارىگە بىرىمىز ، قىنى كۆرۈپ بىقىڭ ؟ بەختىيار ماتىريالنى كۆرۈشكە خوشياقمىغاندەك ئالدىدىكى ئەينەك ئۈستەلگە تاشلاپ قويدى .
- مەن ئايالىمغا ئەڭ قىممەت ، ئىسىل توي كۆينەك سىتىۋالىمەن، نەق پۇل تۆلەپ ئالىمەن، ھىچقانداق ئىتىبار پائالىيەتلىرىنىڭ كىرىكى يوق .
- بو بولىدۇ ، ئەمسە خانقىز ئۆزى توي كۆينەكلەرنى كۆرۈپ باقسۇن، ئەگەر بۇ يەردىكى كۆينەكلەر يارىمىسا بىز قايتىدىن لاھىيەلەپ تىز سۈرئەتتە پۈتتۈرۈپ بەرسەك بولىدۇ . بەختىيار بىشىنى لىڭشىتىپ ئادىلەگە قارىدى :
- ئادىلە، بۇ دۇكان ئۈرۈمچىدىكى ئەڭ چوڭ مۇراسىم ، توي كۆينەك دۇكىنى، قىنى، ئۆزىڭىز كۆرۈپ چىقىڭ ، يارىغانلىرى بولسا سىناپ بىقىڭ ، ئەگەر بىرەرسىمۇ يارىمىسا مەن ئۆزۈم سىزگە شاڭخەيدىن توي كۆينەك ئەكەلدۈرۈپ بىرەي .
- بولدى، ھاجىتى يوق ، بۇ يەردىكى كۆينەكلەر بەك چىرايلىقكەن، ئاددىيراق بولسىمۇ ھىچقىسى يوق .
- بولمايدۇ، بۇ سىزنىڭ تۇنجى تويىڭىز، قىزلار تۇنجى تويىدا ئەڭ گۈزەل، لاتاپەتلىك كىلىنچەك بولۇشنى بەكمۇ ئارزۇ قىلىدۇ ، شۇڭا ئەڭ ئىسىلىنى تاللىشىڭىز كىرەك .
ئادىلە سۇس كۈلۈمسىرەپ بىشىنى لىڭشىتىپ قويدى ، ئۇ ئورنىدىن تۇرۇپ توي كۆينەكلەرگە قاراپ قايسىنى تاللاشنى بىلەلمەي دىلغۇلا بوپ تۇرغاندا، دۇكانغا يەنە بىر جۈپ قىز-يىگىت توي كۆينىكى كۆرگىلى كىرىپ كەلدى ، بۇ بىر جۈپ ياش قاھار بىلەن نادىرە بولۇپ، ئۇلار ئىككى تەرەپ كىلىشىپ تويغا پۈتۈشكەن ئىدى، ئۇلار دۇكانغا كىرىپ توي كۆينەك تاللاشتى ، قاھار نادىرەگە بىر ئاق رەڭلىك بوز توي كۆينەكنى كۆرسەتتى :
- بۇ بولىدىكەن ، كىيىپ سىناپ باقامسىز ؟ نادىرە بىشىنى لىڭشىتتى :
- ماقۇل ، بۇنى مەنمۇ ياقتۇردۇم .
نادىرە مۇلازىمەتچىنىڭ يول كۆرسەتمىسى بويىنچە زالنىڭ ئوڭ تەرىپىدىكى كىيىم ئالماشتۇرۇش ئۆيىگە كىرىپ كەتتى ، قاھار بولسا زال ئوتتۇرىسىدىكى كىرىسلودا پۇتىنى مىنگەشتۈرۈپ ژورنال كۆرىۋاتقان بەختىيارغا مۇنداقلا قاراپ قويۇپ يان تەرەپكە كىلىپ ئولتۇردى . ئادىلە چىرايلىق بىر ھالرەڭ كۆينەكنى تۇتۇپ :
- خانقىز، مەن ماۋۇنى سىناپ باقاي ؟ ئادىلەنىڭ ئەتراپىدا پىرقىراپ يۈرگەن مۇلازىمەتچى قىز سۇس كۈلۈمسىرەپ :
- خانقىز، كۆزىڭىز بەك ئۆتكۈركەن، بۇ دۇكىنىمىزغا يىڭىدىن كىرگەن توي كۆينەك ، بۇ يىلقى ئەڭ مودا پاسۇن، رەڭگىمۇ سىزگە ئوخشاش ئاق يۈزلۈك قىزلارغا ماس كىلىدۇ ، مىنىڭچە بۇ كۆينەك سىزگە بەك يارىشىدۇ .
ئادىلە مۇلازىمەتچى ئىلىپ بەرگەن كۆينەكنى ئىلىپ كىيىم ئالماشتۇرۇش ئۆيىگە كىرىپ كەتتى ، بۇ دۇكان بەكلا چوڭ بولۇپ، تۆت دۇكاننىڭ بىرىكمىسىدىن تەشكىل تاپقاچقا، بۇ يەردە ئىشلەيدىغان خادىملارمۇ كۆپ ئىدى . ئادىلە كۆينەكنى كىيىپ تاشقىرىغا چىقىشىغا مۇلازىمەتچى قىز ئادىلەگە قاراپ :
- پاھ ! بۇ كىيىم سىزگە بەك ياراشتى ، بوي-بەستىڭىز بۇ كىيىمگە دەللا چۈشتى، ھەقىقەتەن بەك ياراشتى . ئاغزى-ئاغزىغا تەگمەي ماختاشلار ئادىلەنى خىجىل قىلىپ قويغاندەك ئۇ كىيىمنى ئالماشتۇرماقچى بولدى .
- خانقىز ، ئۈستىڭىزدىكى بۇ كىيىمنى تىخى بايىقى ئەپەندى كۆرمىدى ، بولمىسا ئۇنى بۇ يەرگە چاقىراي .
- توغرا، بۇ كىيىم ئۇنىڭغا يارىسا بىز سىتىۋالايلى، مەن بۇ كىيىمنى ياقتۇردۇم .
- ئەمسە بۇياققا مەرھەمەت !
ئادىلە مۇلازىمەتچى بىلەن چوڭ زالدىكى بەختىيار ئولتۇرغان يەرگە چىقتى ، بەختىيار مودا ژورنىلى كۆرۈپ ئولتۇرغان بولۇپ، ياندىكى كىرىسلودا قاھارمۇ تىلفۇن ئويناپ ئولتۇرغان ئىدى .
- ئەپەندى، خانىمىڭىز چىقتى .
بەختىيار بىردىنلا ئادىلەگە تىكىلىپ ئۆزىمۇ تۇيماي ئورنىدىن تۇرۇپ كەتتى :
- پاھ ! بۇ بۇ سىزمۇ ؟
بەختىيارنىڭ كۆزلىرىدىكى ھاياجانلىق ئىپادىلەر ئادىلەنى خىجىل قىلىپ قويدىمۇ، ئۇ بىشىنى كۆتۈرەلمەي قالدى ، بەختىيار ئاستا ئۇنىڭ يىنىغا كىلىپ ئادىلەنىڭ ئەتراپىدا ئايلاندى :
- بۇ كىيىم سىزگە بەكلا ماس كەپتۇ، ئەگەر سىزگە يارىغان بولسا مۇشۇنى ئالايلى .
- ئەپەندى، بۇ خانقىزمۇ مۇشۇ كىيىمنى ياقتۇردى ، ئەگەر خالىساڭلار شىركىتىمىزنىڭ
ئىتىبار كارتسى بار ، يەنە مۇلازىمەت كىرەك بولسا باھادا ئىتىبار قىلىمىز .
- بولدى ، بۇ كىيىمنى ئوراپ بىرىڭ ، نەق پۇل تۆلەيمەن . بەختىيار مۇلازىم تەڭلىگەن كارتىنى ئىلىپ :
- ئەگەر مۇراسىم كىيىمى لازىم بولسا يەنە كىلىشىمىز مۇمكىن .
- رەھمەت ئەپەندى . مۇلازىمەتچى قىز ئادىلەگە قاراپ سۇس كۈلۈمسىرەپ :
- خانقىز، بۇياققا مەرھەمەت !
ئادىلە ئارقىسىغا بۇرۇلۇپ ئەمدى ئىككى قەدەم ئىلىشىغا، تونۇش بىر ئاۋازدىن قەدىمى توختاپ قالدى .
- ئوھۇي بۇ ئادىلەغۇ ؟ نىمىدىگەن توغرا كەپ قىلىش بۇ ! ئادىلە دەرھال ئارقىسىغا بۇرۇلۇپ ئىككى مىتىر ئارلىقتا ئۆزىگە قاراپ كۈلۈمسىرەپ تۇرغان قاھارنى كۆردى .
- قا قاھار…
- قارىغاندا مىنى ئۇنتۇپ قالماپسىزدە ؟ ماڭا بۇياقنى تونۇشتۇرۇپ قويمامسىز ؟ ئادىلە دۇدۇقلاپ بەختىيارغا قارىدى .
- ئادىلە، بۇ يىگىت…
- ھە، بۇياق قاھار ئەپەندى، سەھەر شىركىتىدە ئىشلەيدۇ، بىز ئادەتتىكى تونۇش، بۈگۈن بۇ يەردە تاساددىبىي ئۇچىرىشىپ قالدۇق . قاھار قاقاھلاپ كۈلدى :
- ھەي ئادىلە، ئويۇن قويۇشقا ئەجەپ ئۇستىكەنسىز ، بۇ ئادەم سىز پۇلنى كۆزلەپ تەگمەكچى بولغان ھىلىقى قىرى شۇمۇ ؟
- ئەدەپسىزلىك قىلماڭ ! ئادىلەنىڭ كۆزلىرىگە بىردىنلا ئاچچىق تىقىلدى :
- سىز نىمىگە ئاساسەن بۇنداق گەپ قىلىسىز ؟ ئاڭلاپ تۇرۇڭ ، يەنە بىلجىرلايدىغان بولسىڭىز…
- نىمە ؟ نىمە قىلىسىز ؟ مىنى ئۇرامسىز ؟ قاھار يەنە قاقاھلاپ كۈلدى ، بەختىيار ئۇلارنىڭ گەپلىرىنى چۈشىنەلمەي :
- ھەي يىگىت، بۇياق مىنىڭ بولغۇسى ئايالىم ، ئازراق ھۆرمەت قىلىشنى بىل . قاھار نەزىرىنى بەختىيارغا يۆتكىدى :
- ھەي ئاكا، سىز بۇ ئايالنىڭ قانداق ئايال ئىكەنلىكىنى بىلەمسىز ؟ ئۇ بىر ئالدامچى ، ئۇ بىر ياخشى يىگىتنى تاشلاپ سىز بىلەن توي قىلماقچى بوپتۇ ، بۇ زادى نىمە ئۈچۈن ؟ بۇ ئەللىۋەتتە پۇل…
« چاڭ » ڭىدە تەگكەن تەستەك بىلەن قاھارنىڭ كۆزلىرىدىن ئوت چىقىپ كەتتى .
- سەن ! سەن مىنى ئۇرىۋاتامسەن ؟
بىردىنلا توي كۆينەك دۇكىنى جەڭگە-جىدەلگە تولدى، بەختىيار ئادىلەنى تارتىپ تۇرىشىغا ئاق توي كۆينەك كىيگەن نادىرە قاھارنىڭ ئەلپازىنى كۆرۈپ ئۇنى تۇتىۋالدى :
- قاھار، قاھار نىمىش بولدى ؟ قاھار چىرايىنى پۈرۈشتۈرۈپ ئادىلەگە نەپرەتلىك كۆزلىرىنى تىكتى :
- بۈگۈن بۇ يەرگە لايىقىمغا توي كۆينەك كۆرگىلى كەلگەن، قارىغاندا ۋاقىتنى توغرا تاللىمىغان ئوخشايمەن، سەندەك نەس باسقۇر بىلەن ئۇچىرىشىپ قالدىم ، ئىسسىت ! جەۋلان سەن ئۈچۈن نىمىلەرنى قىلمىدى ؟ ئەكىسچە سەن بۇ قىرىغا ياتلىق بولۇش ئۈچۈن ئۇنىڭدىن يۈز ئۆرۈدۈڭ !
- ھەي، ئاغزىڭغا كەلگەنچە جۆيلىمە ، ئادىلە ئۇنداق قىز ئەمەس .
بەختىيار ئادىلەنىڭ كەيپىياتى پاراكەندە بولماسلىق ئۈچۈن ئۇنى ئىچىگە ئەكىرىپ كەتتى ، نادىرە تىخىچە ھەيران بولۇپ سورىدى :
- ئۇ قىز كىم ؟ ئۇ جەۋلان ئاكامنىڭ لايىقىما ؟ بۇ زادى نىمىش ؟
- بولدى، دەرھال كىيمىڭىزنى ئالماشتۇرۇپ چىقىڭ، بىز باشقا جايغا بارايلى، بۇ يەردە بىر مىنۇتمۇ تۇرغۇم يوق .
نادىرە رايىشلىق بىلەن كىيىم ئالماشتۇرۇش ئۆيىگە كىرىپ كەتتى، قاھار تىخىچە ئۆز-ئۆزىگە غودىراپ :
- ئۆلگۈر ! ئەسلىدە ئۇنى خىلى ياخشى قىز دەپ ئويلاپتىكەنمەن، جەۋلانغا راستىنلا ئۇۋال بولدى، توغرا ، ئاۋۋال ئۇنىڭدىن ھىلىقى قاشتىشىنى ئىلىۋالاي، بەرىبىر ئۇمۇ مىنىڭ نەرسەمنى كىرەك قىلمايدۇ .
نادىرە كىيىمىنى ئالماشتۇرۇپ تىخىچە ئاچچىقى بىسىلماي سۆزلەپ تۇرغان قاھارنىڭ يىنىغا كەلدى :
- بىز باشقا توي كۆينەك دۇكىنىغا بارامدۇق ؟ مانا، ئىككى كۈن بولدى، سىزگە يارىغۇدەك كىيىم چىقمىغىلى ، بۇ دۇكاندىن ئەمدى سىزگە يارىغۇدەك كىيىم چىقىۋىدى، بۇ ئىش چىقتى . نادىرەنىڭ نارازىلىق چىقىپ تۇرغان ئىپادىسى قاھارنىڭ تىخىمۇ كەيپىنى ئۇچۇردى :
- دۇكان دىگەن كۆپقۇ ، بۇ يەردە ئالالمىساق باشقا يەردە بار ، توي دىگەن قانچىلىك ئىشتى ، ئادەتتىكىسى بولسىمۇ بولىۋىرىدۇ .
نادىرە قاھارنىڭ ئەلپازىغا قاراپ مۇلازىمەتچى قىزلار ئالدىدا خىجىل بولۇپ گەپمۇ قىلماي دۇكاندىن چىقىپ كەتتى ، قاھارمۇ كىرىسلوغا يۆلەپ قويغان چاپىنىنى ئاچچىق سىلكىپ ئالغىنىچە نادىرەنىڭ ئارقىسىدىن يۈگۈردى .
ئادىلە كىيىملىرىنى ئالماشتۇرۇپ بەختىيارنىڭ توسىشىغا قارىماي چىقىپ كەتتى، بەختىيار باشقا كۈنى كىلىپ كىيىمنى ئالىدىغانغا دىيىشىپ ئادىلەنىڭ ئارقىسىدىن چىقتى .
- ئادىلە توختاڭ، ئادىلە… بەختىيار پىيادىلەر يولىغا قايرىلىپ مىڭىۋاتقان ئادىلەنىڭ قولىدىن تارتتى :
- نىمە بولدىڭىز ؟ مەن ھىچنىمە دىمىسەم يەنە نىمىگە ئاچچىقلىنىسىز ؟
ئادىلە بىردىنلا ئۆزىنى تۇتىۋالالماي پاڭڭىدە يىغلىۋەتتى ، بەختىيار ئۇنى باغرىغا تارتىپ چاچلىرىنى سىلىدى :
- بولدى يىغلىماڭ، بۇ چوڭ كوچا ، باشقىلار قاراۋاتىدۇ ، سائەت ئون ئىككىدىن ئىشىپتۇ ، بىز ئاۋۋال خاليىراق بىر جايغا بىرىپ تاماق يەيلى، نىمىش بولسا ئالدىرىماي دىيىشەيلى .
ئادىلە بىشىنى لىڭشىتىپ بەختىيار بىلەن ئۇنىڭ ماشىنىسىغا چىقتى، ئۇلار ئادەملەر ئانچە كۆپ بارمايدىغان بىر چايخانىنىڭ ئالدىغا كىلىپ توختىدى ، دەرۋەقە بۇ يەر باشقا ئاۋات جايلارغا قارىغاندا بىر قەدەر جىمجىت بولۇپ، ئىچىدىكى زالدىمۇ كۆپ ئادەم كۆرۈنمەيتى . بەختىيار ئايرىمخانا بۇيرۇتۇپ ئادىلەنى خالىيراق ، ئازادە ئايرىمخانىغا ئەكىردى ، ئۇلار بىر نەچچە خىل تاماق بۇيرۇتۇپ چاي ئىچىشكەچ پاراڭلاشتى .
- ئادىلە، بايىقى يىگىت سەھەر شىركىتىنىڭ خوجايىنى ئەنقەر ئەپەندىنىڭ ئوغلىما ؟ ئادىلە لاپپىدە بەختىيارغا تىكىلدى :
- سىز ئۇنى تونۇمسىز ؟
- ھە، ئەنقەر ئەپەندىنى تونۇيمەن ، بىز ياش ۋاقتىمىزدا ئادەتتىكى تونۇشلاردىن ئىدۇق ، كىيىنچە ئۇ كىشى ئىگىلىك تىكلەش ئۈچۈن شاڭخەيگە ئۆگىنىشكە كەتكەن، شۇنىڭدىن بىرى ئالاقە قىلىپ باقمىغان ، لىكىن سەھەر شىركىتىنىڭ نامىنى ئاڭلىغىلى ئۇزۇن بولدى، ئەنقەر بىلەنمۇ ئۇچىرىشىپ باقماپتىمەن . ئادىلە روھسىز كەيپىياتتا :
- ئۇنىڭ ئوغلى بەك يولسىز، دائىم جەۋلانغا ئاۋارىچىلىق تىرىپ يۈرەتتى ، بۈگۈن ماڭا ئەسكىلىك قىلدى ، ئەينى چاغدا ئۇنىڭ ئالدام خالتىسىغا چۈشۈپ شىركىتىدە مودىل بولغان، ئاقىۋەتتە ئۇ شىركەتنىمۇ ، مىنىمۇ ۋەيران قىلدى ، تەلىيىگە جەۋلان شىركەتنى قۇتۇلدۇرۇپ قالغان . ئادىلە يىنىك ئۇھسىنىپ :
- بايا ئۇ ئالدىڭىزدا ئەدەپسىزلىك قىلدى، ھەرگىز كۆڭلىڭىزگە ئالماڭ .
- ياقەي، ئۇ يىگىت راستىنلا تەنتەككەن، ئەنقەرنىڭ ياش ۋاقىتلىرىغا ئوخشىمايدىكەن، ياش ۋاقىتلىرىمدا ئۇنىڭ ئوغلىنى كۆرگەن، ئۇ چاغلاردا ئۇ بالا ئەمدى بەش ياشلارغا كىرگەنغۇ دەيمەن، ئۇنىڭ ئايالى قاتناش ھادىسسىدە ئۆلۈپ كىتىپ ئەنقەرگە بەكلا ئىغىر كەلگەن، ئۇ ئىككى يىلغىچە ئۆزىنى تەڭشىيەلمەي يۈرگەندە باشقىلارنىڭ تەۋسىيەسى بىلەن قايتىدىن ئىگىلىك تىكلەش ئۈچۈن شاڭخەيگە ئۆگىنىشكە كەتكەن، ئۇ چاغلاردا مەنمۇ ئادەتتىكى مودىل ژورنىلى شىركىتىنى قۇرغان ، شىركەتنىڭ تەرەققىياتىمۇ ئانچە ياخشى ئەمەس ئىدى .
- ئۇنداقتا بۇرۇنقى ئايالىڭىز بىلەن شۇ چاغلاردا تونۇشقانمۇ ؟
- شۇنداق ، مەن شىركەت ئاچقاندا ئۇنىڭ بىلەن تونۇشقان، كىيىن شىركىتىمدە ئادەتتىكى مودىل بولۇپ ئىشلىدى ، ئۇ بارا-بارا نامى چىققان مودىلغا ئايلانغان، تۆت يىل ئۆتكەندىن كىيىن ئۇ ھامىلدار بولۇپ بىز توي قىلدۇق ، ھامىلدارلىق مەزگىلىدە ئۇ خىزمەتتىن چىكىنىپ شەھەر سىرتىغا سالدۇرۇپ بەرگەن شەخسىي داچىدا تۇردى ، بۇ ئىشلارنى مەن سىزگە ئىيتىپ بەرگەن، ئەمدى ئۇ ئىشلارنى يەنە تىلغا ئالغۇم يوق .
ئادىلە ئۇنىڭ نىمىشقا خامۇشلۇق كىسىلىگە گىرىپتار بولىشىدا مەلۇم سەۋەپ بارلىقىنى، بەختىيارنىڭ ئۆزىدىن بىر ئىشنى يۇشۇرىۋاتقانلىقىنى بىلەتتى، لىكىن ئۇ ھازىرقىدەك ئەھۋالدا كوچىلاپ سوراۋەرسە بەختىيار ھەرگىز راست گەپ قىلمايدۇ ، ياكى ئادىلەگە بولغان گۇمانى قارىشى كۈچىيىدۇ .
- ھە راست، چۈشتىن كىيىن ئىشىم بار دىگەن ئىدىڭىزغۇ ؟ تاماقنى يەپ بولۇپ سىز ئىشىڭىزغا بىرىڭ ، مەنمۇ چارچاپ قاپتىمەن، ئۆيگە قايتىپ ئارام ئالاي .
- ماقۇل ، بۈگۈن ئاران بىر دەم ئالغىنىڭىزدا سىزنى توي كۆينەك كۆرسىتىمەن دەپ چارچىتىپ قويدۇم ، ئۆيگە قايتىپ ياخشىراق ئۇخلىۋىلىڭ .
- ماقۇل .
تاماقتىن كېيىن بەختىيار ئادىلەنى ئۆيىگە ئاپىرىپ قويۇپ ئۆز ئىشىغا ماڭدى، ئادىلە بولسا بەختىيارنى يولغا سىلىپلا شەۋكەتنى يوقلاپ كىلىش باھانىسىدە يولدىن تاكسى توسۇپ دوختۇرخانىغا كەلدى، ئادىلە سىستىرالاردىن سۈرۈشتۈرۈپ شەۋكەت ياتقان ياتاقنى تىپىپ كىردى، ئۇنىڭ قولىدا بىر ئالاھىدە بولانغان سىۋەت بولۇپ، ئىچىدە ھەر خىل مىۋە-چىۋىلەر بار ئىدى . شەۋكەت تىلفۇن ئويناۋاتقان بولۇپ، ئادىلەنى كۆرۈپلا قولىدىكى تىلفۇننى يىغۇشتۇرىۋالدى .
- شەۋكەت ئاكا، ياخشى تۇردىڭىزمۇ ؟ سىزنى يوقلاپ كەلدىم . ئادىلە سۇس كۈلۈمسىرەپ قولىدىكى مىۋە سىۋىتىنى كارۋات ئىشكاۋىغا قويدى .
- ئا ئادىلە ! سىز قانداق كىپ قالدىڭىز ؟ مىنىڭ دوختۇرخانىدا ياتقىنىمنى كىمدىن ئاڭلىدىڭىز ؟ شەۋكەت ئادىلەنىڭ بىتۇرۇق كەلگىنىدىن سەل ھەيران قالغاندەك تۇراتتى .
- ئىسىڭىزدە يوقما ؟ مەن شىركەتكە كىلىپ قايتا ئىشقا چۈشمەكچى بولغان، ئۈچ كۈن بولدى خىزمەتكە چۈشكىلى ، باشقىلاردىن ئاغرىپ قالغىنىڭىزنى ئاڭلاپ يوقلاپ كەلدىم .
- ھەي ئادىلە سىڭلىم ، سىز بەك ياخشى جۇمۇ ، بۈگۈن كىلىپ مىنى بەك خوش قىلىۋەتتىڭىز ، شىركىتىمىزگە قايتا ئىشقا چۈشكىنىڭىزنى تەبىرىكلەيمەن .
- رەھمەت سىزگە! ئادىلە سۇس كۈلۈمسىرەپ قويدى .
- ھە راست ئادىلە، بەختىيار ئەپەندى ئىككىڭلارنىڭ مۇناسىۋىتى قانداقراق ؟ ئاڭلىسام توي خەۋىرىڭلار توردا ئاشكارلىنىپتۇ ، بۇ راستمۇ ؟ ئادىلە بىشىنى لىڭشىتتى :
- شۇنداق، بەختىيار ئاكام ماڭا بەك ياخشى مۇئامىلە قىلىدۇ ، مەن ئۇنىڭ بىلەن توي قىلسام بەختىمنى تاپالىغۇدەكمەن . شەۋكەت يىنىك ئۇھسىنىپ قويدى :
- سىز شۇنداق ئويلىغان بولسىڭىز بۇمۇ بوپتۇ ، بىراق ياش پەرقىڭلار خىلى چوڭ ، سىز بۇ تەرىپىنى ئويلىشىپ باقتىڭىزمۇ ؟ ئادىلە بىر ئاز خىيالچان تۇرىۋەتكەندىن كىيىن :
- ئويلاشتىم ، ئەسلىدە مەنمۇ بۇ تەرىپىنى تازا قوبۇل قىلالمىغان ، بىراق بەختىيار ئاكامنىڭ بىر كىسەلچان قىزى بار ئىكەن ، ئۇ ئۆزىگە ياخشى قارايدىغان بىر ئانىغا مۇھتاج ، مىنىڭ ئۇ قىزغا ئىچىم ئاغرىپ قالدى ، بەختىيار ئاكاممۇ ماڭا بەك كۆيىنىدۇ ، ئويلىسام بۇمۇ تەقدىرنىڭ ئورۇنلاشتۇرىشى بولسا كىرەك .
- بەختىيارنىڭ قىزى مەدىنە سىزنىڭ دادىسى بىلەن توي قىلىدىغانلىقىڭىزنى بىلەمدۇ ؟ ئادىلە بىشىنى چايقىدى :
- ئەسلى مەن دەي دىگەن، بىراق بەختىيار ئاكام كىيىنچە ئىيتايلى دىگەچكە بۇ ئىشنى مەدىنەگە ئىيتمىدۇق ، مىنىڭچە ئۇ بۇ خەۋەرنى ئاڭلىسا خۇشال بولىشى مۇمكىن.
