ئازاپ كوچىسىدىكى ئايال 168-قىسىم

_ مۇناسىۋىتىمىزگە يېڭى مۇناسىۋەت قوشۇلدى. مەن بىلەن ھەمكارلىشىڭ بولامدۇ.بىز بىرلىكتە ئۇلارنى يىقىتايلى..ئۇلاردىن ئۆچىمىزنى ئالايلى..

ئۇنىڭ قولىغا قاراپ ئىككىلىنىپ تۇرۇپ قالدىم.

_ ئىككىلىنىۋاتىسىز شۇنداقمۇ، دېمەك دېرىكتور بىلەن ئايالىغا يەنىلا ئۇنچىلىك ئۆچ ئەمەسكەنسىز..

_ ياقەي. بىر ئاز ھەيران قېلىۋاتىمەن..

_ نېمىگە؟

_ ئۇ سىزنىڭ ئاكىڭىز تۇرسا، نېمىشقا يەنە ئۆچ ئالىسىز؟

_ ئۇ مېنىڭ بالىلىقىمنى ۋەيران قىلغان. ئاپامنى قەستلىگەن..ئۇنى ئېتىراپ قىلمايمەن..

_ شۇڭا قانداق قىلىشنى ئويلىشىۋاتىسىز؟

_ ئۇنىڭ شىركىتىنى ۋەيران قىلىمەن..بار نەرسىلىرىنى تارتىۋالىمەن..

_ لېكىن مەن..

_ سىز نېمە؟ سىز ئۇنداق قىلالمايسىز شۇنداقمۇ؟! ئۇنىڭ ئايالىنىڭ سىزنى قانداق ھاقارەت قىلغانلىقىنى ئۇنتۇپ قالماڭ، ئۇنىڭ سىزدىن قانداق پايدىلانغانلىقىنى، شىركەتتىن ھەيدىگىنىنى ئۇنتۇپ قالماڭ..

_ بىلىمەن. ئۇ ئىشلار ھېلىغىچە ئېسىمدىن كەتكىنى يوق..لېكىن شاگىرتىمنىڭ ھالىتىنى كۆرۈپ سەل قورقۇپ قالدىم..مېنىڭ ئۆچ ئېلىشىم باشقىلارنى مەندىنمۇ ئېغىر كۈنگە قويىدىغاندەك..

_ سىز ئالدىغا ماڭمىسىڭىز قارشى تەرەپ سىزنى تاشلايدۇ..بۇ شۇنداق جاھان.. سىز ئۇلارنىڭ يەڭمىسىڭىز ئۇلار سىزنى يوق قىلىدۇ.. قاراڭ، سىز ئۇلارنى ئۇنتۇپ ئۆزىڭىز تەرەققىي قىلاي دەپ ئويلىغان. لېكىن ئۇلار سىز قىلىۋاتقان ئىشنى قىلىشنى تاللىدى.. پۇل ۋە مەنپەئەتكە كەلگەندە ئادەملەرنىڭ قانداق ئۆزگىرىدىغانلىقىنى سىز تەسەۋۋۇر قىلالمايسىز..

ئۇنىڭ قولىغا ئۇزۇن قاراپ تۇرۇپ كەتكەندىن كېيىن قولۇمنى ئۈستىگە قويدۇم.

_ بولىدۇ. مەن ھەمكارلىشاي..

ئىككىمىز بىر-بىرىمىزگە ئۇزۇن قارىشىپ تۇرۇپ كەتتۇق. بىز ساۋاقداشلىقتىن دوستلۇققا، دوستلۇقتىن ئەر-ئايالغا تەرەققىي قىلىپ، ئەمدى ھەمكارلاشقۇچىغا ئايلانغانىدۇق. ئۇنىڭ يېنىمدا پەيدا بولىشى مېنى تېخى كۈچلۈك ھەم مۇنەۋۋەر ئادەمگە ئايلاندۇرىۋاتاتتى. بەلكى توغرا ئادەم دېگىنى مۇشۇ بولسا كېرەك.

  *                                          *                                          *                                          

   ئەتىسى سەھەردە ئائىلە ئوقۇتقۇچىسى قولىدا بىر مۇنچە ماتېريال كۆتۈرگىنىچە ئىشىكتىن كىردى. ئۇ دەل ۋاقتىدا كەلگەن بولۇپ ۋاقىت كۆز قارشى ياخشىدەك قىلاتتى.

_ خېلى بالدۇر كەپسىز سىڭلىم.. قارشى ئالىمەن..

_ رەھمەت ھەدە. بۇنىڭدىن كېيىن مۇشۇنداق ۋاقىتتا كېلىمەن..

_ بولىدۇ. قىزىم ئۈستىدە چىقىپ دەرسنى باشلاۋېرىڭ..

ئارقىدىنلا دوستۇم ئوغلىنى يېتىلىگىنىچە كىردى.

_ ئاداش. بۈگۈن بالىلار دەم ئالدى. شۇڭا ئالغاچ كەلدىم..

_ ياخشى قىپسەن. قىزىمغا ئائىلە ئوقۇتقۇچىسى تەكلىپ قىلىپ بەردىم. ئوغلۇڭمۇ تەڭ ئۆگىنىۋالسۇن بولمىسا..

_ نېمانداق ياخشى.. ماڭ بالام،ئۈچىنچى قەۋەتكە چىق..

دوستۇم بالىسىنى چىقىرىۋەتكەندىن كېيىن يېنىمغا كەلدى.

_ ھېلىقى خىزمەتدىشىڭ قىز يوققۇ..ساقلامدۇق؟

_ ياق. ئەمدى ئۇنى ساقلىمايمىز ئاداش..

_ بىرەر ئىش بولمىغاندۇ. تۈنۈگۈن ماڭا ھېساۋات قىپ بەرسەڭ. كۆڭلىگە كېپ قالدىمۇ يا..

_ ياق. باشقا ئىش ئاداش..

دوستۇم سومكىسىدىن قەغەزگە بولاقلىق بىر نەرسىنى چىقاردى.

_ ماۋۇنى ساڭا قىلدىم..

_ بۇ نېمە؟

_ سەۋزە پىشلاق.. ئاڭلىسام سەۋزىنىڭ كۆزگە پايدىسى بارمىش..

_ بۇ؟!_ كۆزلىرىمگە ياش يىغىلىشقا باشلىدى.

_ كۆز ئەينىكىڭ بۇرۇنقىدىن قېلىنلاپ قاپتۇ. كۆڭلۈم يېرىم بوپ قالدى.. كۆزۈڭ ئاجىزلاپ كەتكەندەك قىلىدۇ ئاداش.. سەۋزە كۆزگە پايدىلىق..

_ رەھمەت ئاداش..كۆزۈم ياخشى..

دوستۇم قولۇمنى تۇتتى.

_ سەن بەرگەن پۇل بىلەن بالىلارغا كىيىم ئەپ بەردىم. ئۆيگە ئازىراق لازىملىق نەرسىلەرنى ئېلىۋالدىم..سەن مېنى ئىشلەتكەندىن بېرى ھاياتىمنىڭ مەنىسى باردەك ھېس قىلىدىغان بولدۇم، ئۆزۈمنىڭ ئەسلى بىر ئاز ئىقتىدارىم بارلىقىنى بىلىپ بەك خوش بولدۇم..

  بارلىق ئادەمنىڭ نەپرىتىنى قوزغاپ ئۆزۈمگە ئۆچ قىلىۋاتقان بۇ كۈنلەردە بىر ئادەمنىڭ مەندىن خوش بولغىنىنى كۆرۈپ ھاياجىنىمنى باسالماي قالدىم.

_ ساڭا بىر ئاز ياردىمىم تەگكەنلا بولسا بولدى. سەنمۇ نۇرغۇن قىيىنچىلىق كۈنلەردە يېنىمدىن كەتمىگەن..

ئىككىمىز قول تۇتۇشۇپ بىر-بىرىمىزگە قاراپ قويدۇق.

_ راست دېسەم تاماق ئېتىش ئۆي رەتلەشنى پەقەت قىلىشقا تېگىشلىك ئىش دەپ ئويلايتتىم. ئۆزۈمنى بۇنىڭدىن باشقىنى قىلالمايمەن دەپ كۆڭلۈم يېرىم بولاتتى. لېكىن سەن فىلىم تارتقاندىن بېرى ئۆزۈمنى شۇنداق ئىقتىدارلىقتەك ھېس قىلىدىغان بولۇپ قالدىم. ھەر قېتىم ئېكرانغا قاراپ تاماق ئېتىش توغرىسىدا سۆزلىگىنىمدە، ئۆزۈمنى باشقىلارغا بىلىم يەتكۈزىۋاتقاندەك ھېس قىلىمەن..

_ تاماق ئېتىش، ئائىلە ئىشلىرىنى قىلىش ئەسلى بىر ئىقتىدار. لېكىن نۇرغۇن ئادەملەر بۇنىڭغا سەل قارايدۇ..

_ شۇنداقكەن. بۇنى سەن ماڭا ھېس قىلدۇردۇڭ..

_ ئاچا. بۇنىڭغا قارا..

سىڭلىمنىڭ يانفونىنى قولۇمغا ئېلىپ بۇرۇنقى سىن نومۇرۇمدىن تارقىغان فىلىمنى كۆردۈم. ئىچىدىكى مەھسۇلاتلار دەل مەن كىرگۈزگەن مەھسۇلاتلار بولۇپ، ئېلانلارمۇ دەل مەن يازغان ئېلانلار ئىدى.

_ ئاداش. بۇلارنىڭ ھەممىسى بىزنىڭ ماللارغۇ.. نېمىش بۇ؟ ئېلانمۇ سەن يوللىغان ئېلانكەن..

_ ھېچقىسى يوق ئاداش. تىجارەتنىڭ يولى بىر نىسىۋىسى بۆلەك..

_ بۇنى بىرسى ئاشكارلىمىسا قانداقسىگە بۇنداق بولىدۇ. ئەجەبا..

_ شۇنداق. كاتىپ..شۇ قىز ئاشكارا قىپتۇ. شۇڭا ئۇنى ھەيدىۋەتتىم..

_ ھەي. ئەسلى ھەممىمىز ئانا بولغاندىن كېيىن بىللە تەرەققىي قىلامىزمىكىن دەپتىكەنمەن..بۇ قىزنىڭ بۇنداق ناچارلىقىنى بىلمەپتىمەن..

  سىڭلىم مەھسۇلاتلارغا قارىدى.

_ بۇلارنى قانداق قىلارمىز ئەمدى..بىرمۇنچە ئېلىۋاپتىمىز.. ئۇلارنىڭ باھاسى ئەرزانكەن..بىزنىڭكىنى ئالارمۇ؟

_ تۇيۇقسىز بىر نەرسە ئويلاپ قالدىم. بۇ ماللارنى ئانىلارغا ھەقسىز سوۋغا قىلايلى..

_ ھەقسىزما؟ بۇنداق قىلساڭ قانداق بولىدۇ؟

_ شۇنداق. ھەقسىز..ھەقسىز سوۋغا قىلىمىز..

_ ئاچا. سەن بۇنىڭغا بىرمۇنچە پۇل خەجلىگەن تۇرساڭ. ھەقسىز سوۋغا قىلساق زىيان چىقمامدۇ..

_ نۇرغۇن ئاياللار تۇغۇپ خىزمەت قىلالمايدۇ..پۇلدا قىينىلىدۇ. بەزى ئاتا ئانىلار تۇرمۇش ھەلەكچىلىكىدە باللىرىغا كىيىم ئەپ بېرەلمەيدۇ..بۇنى شۇلارغا بېرەيلى..ئۇلارنىڭ كۆڭلى خوش بولسا بەلكى قىزىمنىڭ كېسىلىگە پايدىسى بولۇپ قالار..بۇنى توردا ساتساق باشقىلارغا يېڭىلىق تۇيۇلماسلىقى مۇمكىن..

_ بولىدۇ. مۇشۇنداق ئۇسۇل قوللىنايلى..ئاندىن ئۇلارغا چوقۇم بىزنىڭ سىن قانالنى قوشقۇزايلى.. ئاندىن كېيىنكى قېتىم مال ئالغاندا ئېتىۋار قىلايلى..

_ بۇمۇ توغرا ئۇسۇلدەك تۇرىدۇ.. ئۇلار بۇ ماللارنى ياقتۇرسا چوقۇم يەنە بىزدىن مال ئالىدۇ..

_ شۇنداق. جاندىن كەچمىگۈچە جانانغا يەتكىلى بولماس دەپتىكەن. مۇشۇنداق قىلساق ئۆزىمىزنىڭ نامىنىمۇ تىكلىيەلەيدىكەنمىز. باشقىلارغىمۇ پايدا يەتكۈزەلەيدىكەنمىز..

  بۇنداق ئىشنى قىلىشىم. بىر تەرەپتىن ياخشى نامىمنى تىكلەش بولسا، يەنە بىر تەرەپتىن شاگىرتىمنىڭ ئائىلىسىگە نىسبەتەن قەرزدارلىق تۇيغۇمنى يوق قىلىش ئۈچۈن ئىدى. پەقەت مۇشۇنداق بولغاندىلا يۈرىكىمدە ئۆزۈمنى يەنە ياخشى ئادەمدەك ھېس قىلاتتىم.

  _ تور ئەھلى. بۇ ماللارنىڭ ھەممىسىنى ھەقسىز تارقاتماقچى. سىلەر پەقەت زاكاس چۈشۈرسەڭلەرلا ھەقسىز سېلىپ بېرىمىز..پۈتۈنلەي ھەقسىز..لېكىن بىر ئادەمنىڭ پەقەت بىرلا زاكاس چۈشۈرۈش ھوقۇقى بار..چوقۇم بىزنىڭ نومۇرىمىزنى قوشىۋالىسىلەر..بىر ئادەمگە تەۋسىيە قىلىپ قويساڭلار قوشۇپ بېرىدىغان سوۋغىمىزمۇ بار تېخى..

   ئېلاننى باشلاپ كەتتۇق. سىڭلىم بىلەن دوستۇم كۈچەپ ئىشلەۋاتاتتى.

«نېمە دېگەن ياخشى. بۇ بەك چوڭ خوش خەۋەركەن»

«مەن باشقىلارنىڭ ساتقىنىنى كۆرۈپ ئاپتىكەنمەن. ئېسىت. بۇ ئېلاننى بالدۇر كۆرسەم بولمامدۇ»

«مەن زاكاس چۈشۈردۈم. ئىشلىرىڭلار بەرىكەتلىك بولسۇن»

 _ ئوف. بارلىق مالغا زاكاس چۈشۈپ بولدى..

 _ ھەقسىز بولغاچقا تېز سېتىلىپ كەتتى..شۇنچىۋالا مال بىردەمدە تۈگەپتۇ مانا..

 _ لېكىن بەزى قالايمىقان ئىنكاسلارمۇ باركەن.. بىزنىڭ مالنى ساختا بولغاچقا بىكارلىق ساتتى دەپتۇ..

 _ بۇ ئۇلارنىڭ ئادىمى..كارىڭ بولمىسۇن. مال ئۆزى سۆزلەيدۇ...

 _ بۇنچە كۆپ زاكاسنى قانداق قىلىمىز ئاچا؟

 _ ئالدىرىما. ھەل قىلىشنىڭ ئۇسۇلى بار..

يولدىشىمنىڭ نومۇرىنى باستىم.

_ شىركىتىڭىزدىن بىر نەچچە ئادەم ئېلىپ ئۆيگە كەلگەن بولسىڭىز..

بىر ئاز ۋاقىتتىن كېيىن يولدىشىم بىر نەچچە ئادەمنى ئەگەشتۈرگىنىچە ئۆيگە كىردى.

_ نېمىش بولدى؟ قانداق ياردەم كېرەك؟

_ بۇ ماللارغا نومۇر ئۇرۇپ ئادرىس بېسىپ يولغا سالىدىغان ئىش...

_ ۋوي. ھەممىنى سېتىپ بولدۇڭلارما؟

يولدىشىمنى ياندىكى ئۆيگە باشلاپ كىردىم.

_ ماللارنى ھەقسىز قىلىۋەتتىم..

_ نېمىشقا؟ بۇ ماللارغا ئاز پۇل خەجلىمىگەن تۇرسىڭىز..

_ ئامال يوق. ئۇلار ئوخشاش مالنى سېتىپ چىقىرىۋېتىپتۇ. يەنە كېلىپ مېنىڭ ئىجادىيىتىمنى قوللىنىپتۇ.. كاتىپ قىزنىڭ قىلغان ئىشى..

_ ھەي. زىيان چىقىدىغان بولدى..

_ مەيلى. ھەر بىر ئادەمگە نومۇرىمىزنى قوشقۇزدۇق.. تەۋسىيە قىلغانلارغا سوۋغا بەردۇق.. بىر ئادەمنىڭ بىرلا زاكاس چۈشۈرۈش ھوقۇقى بار.. ھازىر 50مىڭ مال سېتىلىپ بولدى. بولمىدى دېگەندىمۇ 40مىڭ ئادەم يىغالايمىز..

_ ۋاھ..كاللىڭىز ئاجايىپ ئىشلەيدۇ جۇمۇ..

_ يەنە بىر تەرەپتىن ياخشىلىق قىلىش ئۈچۈن قىلدىم. شاگىرتىمنىڭ ئىشىدا ھېلىھەم ئۆزۈمنى ئەيىپلەپ تۇرىمەن..مۇشۇ ئارقىلىق بىر ئاز ئانىلار ۋاقتىنچە قىيىنچىلىقىنى ھەل قىلالىسىمۇ مەيلى..

يولدىشىم قولۇمنى تۇتتى.

_ ئۆزىڭىزدىن گۇمانلانماڭ. سىز ياخشى ئايال..

ئۇنىڭ قولىنى سىقىمداپ قويدۇم.

ماللارنى بىر نەچچە ئادەم بىرلىشىپ چاپلاپ خالتىغا سېلىپ تەييار قىلغاندىن كېيىن يولغا سالدۇق. بۇ كەيپىيات تولىمۇ كەسكىن بولۇپ. شۇ تاپتا ھەممەيلەن كەسىپ ئۈچۈن كۈچەۋاتاتتۇق.

 ئائىلە ئوقۇتقۇچىسى قىزىمنى يېتىلىگىنىچە پەلەمپەيدىن چۈشتى. قىزىمنىڭ كۆزىدىن كۈلكە ئىپادىلىنىپ تۇراتتى. ئۇ خوشال بولغاندەك قىلاتتى.

_ قىزىم، مۇئەللىمىڭ ياخشىمىكەن؟ خوش بولدۇڭمۇ؟

_ بەك خوش بولدۇم. مۇئەللىم ماڭا جىق نەرسە ئۆگىتىپ قويدى..

قىزىمنىڭ چىرايىدىكى كۈلكىنى كۆرۈپ كۆڭلۈم جايىغا چۈشكەندەك بولدى.

_ سىزگە رەھمەت..ئەمىسە ئەتە يەنە بۈگۈنكى ۋاقىتتا كېلىڭ..

_ بولىدۇ ھەدە. مەن ماڭدىم ئەمىسە..

ئائىلە ئوقۇتقۇچىسى چىقىپ كەتكەندىن كېيىن يولدىشىم يېنىمغا كەلدى.

_ ئىشلار ياخشىلىنىۋاتقاندەك قىلامدۇق قانداق؟!

_ ھازىرچە شۇنداقتەك قىلىدۇ..

_ ھە راست، ئىسكىلاتنىڭ ئىشىنى قانداق قىلىسىز؟ يەنە شۇ يەرگە مال سالغۇزامسىز؟

_ بىلمەيۋاتىمەن..باشقىلارنى ئىزدەپ باقايمىكىن..

_ مېنىڭ بىر پىلانىم بار.. ئاڭلاپ بېقىڭ..

_ قېنى دەڭ..ياخشى پىلان بولسا تەڭ قىلىمىز..

_ ئەزران ھەم زاۋۇتتىن بىرنى تاپىسىز.. ئاندىن مالنى مۇشۇ ئىسكىلاتقا سالغۇزىسىز..

_ نېمىشقا ئەمدى؟

_ بۇ دۈشمەننى ئازدۇرۇش دەپ ئاتىلىدۇ. چۈنكى سىز نېمە مال سالسىڭىز ئۇلار شۇ مالنى كىرگۈزىدىكەن..

_ ۋوي.. توغرا. بۇنداق قىلسام ئۇلار شۇ مالنى كىرگۈزىدۇ..

_ ئاندىن ئۆزىڭىز ياخشى زاۋۇتنىڭ مېلىنى باشقا ئىسكىلاتقا كىرگۈزىسىز.. ھازىر خەۋەر يەتكۈزىدىغان كاتىپ قىز يوق. ئۇلار سىزنىڭ مال مەنبەيىڭىزنى بىلەلمەيدۇ..

_ مەن نېمىشقا بۇنى ئويلىمىغاندىمەن..

_ شۇڭا سىزگە مەن ئۇچرىدىم-دە..

_ لېكىن.._ ئىككىلىنىپ تۇرۇپ قالدىم.

_ يەنە ئۇلارغا يامانلىق قىلماسلىقنى ئويلاۋاتىسىز..ئىككىلىنىۋاتىسىز..

_ شۇنداق. چۈنكى ئايال خوجايىن بىلەن ئۆچۈم يوق ئىدى..

_ بۇ ئۆچنى ئۇلار ئۆزى پەيدا قىلدى..ئېسىڭىزدە بولسۇن سىز ئۆزىڭىزنى قوغدىمىسىڭىز ئۇلار ھەرۋاقىت سىزگە ھۇجۇم قىلىدۇ..يەنە كېلىپ بۇ سودا ئىشى..رىقابەتچىڭىزنى ۋەيران قىلمىسىڭىز.. ئۆزىڭىز ۋەيران بولىسىز..

 _ بولىدۇ. سىزنىڭ دېگىنىڭىزدەك قىلاي..

بىرىنچى تۈركۈم ماللارنى چىقارغاندىن كېيىن ئالاھىدە ياخشى ئىنكاسلارغا ئېرىشكىنىم بۇ مەزگىلدىكى ئەڭ چوڭ نەتىجەم بولدى.

_ ئاچا، نۇرغۇن ئاياللار بىزدىن خوش بوپتۇ..

_ شۇنداق. نۇرغۇنلار يۈرەك بېرىپتۇ..قوشۇلغان ئادەملەرمۇ بەك كۆپ..

_ ئويلىغان نەتىجىگە ئېرىشىپتىمىز..

_ گەرچە پۇل تاپمىغان بولساقمۇ، لېكىن ياخشى باھاغا ئېرىشتۇق..تور دۇكىنىمىزنىڭ نومۇرى كۆتۈرۈلدى..

_ شۇ ئەمەسمۇ، ئەمدى ئادەملەر كىرسە دۇكىنىمىزنىڭ باھاسىغا قاراپ خاتىرجەم مال سېتىۋالىدۇ..

_ زادى تىرىشقاننىڭ نەتىجىسى بولىدىكەن..

_ يېڭى ماللار كەلگۈچە تاماقنى تارتىۋېرەيلى..تاماق پىشۇرىدىغان سىن قانالدىمۇ ئادەم كۆپىيىۋاتىدۇ..

_ بولىدۇ بولىدۇ..شۇنداق قىلايلى..

_ يېڭى مالنى قانداق قىلاي دەيسەن ئاچا؟

_ داۋاملىق كىرگۈزىمىز..

_ لېكىن داۋاملىق ھەقسىز قىلغىلى بولمايدۇ دە..

_ ھازىر بىرنىڭ كۆرۈرمەنلىرىمىزنىڭ ھەممىسى ئانىلار، يەنە بالىلار مەھسۇلاتىغا مۇھتاج بولىدۇ..شۇڭا مالنى توختاتساق بولمايدۇ..

_ ئۇلار يەنە مالنى دورىسا قانداق قىلىمىز؟

_ ئەنسىرىمەڭلار، بۇنىڭغا قارىتا ئۆزۈمنىڭ ئامالى بار..

شۇنداق دەپ تۇرۇشۇم بىلەن دەرۋازا قوڭغۇرىقى بېسىلدى. كۆرستىىش ئەينىكىگە قاراپ ئايال خوجاننى كۆردۈم.